كومپانيا باسشىسىنىڭ ايتۋىنشا، ۇشاقتىڭ تەحنيكالىق جاعدايى جاقسى بولعان. سەبەبى اۋە كەمەسى قورشاۋدى بۇزعان كەزدە ەكى قوزعالتقىشى دا ىستەپ تۇرعان. ۇشقىش تا قاتەلىك جىبەرمەگەن. ويتكەنى ول ۇشاقتى اۋدارماي، شاسسيسىز جەرگە قوندىرا ءبىلدى. ال اپاتتىڭ نەگىزگى سەبەبى ىلەسپە اۋا اعىنى بولۋى ابدەن مۇمكىن. ونى «قۇيىندى ءىز» دەپ اتايدى. ۇشاقتار بىرىنەن سوڭ ءبىرى اۋەگە كوتەرىلگەندە الدىڭعىسى وزىنەن كەيىن قاتتى اينالىپ تۇراتىن اۋانىڭ ءىزىن قالدىرادى. وعان تۇسكەن كەيىنگى ۇشاق تەربەلىپ-شايقالىپ، باسقارۋعا باعىنباي كەتەدى. سول كۇنى Fokker 100-دىڭ الدىندا Airbus 321 ۇشقان كورىنەدى. ەكەۋىنىڭ اراسىندا 1 مينۋت ۋاقىت بولعان. ءبىراق ديسپەتچەر تاعى ءبىر مينۋتتاي كۇتىپ، Fokker 100-گە ۇشۋعا رۇقسات بەرىپتى.
كومپانيا باسشىسى اپاتتىڭ حرونولوگياسىن دا ايتىپ بەردى. ونىڭ مالىمەتىنشە، ۇشاق 10 مەترلىك بيىكتىككە كوتەرىلگەندە تەربەلە باستاعان. ۇشقىش تەپە-تەڭدىكتى ۇستاپ قالۋعا تىرىسقان. ول كەزدە شاسسيدى ينسترۋكسيا بويىنشا كىرگىزىپ قويعان. تەربەلىپ كەلە جاتقاندا ۇشاقتىڭ ءبىر قاناتى جەرگە تيگەن. ۆيدەودا الىستان وتتىڭ شىققانى دا سودان. ال ۇشقىش اۋەگە كوتەرىلە المايتىنىن تۇسىنگەندە ءشاسسيسىز قوندىرۋعا شەشىم قابىلداعان. سودان اۋەجايدىڭ قورشاۋىن بۇزعان. تاعى 40-50 مەتر بولعاندا توقتايتىن ەدى. ءبىراق قورشاۋعا جاقىن تۇرعان ۇيگە سوعىلدى.
ال ءسوز سوڭىندا ۇشاق اپاتى ءۇشىن ءوز باسىمەن جاۋاپ بەرۋگە دايىن ەكەنىن مالىمدەدى.
«كومپانيا كىنالى دەپ تانىلسا، مەن ءوز جىگىتتەرىمدى جىعىپ بەرمەيمىن. ولار ءۇشىن ءوزىم وتىرىپ كەلەمىن، مەنىڭ قاراماعىمداعى ادامداردىڭ ىشىندە بىرەۋى دە تۇرمەگە وتىرمايدى. قازا بولعان ۇشقىشتى دا كىنالاي المايمىز. سەبەبى ول ۇشاقتى باسقارا ءبىلدى. ونىڭ باسشىلارىن، ۇشۋ مەن ينجەنەرلىك قىزمەت بار، ولاردى دا جىعىپ بەرە المايمىن. Bek Air دەن بىرەۋ جاۋاپ بەرۋى كەرەك دەگەن ماسەلە تۋىنداسا، ءوزىم جاۋاپ بەرەمىن، كىنانى مويىنداۋعا دەيىن بارامىن. مەن تۇرمەگە وتىرۋعا دايىنمىن»، - دەيدى جۇماسۇلتانوۆ.
ەستەرىڭىزگە سالا كەتسەك، 27-جەلتوقسان كۇنى Bek Air اۋە كومپانياسىنىڭ «الماتى - نۇر- سۇلتان» باعىتىنداعى Fokker 100 ۇشاعى الماتى ماڭىنا قۇلاپ، 12 ادام قازا تاپقان بولاتىن.
sputniknews.kz