بۇل تۋرالى قازاق ۇلتتىق ونەر ۋنيۆەرسيتەتىنىڭ ۇجىمىمەن كەزدەسۋىندە پارلامەنت ءماجىلىسى الەۋمەتتىك- مادەني دامۋ كوميتەتىنىڭ ءتورايىمى گۇلشارا ءابدىقالىقوۆا ءمالىم ەتتى، دەپ حابارلايدى قازاقپارات ءتىلشىسى.
جۇزدەسۋ بارىسىندا دەپۋتات «پەداگوگ مارتەبەسى تۋرالى» زاڭىنىڭ نەگىزگى جاڭاشىلدىقتارى تۋرالى ايتىپ بەردى. سونىمەن قاتار، «قازاقستاننىڭ ەڭبەك سىڭىرگەن ۇستازى» ماراپاتىن تاعايىنداۋ شارالارى تۋرالى پىكىر الماسۋ بولدى. بۇل تۇرعىدا ۋنيۆەرسيتەت وقىتۋشىلارى اتالعان ماراپاتتى تاعايىنداۋدا بارىنشا اشىقتىقتى قامتاماسىز ەتۋ قادامدارىن پىسىقتاۋ كەرەكتىگىن اتاپ ءوتتى.
«وسىنداي قۇرمەتتى اتاقتار بەرىلگەندە اشىقتىقتى قامتاماسىز ەتۋ كەرەك. بۇل شارالاردا بارلىق كافەدرالار مەن دەكاناتتار قامتىلسا دەگەن تىلەك بار. ياعني لايىقتى ادامدى ءوزىمىز ارامىزدان سايلاساق دۇرىس بولار ەدى»، - دەدى ۋنيۆەرسيتەت ۇستازى.
ءوز كەزەگىندە گ. ءابدىقالىقوۆا اشىقتىقتى قامتاماسىز ەتۋدە وقىتۋشىلاردىڭ ۇسىنىستارىمەن كەلىسەتىنىن ايتتى.
«جالپى، «قازاقستاننىڭ ەڭبەك سىڭىرگەن ۇستازى» جانە «جىل ۇستازى» دەگەن ءتۇرلى ماراپاتتاۋلاردى بەرگەن كەزدە بارلىق شارالار اشىق بولۋى كەرەك. قازىرگى كەزدە ءبىلىم جانە عىلىم مينيسترلىگى ارنايى ەرەجە دايىنداپ جاتىر. وسى ورايدا ءسىزدىڭ ۇسىنىسىڭىزدى ەسكەرۋ كەرەكتىگىن ايتامىز»، - دەدى دەپۋتات.
ايتا كەتەيىك، «پەداگوگ مارتەبەسى تۋرالى» زاڭى بويىنشا حالىقارالىق كونكۋرستتار مەن جارىستاردىڭ جەڭىمپازدارىن، ءتۇرلى وليمپيادالار مەن سپورتتىق جارىستاردىڭ لاۋرەاتتارىن دايارلاعان پەداگوگتەرگە 3 لاۋازىمدىق جالاقىعا دەيىن ءبىرجولعى سىياقى تولەنەدى.
«قازاقستاننىڭ ەڭبەك سىڭىرگەن ۇستازى» مەملەكەتتىك ماراپات تاعايىندالادى جانە يەگەرلەرىنە 1000 ا ە ك مولشەرىندە ءبىرجولعى سىياقى بەرىلەدى.
اۆتور: رۋسلان عابباسوۆ