ۋكراينا پرەزيدەنتىنىڭ سايتىنداعى حابارلاماعا سايكەس، ماماندار يرانعا 8- قاڭتاردا كەشكە جەتۋى ءتيىس. ىزدەۋ-قۇتقارۋ توبىنىڭ اراسىندا توتەنشە جاعداي قىزمەتىنىڭ وكىلدەرى، ىشكى ىستەر مينيسترلىگى، سىرتقى ىستەر مينيسترلىگى، ۋكراينانىڭ قاۋىپسىزدىك قىزمەتى جانە وزگە سالا ماماندارى دا بار. ولاردىڭ بارلىعى قۇربانداردى انىقتاۋ مەن ولاردىڭ ءمايىتىن ۋكرايناعا جەتكىزۋ ماسەلەسىن شەشپەك.
زەلەنسكيدىڭ ايتۋىنشا، كيەۆ اپاتتىڭ سەبەبىن انىقتاۋ ءۇشىن شەتەلدىك ارىپتەستەرىمەن تۇراقتى قارىم-قاتىناس ورناتقان.
«ۋكراينانىڭ حالىقارالىق اۆياجەلىسىنە» تيەسىلى Boeing 737-800 ۇشاعى 8- قاڭتاردا تاڭەرتەڭ تەگەراننان كيەۆكە قاراي ۇشىپ شىققان كەزدە قۇلادى. ۇشاق بورتىندا بولعان 176 ادامنىڭ بارلىعى قازا بولدى. ولاردىڭ باسىم بولىگى - يران جانە كانادا ازاماتتارى. قازا بولعاندار اراسىندا 11 ۋكراينا ازاماتى بولعان. سونىمەن بىرگە اۋعانستان، گەرمانيا، شۆەتسيا، ۇلى بريتانيا ازاماتتارى دا بار. ۇشاق قۇلاۋىنىڭ سەبەبى انىقتالىپ جاتىر. اپات ورنىنان بورتتىق تىركەگىش تابىلعان، ءبىراق يران دەرەكتەردى وڭدەۋ ءۇشىن ونى قاي ەلگە تاپسىراتىنى بەلگىسىز. يراننىڭ ازاماتتىق اۆياتسيا باسقارماسى بورتتىق تىركەگىشتى امەريكالىق Boeing كومپانياسىنا بەرمەيتىنىن مالىمدەدى.
يراننىڭ تەلەارنالارى ۇشاقتىڭ «تەحنيكالىق سەبەپتەن» قۇلاۋى مۇمكىن ەكەنىن حابارلادى. قۇلاعان ۇشاق 2016-جىلى شىققان. اۋە كومپانيانىڭ پرەزيدەنتى ۇشاقتا تەحنيكالىق اقاۋ بولماعانىن ايتتى.
ۇشاق اپاتىنان كەيىن ۆلاديمير زەلەنسكي ومانعا ساپارىن كەيىنگە شەگەرىپ، ۋكرايناعا ورالدى.
«ازاتتىق»