حالىق يگىلىگىنە بەرىلۋى ءتيىس نىسان بىرنەشە جىلدان بەرى بوس تۇر. بۇل - ەلورداداعى «Family village» تۇرعىن الابىندا ورنالاسقان بالاباقشا. بالاباقشا قۇرىلىسىنا قىرۋار قارجى جۇمسالعانى انىق. اۋلاسىنا اعاش تا ەگىلگەن. الايدا يەسىز.
«جازدا نەگە اشىلماي تۇر دەگەن سۇراق تۋىندادى. سالىنعان بولسا، نەگە اشىلمايدى. ورتالىققا شىعامىز. جازدا جارايدى. قىستا قيىن. بۇل اۋماقتىڭ تۇرعىندارى تاڭنان تۇرىپ، بالالارىن ورتالىققا تاسىپ اۋرە. مەملەكەتتىك ءبىلىم بەرۋ مەكەمەلەرىنەن مۇندا تەك مەكتەپ قانا جۇمىس ىستەپ تۇر. ال، بالاباقشانىڭ سيقى مىناۋ. اتى بار، زاتى جوق»، - دەيدى قالا تۇرعىنى ايناگۇل سۇلەيمەنوۆا.
بۇل اۋداندا مەملەكەتتىك بالاباقشا جوق. تەك جەكەمەنشىك بالالار باقشاسى بار، ءبىراق وعان ايىنا 50 مىڭ تەڭگە تولەۋ كەرەك.
«مەن بالامدى قالا ورتالىعىنداعى بالاباقشاعا اپارامىن. جاقىن جەردە مەملەكەتتىك بوبەكجاي جوق. بوس تۇرعان بۇل عيماراتتى نازاربايەۆ زياتكەرلىك مەكتەبىنە بەرگەن دەگەن اڭگىمەلەر ايتىلدى. مۇندا تۇرعىندار وتە كوپ. ءار وتباسىندا كەمىندە ءبىر بالادان بار»، - دەدى تاعى ءبىر قالا تۇرعىنى ەلەنا ۆوروبيەۆا.
جەرگىلىكتى بيلىك وكىلدەرى عيماراتتىڭ 4 جىلدان بەرى پايدالانىلماي، بوس تۇرعانىن راستادى.
«بالاباقشا مەملەكەتتىك بولادى. 240 بالانى قابىلدايمىز دەپ جوسپارلاپ وتىرمىز. 9 توپ بولادى»، - دەپ اتاپ ءوتتى نۇر-سۇلتان قالاسى اكىمدىگى ءبىلىم باسقارماسى مەكتەپكە دەيىنگى ءبىلىم بەرۋ ءبولىمىنىڭ باسشىسى ءلاززات قازبەكوۆا.
اكىمدىك وكىلدەرى بالاباقشا كوپ ۇزاماي ىسكە قوسىلادى دەپ سەندىردى.