ۆولەيبول: قازاقستان قىزدارى وليمپياداعا ىرىكتەۋ كەزەڭىن جەڭىسپەن باستادى

نۇر-سۇلتان. قازاقپارات - تايلاندتىڭ ناكحونراتچاسيما قالاسىندا ۆولەيبولدان قىزدار اراسىنداعى توكيو وليمپياداسىنا ىرىكتەۋ ويىندارىن قازاقستان قۇراماسى جەڭىسپەن باستادى، دەپ حابارلايدى قازاقپارات ءتىلشىسى.

قازاقستاندىق ۆولەيبولشىلار يرانمەن كەزدەسۋىندە بارلىق سەتتە جەڭىسكە جەتتى. العاشقىسىندا ولار قارسىلاسىن 25:14 ەسەبىمەن جەڭسە، ودان كەيىن 25:16 ەسەبىمەن باسىم ءتۇستى. سوڭعىسىندا تاعى دا 25:14 ەسەبىمەن ايلاسىن اسىردى. وسىلايشا قازاقستاندىق ۆولەيبولشىلار ىرىكتەۋ كەزەڭىن جەڭىسپەن باستادى.

قازاقستان B توبىندا وڭتۇستىك كورەيا، يران جانە يندونەزيا قۇرامالارىمەن وينايدى. ەندى ولار 8- قاڭتاردا يندونەزيامەن شەبەرلىك بايقاسسا، 9- قاڭتاردا وڭتۇستىك كورەيامەن كەزدەسەدى. بۇگىن اتالمىش توپتا وڭتۇستىك كورەيا يندونەزيانى 3:0 ەسەبىمەن جەڭدى.

اتالمىش مەملەكەتتە A توبىندا تايلاند، قىتايلىق تايبەي، اۆستراليا قۇرامالارىمەن كەزدەسەدى. 11- قاڭتاردا جارتىلاي فينال وتسە، 12- قاڭتاردا فينال بولادى. جەڭىمپاز قۇراما وليمپياداعا قاتىسۋعا مۇمكىندىك الادى. ءدۇبىرلى دودادا الەمنىڭ ءار قيىرىنان كەلگەن 12 قۇرام باق سىنايدى.

قازاقستان قىزدارى 2008-جىلى وليمپيادا ويىندارىنا قاتىسىپ، وندا جالپى كوماندالىق ەسەپتە توعىزىنشى ورىن العان بولاتىن.