ەلوردا ءۇشىن ءبىر وقۋشىلار سارايى ازدىق ەتەدى - ەربول ىرگەباي
«بۇگىنگى تاڭدا وقۋشىلار سارايىندا 12 مىڭنان استام بالا ءبىلىم الادى. 125 ءتۇرلى سەكسيا مەن ۇيىرمە جۇمىس ىستەپ تۇر. ءبىزدىڭ وقۋشىلار سارايىنىڭ ەرەكشەلىگى: عىلىم مەن تەحنيكا، ونەر، مادەنيەت سالاسى جانە سپورت - ءۇش باعىت قاتار دامىپ كەلە جاتىر. سپورت سالاسىندا فۋتبول، حوككەي، سۋدا ءجۇزۋ، جەڭىل اتلەتيكا، بوكس، ساداق اتۋ، كۇرەس تۇرلەرىنەن ۇيىرمەلەر بولسا، ونەر سالاسىندا حورەوگرافيا، ءان ايتۋ، سۋرەت سالۋ، كەراميكا ۇيىرمەلەرىندە دە بىلىكتى ماماندار مەن مۇعالىمدەر جۇمىس ىستەيدى. بالالاردىڭ قىزىعۋشىلىعى جوعارى. تاياۋدا ءبىزدىڭ سارايدا «پرەزيدەنتتىك شىرشا» سالتاناتتى شاراسى وتكىزىلدى»، - دەدى ول ماجىلىسمەندەردىڭ وقۋشىلار سارايىن ارالاۋى كەزىندە تىلشىلەرگە.
ەربول ىرگەبايدىڭ ايتۋىنا قاراعاندا، وقۋشىلار سارايىندا روبوت تەحنيكاسى، كيبەرسپورت، ءتۇرلى تەحنيكالىق ورتالىقتار - اۆتومودەلدەۋ، سۋدا مودەلدەۋ، عارىشتىق تەحنيكانى مودەلدەۋ، حيميا- فيزيكا باعىتتارىندا ۇيىرمەلەرگە وقۋشىلار كوپ كەلەدى.
«ەندىگى ماقساتتىڭ ءبىرى - عىلىم مەن تەحنيكا باعىتىنداعى «تۋمو» ورتالىعىنا نەگىزدەلگەن «Sana» دەگەن باعدارلاما جاساعانبىز. ياعني، بالالار سيفرلىق تەحنولوگيالاردى دامىتۋعا بايلانىستى داعدىلارىن شىڭداپ، وزدەرى باعدارلاما جاساۋعا ۇيرەنەدى»، - دەدى ەربول ىرگەباي.
وقۋشىلار سارايىنىڭ ديرەكتورى ءوز سوزىندە قانداي ماسەلەلەر بارىن دا جاسىرعان جوق.
«قيىن پروبلەما بىزدە - باسسەيندە. قالا ءۇشىن ءبىزدىڭ باسسەين، ءتىپتى جالپى، ءبىر عانا وقۋشىلار سارايىنىڭ ءوزى قالاعا ازدىق ەتەدى. ويتكەنى، ەلوردانىڭ 1 ميلليوننان استام تۇرعىنى بار. جالپى، بەس كۇندىك وقۋ كۇنى بەكىتىلگەندىكتەن، بۇكىل قالا بويىنشا قوسىمشا ءبىلىم بەرۋ ۇيىمدارىن كوبەيتۋ كەرەك. سپورت بولسىن، ونەر نەمەسە تەحنيكا بولسىن بالالارعا ارنالعان ۇيىمداردى بارىنشا كوبەيتسە جاقسى بولار ەدى. قالاداعى ءاربىر اۋدانعا ءبىر- ءبىر باسسەين سالىپ قويسا جاقسى بولار ەدى. سەبەبى، باسسەيندى بۇگىنگى كۇنى بارلىعى قاجەت ەتەدى. ءتىپتى ومىرتقاسى قيسايعان بالالارعا دارىگەرلەر باسسەينگە تۇسۋگە كەڭەس بەرەدى. بىزدە 1200 ورىن. ودان ارتىق الا المايمىز. اتا- انالار بىزگە «بالالارىمىزدى باسسەينگە قابىلدامايسىڭدار» دەپ رەنجيدى. قالادا اقىلى باسسەيندەر بىلۋىمشە، قىمبات بولۋى كەرەك. بىزدە باسسەيندە ايلىق تولەم - 10 مىڭ تەڭگە»، - دەدى ول.
ەربول ىرگەباي باسسەين ءاردايىم تازالانىپ وتىرۋى كەرەكتىگىن، سانيتارلىق نورماسى بارىن، اپتاسىنا ءبىر رەت باسسەين تەكسەرىلىپ وتىراتىنىن ايتىپ ءوتتى.
«بىزدە 171 پەداگوگ جۇمىس ىستەيدى. قوسىمشا ءتۇرلى جەردەن (...) كەلىپ قىزمەت اتقاراتىندار بار. ەگەر قوسىمشا ءبىلىم بەرەتىن پەداگوگتاردىڭ جالاقىسى كوپ بولسا، ول بىزدە تۇراقتى جۇمىس ىستەي الار ەدى. جالاقى از بولعاندىقتان، الگى پەداگوگ ءبىزدىڭ وقۋشىلار سارايىنا كەلىپ، تۇستەن كەيىن مۋزىكا مەكتەبىنە ساباق بەرىپ كەتۋى مۇمكىن. وسىدان بارىپ ساپا تومەندەيدى. سوندىقتان، قوسىمشا ءبىلىم بەرەتىن پەداگوگتاردىڭ جالاقىسى تۇراقتالسا جاقسى بولار ەدى»، - دەدى ول.
وقۋشىلار سارايىندا ۇيىرمەلەر بيۋدجەتتىك جانە اقىلى دەپ ەكىگە بولىنەدى. 12 مىڭ بالانىڭ 8500-ى بيۋدجەتتىك توپتاردا (كوپبالالى نەمەسە از قامتىلعان وتباسىلاردىڭ بالالارى) وقيدى.
اۆتور: ايان بەكەن ۇلى