ءبىرقاتار مەملەكەت باسشىلارى قاسىم-جومارت توقايەۆتى جاڭا جىلمەن قۇتتىقتادى
رەسەي فەدەراتسياسىنىڭ پرەزيدەنتى ۆلاديمير پۋتين ءوزىنىڭ جاڭا جىلدىق قۇتتىقتاۋىندا 2019 -جىلدىڭ قازاقستان ءۇشىن ايتۋلى وقيعالارعا تولى بولعانىن، سونىڭ ىشىندە، بيلىكتىڭ كونستيتۋتسياعا سايكەس اۋىسقانىن جانە مەملەكەت باسشىسىنىڭ سايلاۋداعى ايقىن جەڭىسىن اتاپ وتكەن.
«بىزگە رەسەي مەن قازاقستان اراسىنداعى قالىپتاسقان قارىم-قاتىناستاردىڭ الەۋەتىن تولىقتاي ساقتاپ قالعانىمىز عانا ەمەس، سونداي-اق، ستراتەگيالىق سەرىكتەستىكتى، وداقتاستىقتى جانە تاتۋ كورشىلىكتى نىعايتۋ ءۇشىن بىرلەسكەن جۇمىستاردى جالعاستىرۋ ماڭىزدى. وعان ماسكەۋ مەن نۇر-سۇلتاننىڭ ەۋرازيالىق ەكونوميكالىق وداق، ۇجىمدىق قاۋىپسىزدىك شارت ۇيىمى، شانحاي ىنتىماقتاستىق ۇيىمى جانە باسقا دا كوپجاقتى قۇرىلىمدار اياسىنداعى كۇش-جىگەرىنىڭ ۇيلەسىم تابۋى تىڭ سەرپىن بەردى. كەلە جاتقان جاڭا جىلدا مەملەكەتتەرىمىز اراسىنداعى ىقپالداستىق قارىشتاپ داميتىنىنا سەنىمدىمىن»، -دەلىنگەن رەسەي كوشباسشىسىنىڭ قۇتتىقتاۋ حاتىندا.
قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ كەلە جاتقان جاڭا 2020 -جىلمەن قۇتتىقتاعان جەدەلحاتىندا قازاقستان حالقىنا بەيبىتشىلىك جانە باق-بەرەكە تىلەپ، ءوزىنىڭ شىنايى لەبىزىن ءبىلدىردى.
«جاڭا جىلدا ءبىزدىڭ بىرلەسكەن كۇش-جىگەرىمىز ەكىجاقتى ستراتەگيالىق سەرىكتەستىكتى جانە باۋىرلاس قىرعىز-قازاق حالىقتارىنىڭ يگىلىگى جولىنداعى وداقتاستىق بايلانىستاردى ودان ءارى دامىتۋعا ىقپال ەتەدى دەپ سەنەمىن»، -دەلىنگەن سوورونباي جەەنبەكوۆتىڭ جەدەلحاتىندا.
كورەيا رەسپۋبليكاسىنىڭ پرەزيدەنتى مۋن جە ين مەن ءبىرىنشى حانىم كيم جوڭ سۋك كورەي حالقىنىڭ اتىنان قاسىم-جومارت توقايەۆتى كەلە جاتقان جاڭا جىلمەن قۇتتىقتادى.
«كورەي تۇبەگىندە بەيبىتشىلىك ورناتۋ ىسىنە كورسەتكەن قولداۋلارىڭىز بەن ىنتىماقتاستىقتارىڭىز حالقىمىزدىڭ بولاشاققا دەگەن سەنىمىنىڭ قاينار كوزى سانالادى. كورەيا حالىقارالىق قوعامداستىقپەن بىرلەسىپ، ينكليۋزيۆتى جانە تۇراقتى الەم قالىپتاستىرۋ ءىسىن جالعاستىرا بەرەدى»، -دەلىنگەن جەدەلحاتتا.
سونىمەن قاتار، مەملەكەت باسشىسىنىڭ اتىنا ءوز قۇتتىقتاۋلارىن ازەربايجان رەسپۋبليكاسىنىڭ پرەزيدەنتى يلحام الييەۆ، اۋعانستان پرەزيدەنتى مۇحامماد اشراف عاني مەن ءبىرىنشى حانىم رۋلا عاني، ليتۆا پرەزيدەنتى گيتاناس ناۋسەدا مەن ءبىرىنشى حانىم ديانا ناۋسەدەنە، سينگاپۋردىڭ پرەمەر-ءمينيسترى لي شيان لۋن مەن ونىڭ جۇبايى، كانادانىڭ گەنەرال-گۋبەرناتورى جيۋلي پايەت، رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكو، دۇنيەجۇزىلىك ساۋدا ۇيىمىنىڭ باس ديرەكتورى روبەرتو ازيەۆەدو جولدادى.