بۇل تۋرالى پرەزيدەنت قاسىم- جومارت توقايەۆ ءوزىنىڭ «اباي جانە ХХІ عاسىرداعى قازاقستان» اتتى ماقالاسىندا جازدى، دەپ حابارلايدى قازاقپارات.
«ءبىز ەگەمەن ەل رەتىندە ءوسىپ- وركەندەۋىمىز ءۇشىن مەملەكەتتىلىگىمىزدى نىعايتۋىمىز كەرەك. زاڭ ۇستەمدىگىن جانە قوعامدىق ءتارتىپتى ساقتاۋ بارشاعا ورتاق مىندەت ەكەنىن ۇعىنعان ءجون. حالىقتىڭ بيلىككە دەگەن قۇرمەتى بولماسا - ەلدىگىمىزگە سىن. سوندىقتان ازاماتتارعا، اسىرەسە، جاستارعا مەملەكەتتى سىيلاۋدىڭ ءمان- ماڭىزىن ءتۇسىندىرۋ قاجەت. وسى رەتتە تاعى دا ابايدىڭ مۇراسىنا زەيىن قويعان ابزال» ، - دەلىنگەن مەملەكەت باسشىسى ماقالاسىندا.
وسى ورايدا ق. توقايەۆ ۇلى اقىن ءوزىنىڭ شىعارمالارىندا ەلدىك مۇراتتى اسقاقتاتىپ، ۇلت بىرلىگىن بيىكتەتكەنىن اتاپ ءوتتى. ول ادىلەتتى قوعام قۇرۋ يدەياسىن كوتەرگەن. دەمەك، ابايدىڭ كوزقاراستارى ХХІ عاسىرداعى قازاقستان قوعامى جانە ونىڭ بەرەكە- بىرلىگى ءۇشىن اسا قۇندى. حاكىم ابايدىڭ ۇستانىمدارى وركەنيەتتى مەملەكەت قاعيدالارىمەن ۇندەسەدى. زاڭ ۇستەمدىگى، بيلىكتىڭ اشىقتىعى مەن حالىق الدىندا ەسەپ بەرۋى جوعارى دەڭگەيدە بولىپ، مەملەكەت ىسىنە ازاماتتىق قوعام وكىلدەرى بەلسەنە ارالاسقان جاعدايدا عانا ادىلەتتىلىك بەرىك ورنىعادى.
«مەنىڭ «حالىق ۇنىنە قۇلاق اساتىن مەملەكەت» اتتى تۇجىرىمدامام ءدال وسى ادىلەتتى قوعام يدەياسىن دامىتۋ ماقساتىمەن ۇسىنىلدى. بيلىك پەن قوعام اراسىنداعى سىندارلى ديالوگ مەملەكەتكە دەگەن سەنىمدى نىعايتا تۇسەدى. ۇكىمەت مۇشەلەرى، سونىڭ ىشىندە مينيسترلەر مەن اكىمدەر مەملەكەتتىك جانە قوعامدىق ماڭىزى بار ماسەلەلەرگە قاتىستى شەشىم قابىلداعان كەزدە ازاماتتاردىڭ ۇسىنىستارى مەن تىلەكتەرىن ەسكەرۋى كەرەك. مۇنى اباي مەڭزەگەن ادىلەتتى قوعام قالىپتاستىرۋدىڭ بىردەن- ءبىر شارتى دەپ بىلەمىن» ، - دەدى پرەزيدەنت.
سونىمەن قاتار مەملەكەت باسشىسى بۇل باعىتتا ۇلتتىق قوعامدىق سەنىم كەڭەسىنىڭ ماڭىزدىلىعىنا توقتالدى.
«ۇلى اقىن «كەلەلى كەڭەس جوعالدى، ەل سىبىردى قولعا الدى» دەگەندى بەكەر ايتقان جوق. ەلگە بيلىك جۇرگىزەتىندەرگە جۇرتتىڭ كوڭىلى تولمايتىنىن دا اڭعارتادى. «سىبىردان باسقا سىرى جوق، شارۋاعا قىرى جوق» زامانداستارىمىز كوبەيمەس ءۇشىن بيلىك حالىققا ءاردايىم قۇلاق ءتۇرىپ وتىرعانى ءجون. مەملەكەت پەن قوعام وكىلدەرى تۇيتكىلدى ماسەلەلەردى بىرگە تالقىلاپ، شەشىمىن تابۋ ماقساتىندا ۇلتتىق قوعامدىق سەنىم كەڭەسىن قۇردىق. كەڭەس فورمالدى سيپات الىپ كەتپەۋى ءۇشىن ونىڭ مۇشەلەرىمەن ارنايى كەزدەسىپ، جۇمىسىن ءجىتى قاداعالاپ وتىرمىن» ، - دەپ قاداپ ايتتى قاسىم- جومارت توقايەۆ.