بۇل اقپاراتتى ەۋروكوميسسيانىڭ ۆيتسە-پرەزيدەنتى ماروش شەفچوۆيچ بەرليندەگى باسپا ءسوز جيىنىندا ايتتى. گەرمانيا مەن ەۋرووداق وكىلدەرىنىڭ قاتىسۋىمەن بولعان كەزدەسۋ توعىز ساعاتقا سوزىلدى دەپ حابارلادى dpa اگەنتتىگى.
رەسەيدىڭ ەنەرگەتيكا ءمينيسترى الەكساندر ناۆاكتىڭ سوزىنشە، تاراپتار بولاشاق كەلىسىمنىڭ شارتتارى جازىلعان حاتتامانى ازىرلەگەن. ۋكراينانىڭ ەنەرگەتيكا ءمينيسترى الەكسەي ورجەل حاتتاما جايلى اقپاراتتى راستادى.
شەفشوۆيچتىڭ سوزىنە قاراعاندا كەلىسىم-شارت 20- جەلتوقساندا ماسكەۋ مەن كيەۆتە تالقىلانباق. ەۋروكوميسسيانىڭ ۆيتسە-پرەزيدەنتى جىل سوڭىنا دەيىن كەلىسىمگە قول قويىپ ۇلگەرەتىن شىعارمىز دەپ ءۇمىت ءبىلدىردى.
Dpa اگەنتتىگىنىڭ جازۋىنشا، تاراپتار ۋكراينا ارقىلى ەۋروپاعا تاسىمالداناتىن گاز كولەمى مەن بولاشاق كەلىسىمنىڭ مەرزىمى بويىنشا كەلىسىمگە كەلگەن. ءبىراق ازىرگە ونىڭ جاي-جاپسارى ايتىلمايدى.
قازىرگى كەلىسىم-شارتتىڭ مەرزىمى 2019-جىلى 31- جەلتوقساندا اياقتالادى. بۇل كەلىسىمدى ۇزارتۋ ماسەلەسىن رەسەي مەن ۋكراينا باسشىلارى پاريجدە ەڭ العاش رەت كەزدەسكەن كەزدە دە تالقىلاعان، ءبىراق تۇبەگەيلى كەلىسىمگە كەلە الماعان.
«ازاتتىق»