بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي سايتىنان ءمالىم بولدى.
قولدانىستاعى ەرەجەلەرگە سايكەس جەكە كومەكشىلەردىڭ قىزمەتتەرى ۇكىمەتتىك ەمەس ۇيىمدار ارقىلى نەمەسە جەكە كومەكشىلەر مەن جۇمىسپەن قامتۋدىڭ وڭىرلىك باسقارمالارى اراسىندا تىكەلەي كەلىسىم جاساسۋ ارقىلى كورسەتىلۋى مۇمكىن.
ەلىمىزدىڭ كوپتەگەن ايماقتارىندا بۇل قىزمەتتەر ۇيىمداستىرۋشىلىق جانە اقپاراتتىق فۋنكسيالاردى جۇزەگە اسىراتىن ۇ ە ۇ ارقىلى كورسەتىلەدى.
الايدا، جەكەلەگەن ۇەۇ جۇمىسىنىڭ ساپاسى مۇگەدەكتىگى بار ادامدار تاراپىنان سىنعا تۇسەدى. ولاردىڭ ايتۋىنشا، ۇ ە ۇ كەلىسىمشارتتىق مىندەتتەمەلەردى ادال ورىندامايدى، اكىمشىلىك شىعىندارعا قاراجاتتىڭ ۇستاپ قالادى جانە قىزمەت كورسەتۋ تىزبەگىندەگى قوسىمشا بۋىن بولىپ تابىلادى.
«قازىرگى ۋاقىتتا وبلىس اكىمدىكتەرى قىزمەت الۋشىلارعا ولار ءۇشىن قاي ءادىس قولايلى ەكەنىن انىقتاۋ ماقساتىندا ساۋالناما جۇرگىزۋدە. الدىن-الا مالىمەتتەر بويىنشا، مۇگەدەكتىگى بار ادامداردىڭ كوپشىلىگى جۇمىسپەن قامتۋ بولىمدەرىمەن تىكەلەي جۇمىس جاساۋ تۋرالى ۇسىنىستى قولدايدى. سوندىقتان ءبىز جەكە كومەكشىلەرگە قىزمەت كورسەتۋدىڭ قولدانىستاعى ەرەجەلەرىنە تۇزەتۋلەر ەنگىزۋدى جوسپارلاپ وتىرمىز جانە 2020-جىلدىڭ قاڭتارىنان باستاپ مۇگەدەكتىگى بار ادامارعا وسى قىزمەتتەردى الۋ ءتاسىلىن تاڭداۋعا مۇمكىندىك بەرەمىز»، - دەدى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەرلان اۋكەنوۆ.
ايتا كەتۋ كەرەك، قازاقستاندا ءبىرىنشى توپتاعى مۇگەدەكتەردىڭ سانى 24 مىڭنان اسادى، ولار جەكە كومەكشىلەردىڭ قىزمەتىن الادى. بۇل قىزمەتتەر مۇگەدەكتەردىڭ قۇقىقتارى تۋرالى كونۆەنتسياعا سايكەس مۇگەدەكتىگى بار ادامداردى قوعامعا قوسۋ جانە ينتەگراتسيالاۋ ماقساتىندا ۇسىنىلادى. جەكە كومەكشىلەردىڭ قىزمەتتەرىنە مۇگەدەكتىگى بار ادامدى جۇمىسقا، ءبىلىم بەرۋ مەكەمەلەرىنە، مەملەكەتتىك، الەۋمەتتىك، مەديتسينالىق جانە باسقا وبەكتىلەرگە بارعان كەزدە الىپ ءجۇرۋ كىرەدى.