سادريددين احمەدوۆ كانادادا «جىل جاڭالىعى» اتاندى
قازاقستان كاسىپقوي بوكس پاراقشاسىنىڭ مالىمەتىنشە، Netboxe.com 21 جاستاعى قازاقستاندىق بوكسشى، ءبىرىنشى ورتا سالماقتاعى BC Asia جانە WBC Youth World چەمپيونى سادريددين احمەدوۆتى جىل جاڭالىعى دەپ تانىعان.
«قازاقستاننىڭ ءبىرىنشى ورتا سالماقتاعى سپورتشىسى كانادادا وزىنە ارتىلعان ءۇمىتتى تولىق اقتادى. 2016-جىلعى جاس وسپىرىمدەر اراسىنداعى الەم چەمپيونى سادريددين احمەدوۆ 18 جاسىندا-اق جاسىنداي جارقىلداپ، اۋەسقويلار اراسىندا ۇزدىك اتاندى.
2018-جىلى سادريددين كاسىپقوي بوكسقا اۋىستى. بۇل كەزدە بوزبالا اۋەسقوي بوكستا 251 جەكپە-جەك وتكىزىپ، ونىڭ 241 ىندە جەڭىسكە جەتكەن بولاتىن. نۇرزات سابىروۆ جانە باتىر جۇكەمبايەۆ سەكىلدى قازاقستاندىق بوكسشىلارمەن جۇمىس ىستەپ ۇلگەرگەن كاميل ەستەفاننىڭ Eye of the Tiger Management اتتى كانادالىق كومپانياسى احمەدوۆتى قۋانا-قۋانا ءوز قامقورلىعىنا الدى.
قازىر سادريدديندى مارك رەمسي جاتتىقتىرىپ ءجۇر. جوعارى تەحنيكانى مەڭگەرگەن احمەدوۆتىڭ سوققىسى وتە كۇشتى. رەمسيدىڭ ايتۋىنشا، ونىڭ شاكىرتى بىرنەشە جىلدا الەم چەمپيونى اتانادى.
سادريددين وسى ۋاقىتقا دەيىن كاسىپقوي بوكستا وتكىزگەن 11 ايقاستىڭ بارلىعىندا جەڭىسكە جەتتى. قازاقستاندىق سپورتشىنىڭ داڭق جولىنداعى جەتىستىكتەرى تاڭعالدىرادى»، دەپ جازادى باسىلىم.