شايدى قالتاشالارعا وراۋدى كىم ويلاپ تاپتى؟
بۇل جايلى بىرنەشە پىكىر بار. كەيبىر جازبالاردا 780 -جىلى قىتايلىق لۋك لۋدىڭ شايدى جۇقا قاعازعا وراپ دايىنداعانى جازىلعان. باسقالارى شاي قالتاشالارى سوعىس كەزىندە كەزدەيسوق پايدا بولدى دەپ جاتادى. ونى رەسمي تەك 1952 -جىلى «ليپتون» كومپانياسى پاتەنتتەدى. تۇيىرشىكتەگى شايدى جاساۋشىلار قاعازدىڭ ورنىنا پلاستيكتى ءجيى قولدانا باستاعان. ونى بايقاۋ وڭاي. پلاستيكتەن جاسالعان تۇيىرشىك تورلى ءارى بەرىك بولىپ كەلسە، قاعاز تۇيىرشىكتەر كەرىسىنشە تەز جىرتىلادى.
Scientific American باسىلىمى كانادانىڭ مونرەال قالاسىنداعى دۇكەندەردەن زەرتتەۋ ءۇشىن تۇيىرشىكتەگى شايدىڭ ءتورت ءتۇرىن سۇرىپتاپ العان. زەرتحانادا بوس تۇيىرشىكتەردى 95 گرادۋس ىستىق قايناتىلعان سۋعا سالىپ، بەس مينۋتتان سوڭ سۇيىقتىقتىڭ قۇرامىن زەرتتەگەن. عالىمدار قايناتىلعان سۋدان ميكروپلاستيكتىڭ ەكى ءتۇرىن تاپقان. ءار توستاعانعا شامامەن 11,6 ميلليارد ميكروپلاستيكتىڭ بولشەگى تۇسەدى ەكەن. ولاردىڭ كولەمى 100 نانومەتردى قۇرايدى. بۇل ادامداردىڭ پلاستيكتى تۇيىرشىكتەگى شايدى قولدانعان كەزدە اعزاسىنا ميكروپلاستيك قوقىستاردىڭ تۇسەتىنىن بىلدىرەدى.
ازىرگە عالىمدار پلاستيكتى تۇيىرشىكتەگى شايدىڭ ادام اعزاسىنا ناقتى قانداي زيان كەلتىرەتىنىن انىقتاعان جوق. دەگەنمەن ميكروپلاستيك اعزاعا تۇسسە قاۋىپتى حيميالىق زاتتاردى ءبولىپ، باۋىردى زاقىمدايتىنى بەلگىلى. ارينە، قالتاشاداعى شاي تەك پايدالى نە تەك زيان دەپ ايتۋعا بولمايدى. بۇل ونىڭ تۇرىنە، ساپسىنا، قۇرامىنا بايلانىستى بولادى. شايدىڭ ساپاسىن تەكسەرۋ ءۇشىن ونى سۋىق سۋعا مالىپ كورىڭىز. سۋ دەم ارادا قىزارىپ كەتسە، دەمەك بۇل شاي بويالعان. ونىڭ ساپاسى ناشار، ءدامى دە ويداعىداي ەمەس.
Massaget.kz