ق ر ۇكىمەت ۇيىندە 2020-2025-جىلدارعا ارنالعان جاڭا «نۇرلى جول» مەملەكەتتىك باعدارلاماسى بەكىتىلدى. ونىڭ اياسىندا رەسپۋبليكالىق ماڭىزى بار اۆتوموبيل جولدارىنىڭ قۇرىلىسى مەن رەكونسترۋكتسياسىنا قاتىستى 27 جوبانىڭ ىسكە اسىرىلۋى قاراستىرىلعان.
«قازاقستانداعى اۆتوموبيل جولدارىنىڭ جالپى ۇزىندىعى 95,9 مىڭ شاقىرىمدى قۇرايدى. «نۇرلى جول» مەملەكەتتىك باعدارلاماسىنىڭ ەكىنشى بەسجىلدىعىندا رەسپۋبليكالىق ماڭىزى بار جولداردىڭ قۇرىلىسى مەن رەكونسترۋكتسياسى اياسىندا 13 جاڭا جوبا ىسكە اسىرىلماق. جاڭا جوبالار اياسىندا ءتيىستى جۇمىستارمەن جولداردىڭ شامامەن 7 مىڭ شاقىرىمى قامتىلاتىن بولادى. سونىمەن قاتار، جوعارىدا اتالعان ۋاقىت ىشىندە 14 اۋىسپالى جوبانى دا جۇزەگە اسىرۋ قاراستىرىلعان. اۋىسپالى جوبالار اياسىندا پايدالانۋعا بەرىلەتىن جولداردىڭ ۇزىندىعى 3,8 مىڭ شاقىرىمدى قۇرايدى. وسىلايشا، قازاقستاندا 2025-جىلدىڭ سوڭىنا دەيىن رەسپۋبليكالىق ماڭىزى بار جولداردىڭ 10 مىڭ شاقىرىمىننان استام ۋچاسكەدە قوزعالىس اشىلادى دەپ كۇتىلۋدە»، - دەلىنگەن ق ر يندۋستريا جانە ينفراقۇرىلىمدىق دامۋ مينيسترلىگى مالىمەتىندە.
بۇل باعىتتاعى جۇمىستار 2025-جىلى جاقسى جانە قاناعاتتاندىرارلىق جاعدايداعى رەسپۋبليكالىق جولداردىڭ ۇلەسىن 100 پايىزعا دەيىن جەتكىزۋگە مۇمكىندىك بەرەدى.
ايتا كەتەيىك، 2020 جانە 2025-جىلداردىڭ ارالىعىندا جالپى پايدالانىمداعى وبلىستىق جانە اۋداندىق ماڭىزعا يە اۆتوموبيل جولدارىن دامىتۋدى قارجىلاندىرۋعا پاريتەتتى نەگىزدە رەسپۋبليكالىق جانە جەرگىلىكتى بيۋدجەتتەردەن شامامەن 1 تريلليون تەڭگە بولىنەتىن بولادى. اتالمىش قارجى ەسەبىنەن جەرگىلىكتى ماڭىزى بار جولداردىڭ 20 مىڭنان استام شاقىرىمى قالپىنا كەلتىرىلمەك. وسى رەتتە جاقسى جانە قاناعاتتاندىرارلىق جاعدايداعى جەرگىلىكتى جولداردىڭ ۇلەسى جەتكىزىلەدى دەپ جوسپارلانعان.