عالىمدار ەتتى ارنايى ينكۋباتوردا جانۋارلاردىڭ باعانالىق جاسۋشاسىنان ءوسىرىپ شىعارادى. جاساندى جىلقى ەتىنىڭ ءدامىن ءۇش جىلدان كەيىن تاتا الامىز، ال بيوپرينتەردىڭ كومەگىمەن كەسەكتى ەت الۋ 5 جىلدان كەيىن مۇمكىن بولادى، دەپ جازادى رەسەيلىك يزۆەستيا گازەتى.
ەتتىڭ بۇل ءتۇرى كەلەشەكتە اۋىل شارۋاشىلىعى ونىمىنە پايدالى بالاما بولا الادى. ويتكەنى جاساندى تاماقتى قولدان جاساۋ كەزىندە جانۋارلاردىڭ جاسۋشاسى پايدالانىلادى جانە ول ۆيرۋستار مەن باكتەريالاردان قورعالعان، زارارسىزداندىرىلعان ءنارلى ورتادا وسىرىلەدى. قازىر الەمدە ەت ءوسىرۋ تەحنولوگياسىن دامىتىپ جاتقان 30 عا جۋىق جوبا بار. سونىڭ ءبىرى قازان قالاسىندا ىسكە اسىرىلىپ جاتىر. تاتارستاندىق عالىمداردىڭ سوزىنشە، جىلقىنىڭ ەتىن تاڭداۋعا وسى ەتتى ءسۇيىپ جەيتىن تاتار حالقىنىڭ ءداستۇرى ىقپال ەتكەن.
«ەت جاساۋ ءۇشىن بيوپسيا كومەگىمەن قۇلىننان بۇلشىق ەت ۇلپاسىنىڭ ۇلگىلەرىن الامىز. ويتكەنى قۇلىننىڭ ەتىندە بىزگە قاجەت باعانالىق جاسۋشا كوپ، - دەيدى ArtMeat كومپانياسىنىڭ باس ديرەكتورى اسقار لاتىشيەۆ. - سوسىن بيولوگيالىق ماتەريالدى ارنايى ينكۋباتورعا سالامىز. بۇل تەحنيكا دۇرىس تەمپەراتۋرالىق رەجيم مەن اتموسفەرا قۇرامىن قامتاماسىز ەتەدى، سونداي-اق جاسۋشالاردىڭ وسۋىنە قاجەتتى تاعامدىق زاتتاردى جەتكىزەدى».
عالىمداردىڭ قازىرگى كەزەڭدەگى باستى ماقساتى - بۇلشىق ەت كومپونەنتتەرى بارىنشا جىلدام ءوسۋى ءۇشىن وڭتايلى جاعداي مەن ءنارلى ورتا تابۋ. مامانداردىڭ ايتۋىنشا، جاسۋشالىق دامۋ بەلسەندىلىگى - تەحنولوگيانىڭ ءارى قارايعى اۋقىمىن ارتتىرۋعا قاجەت ەڭ ماڭىزدى سيپاتتىڭ ءبىرى. ول بۇل تەحنولوگيانى ونەركاسىپتىك اۋقىمدا قولدانۋعا مۇمكىندىك بەرەدى.
جالپى، عالىمدار جاساندى جىلقى ەتى مەن كادىمگى جىلقى ەتىنىڭ دامىندە ايىرماشىلىق بولمايدى دەپ وتىر.
«الىنعان ءونىمنىڭ ءدامى تابيعي جىلقى ەتىنىكىندەي بولادى، - دەيدى قازان فەدەرالدى ۋنيۆەرسيتەتى پرەتسيوزدى جانە رەگەنەراتيۆتى مەديتسينا عىلىمي كلينيكالىق ورتالىعىنىڭ ديرەكتورى البەرت ريزۆانوۆ. - ءبىراق بۇل پايدالى بالاما بولا الادى. ينكۋباتورلاردىڭ تازالىعىنىڭ ارقاسىندا جاساندى ەتتى وسىرەتىن كەزدە فەرمادا ءجيى قولدانىلاتىن انتيبيوتيك قاجەت بولمايدى».
فارش جاساعاننان كەيىن جاسۋشادان كەسەكتى ەت ءوسىرۋدىڭ دە اۋىلى الىس ەمەس. دەگەنمەن، ول ادديتيۆتى تەحنولوگيالار بارىنشا دامىعان جاعدايدا عانا مۇمكىن، سەبەبى جاساندى ستەيك الۋ ءۇشىن ونى وسىرىلگەن جاسۋشادان باسىپ شىعاراتىن وتە كۇشتى بيوپرينتەر قاجەت.
3D Bioprinting Solutions كومپانياسى قۇرىلتايشىلارىنىڭ ءبىرى جانە باسقارۋشى سەرىكتەسى يۋسەف حەسۋانيدىڭ ايتۋىنشا، وعان بەس جىلداي ۋاقىت كەرەك. ساراپشىنىڭ سوزىنە سەنسەك، بۇل سالادا جەتىستىككە جەتۋ ءۇشىن عالىمدار بۇلشىق ەت جانە ماي جاسۋشالارىمەن بىرگە بىرىكتىرۋشى ۇلپا جاسۋشالارىن دا پايدالانۋى ءتيىس. ولاردان ستەيك قاتپارلارى قالىپتاسادى.
«2014-جىلى وسىرىلگەن جاسۋشانىڭ كيلوگرامى $1 ميلليون بولسا، قازىر ول $1,5 مىڭعا دەيىن ءتۇستى. ءبىراق بۇل ءونىم رەستورانعا دەيىن جەتۋى ءۇشىن ونى تاعى 100 ەسە ارزانداتۋ كەرەك، ياعني $15 دەيىن. مەنىڭ ويىمشا، بۇل ابدەن مۇمكىن»، - دەيدى يۋسەف حەسۋاني.
ArtMeat وسىرگەن العاشقى فارش شامامەن ءۇش جىلدان كەيىن دايىن بولادى. سودان كەيىن ەتتىڭ بۇل ءتۇرى قىمبات رەستورانداردا جانە دۇكەندەردە پايدا بولۋى مۇمكىن.