بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.
«جالپى، ءبىزدىڭ ەلىمىزدە شاعىن نەسيە ءارتۇرلى جاعدايدا بەرىلىپ جاتىر. شاعىن نەسيە 2019 -جىلى 17 مىڭ ادامعا بەرىلدى، 83 ميلليارد تەڭگە قاراستىرىلعان. بۇل جەردە 8 مىڭ ا ە ك - 20 ميلليون تەڭگەگە دەيىن نەسيە بەرۋ مۇمكىندىگى بار. ول نەسيە 5-7 جىلعا 6 پايىزدىق ستاۆكامەن بەرىلەدى. بۇل تەتىكتى ءبىزدىڭ ازاماتتار ءتيىمدى پايدالانىپ جاتىر»، - دەدى ءبىرجان نۇرىمبەتوۆ و ك ق- دا وتكەن باسپا ءسوز ءماسليحاتىندا.
ءمينيستردىڭ ايتۋىنا قاراعاندا، وسى جەڭىلدەتىلگەن نەسيەنىڭ ارقاسىندا ەلىمىزدە قوسىمشا 14 مىڭ جۇمىس ورنى اشىلعان.
«وسى شاعىن نەسيە بەرۋ جۇيەسىن جەتىلدىرۋ ماقساتىندا جۇمىستار جۇرگىزىلىپ جاتىر. ءبىز كوپبالالى جانە از قامتىلعان جانۇيالاردىڭ جۇمىسسىز جۇرگەن ازاماتتارىنا كەيبىر جەڭىلدىكتەردى قاراستىرىپ جاتىرمىز. بىرىنشىدەن، نەسيە بەرۋ مەرزىمى مىندەتتى تۇردە 7 جىلعا ۇزارتىلادى. سونىمەن بىرگە، پايىزدىق ستاۆكانى 6-دان 4 پايىزعا دەيىن تومەندەتىپ وتىرمىز. گرانتقا قاتىستى: بىزدە گرانتتىڭ بىلتىر ەكى ءتۇرى بولدى. ءبىرى 100 ا ە ك، ەكىنشىسى 200 ا ە ك كولەمىندە بەرىلىپ كەلدى. وسى جىلى گرانت سوماسىن 200 ا ە ك كولەمىندە قالدىرىپ وتىرمىز. ءبىراق، ونى الۋ ءۇشىن مىندەتتى تۇردە «باستاۋ- بيزنەس» بويىنشا وقىپ، سەرتيفيكات الۋ كەرەك بولاتىن. ول ءتارتىپ قالادى. ءبىراق، كوپبالالى جانە از قامتىلعان جانۇيالاردىڭ جۇمىسسىز جۇرگەن ازاماتتارىنا جەڭىلدىك قاراستىرىپ جاتىرمىز. ولارعا مىندەتتى تۇردە «باستاۋ- بيزنەس» باعدارلاماسى بويىنشا وقۋ مىندەتتى بولمايدى. بۇل جەردە الەۋمەتتىك كەلىسىم جاسالادى»، - دەدى ول.
اۆتور ايان بەكەن ۇلى