تاباداعى مايدان وت شىقسا وتتى سۋمەن وشىرۋگە بولمايدى. كەيبىرى تاباعا اس سوداسىن دا سەۋىپ جاتادى، بۇل دۇرىس ەمەس. وت ودان سايىن ۇلعايىپ اينالاعا تاراۋى مۇمكىن. ەڭ دۇرىسى وت شىعىپ جاتقان تابانىڭ بەتىنە قاقپاق جابۋ. وتتەگى ازايعاندا وت دەرەۋ ءوزى وشەدى.
كوشەدە بىرەۋ شابۋىل جاساسا الدەكىم وزىنە قاۋىپ توندىرگەنىن بىلسە، كوبى بىردەن «كومەكتەسىڭدەر!» دەپ ايقايلايدى. قۇتقارۋشى مامانداردىڭ ايتۋىنشا مۇنداي سوزگە ەشكىم كومەككە كەلمەيدى. سەبەبى كوبى ءوز باسىن قاتەرگە تىككىسى كەلمەيدى. ال «ءورت شىعىپ جاتىر!» دەپ ايقايلاساڭىز، وزىڭىزگە كوپ ادامنىڭ نازارىن اۋدارتا الاسىز. سوندا بىرەۋى بولماسا، بىرەۋى كومەككە كەلۋى مۇمكىن.
جەدەلساتىدا جانىڭىزداعى ادامنان قاۋىپتەنسەڭىز، ەكىنشى قاباتتان ءتۇسىپ قالىڭىز دا، كەلەسى جەدەلساتىنى كۇتىڭىز.
تۇماندا، بوراندا كولىك دالادا قالىپ قويسا مۇنداي جاعدايدا قۇتقارۋشى قىزمەتكەرلەر مىناداي كەڭەس ايتادى: كولىك سالونىن ءار ءبىر ساعات سايىن ون مينۋتقا عانا جىلىتىپ وتىرىڭىز. وسى تەمپەراتۋراعا ءبىر ساعاتقا دەيىن شىداۋعا بولادى. ءسىزدى وزگەلەر بىردەن كورۋى ءۇشىن كولىكتىڭ فارىن جاعىپ وتىرماڭىز، ودان اككۋمۋلياتور تەز وشەدى. ونىڭ ورنىنا كولىك ىشىندەگى جارىقتى جاعىپ قويىڭىز، وسى جارىققا دا ىزدەۋشىلەردىڭ نە باسقا جولاۋشىلاردىڭ كوزى تۇسەدى.
مۇرىننان قان كەتسە، كوپ ادام باسىن جوعارى شالقايتىپ وتىراتىنىن بايقايمىز. بۇل دۇرىس ەمەس. سەبەبى قانعا شاشالىپ قالۋىڭىز نە جۇرەگىڭىز اينىپ كەتۋى مۇمكىن نەمەسە قان قىسىمى كوتەرىلىپ كەتۋى دە ىقتيمال. جەدەل جاردەم شاقىرساڭىز، ول كەلگەنشە مۇرنىڭىزعا تىعىن (تامپون) سالىپ قويساڭىز، ول قاندى جاقسى سورادى.
Massaget.kz