ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ وسىلاي دەدى، دەپ حابارلايدى قازاقپارات ءتىلشىسى.
«سۋ رەسۋرستارىن باسقارۋ سالاسىنا بايلانىستى مىنا ماسەلەلەرگە نازارلارىڭىزدى اۋدارعىم كەلەدى. بىرىنشىدەن، ترانسشەكارالىق وزەندەردەگى سۋ دەڭگەيىنىڭ ازايۋ قاۋپى بار. ورتاشا كوپ جىلدىق سۋ اعىنى 100 تەكشە شاقىرىمدى قۇرايدى. ونىڭ ىشىندە 44 پايىزى كورشى ەلدەردەن كەلەدى. سۋ تاپشىلىعىن بولدىرماۋ ءۇشىن بىزگە قىتايدان اعاتىن ترانسشەكارالىق وزەندەردە سۋ ءبولۋدى ءادىل جانە ءوزارا ءتيىمدى كەلىسىم قۇرىپ، سونداي-اق ورتالىق ازيا ەلدەرىمەن (وزبەكستان، قىرعىزستان، تاجىكستان) جانە رەسەي فەدەراتسياسىمەن ەكى جاقتى ىنتىماقتاستىقتى نىعايتۋ كەرەك»، - دەدى مينيستر و ك ق- دا وتكەن باسپا ءسوز ءماسليحاتىندا.
ونىڭ ايتۋىنشا، ءتيىستى ەكى جاقتى كوميسسيالار جۇمىس ىستەپ، كەلىسسوزدەر تۇراقتى نەگىزدە جۇرگىزىلۋدە.
«ىسىراپ بوپ جاتقان سۋ مولشەرىن ازايتۋ ءۇشىن ارنالاردى جوندەۋ جانە سۋ رەسۋرستارىن اۆتوماتتى تۇردە باسقارۋدى ەنگىزۋ تالاپ ەتىلەدى. وسىلاي، ەگىسكە دەيىن تاسىمالداۋ كەزىندە سۋ ىسىرابىن ازايتۋ ماقساتىندا گيدرومەليوراتيۆتىك جۇيەلەردى قايتا قۇرۋ ءىس-شارالارى بەلسەندى تۇردە جۇرگىزىلۋدە»، - دەدى ول.
ماعزۇم مىرزاعاليەۆ ەلىمىزدەگى ىشكى جانە سىرتقى سۋ قاۋىپسىزدىگىن ەسكەرە وتىرىپ، سۋ رەسۋرستارىن باسقارۋدىڭ 2020-2030-جىلدارعا ارنالعان مەملەكەتتىك باعدارلاماسىن جانە سۋ سالاسىن سيفرلاندىرۋ تۇجىرىمداماسىن ازىرلەۋ جۇمىسى باستالعانىن ايتادى. باعدارلامانى كەلەسى جىلى بەكىتۋ جوسپارلانىپ وتىر.