ىستانبۇل مەرى قازاقستاندى تاۋەلسىزدىك كۇنىمەن قۇتتىقتادى

ىستانبۇل. قازاقپارات - تۇركيانىڭ ىستانبۇل قالاسىنىڭ مەرى ەكرەم يماموعلۋ قازاقستان حالقىن تاۋەلسىزدىك كۇنىمەن قۇتتىقتادى، دەپ حابارلايدى قازاقپارات ءتىلشىسى.

«16 ميلليون سايلاۋشىلارىممەن بىرگە باۋىرلاس قازاقستان حالقىن تاۋەلسىزدىك كۇنىمەن قۇتتىقتايمىن. ەكى مەملەكەت بولساق تا، ءوزىمىزدى باۋىرلاس حالىقتار رەتىندە كورەتىنىمىز ءبىزدى وتە باقىتتى ەتەدى. قازاقستاننىڭ تاۋەلسىزدىك الۋى ءبىز ءۇشىن وتە قۋانىشتى وقيعا بولدى. مەن ول كەزدە ۋنيۆەرسيتەت ستۋدەنتى ەدىم. سول كەزدە ءبارىمىزدىڭ قۋانىشتان توبەمىز كوككە جەتكەندەي ەدى. تۇركيا - قازاقستاننىڭ تاۋەلسىزدىگىن العاش تانىعان مەملەكەت. وسىلايشا، تۇركيا دۇرىس جانە وڭ قادام جاسادى. قازاقستاننىڭ تۇڭعىش پرەزيدەنتى نۇرسۇلتان نازاربايەۆتى جانە تاۋەلسىزدىككە قول جەتكىزۋگە سەبەپكەر بولعان بارلىق ادامداردى بۇگىنگى كەرەمەت كۇن - تاۋەلسىزدىكتىڭ 28 جىلدىعىمەن قۇتتىقتايمىن. دوستارمىزدى ىستانبۇلعا جانە ەلىمىزگە شاقىرامىز. وسى دوستىعىمىزبەن ءتۇرلى باعىتتاعى بايلانىستارىمىزدى، جۇمىستارىمىزدى نىعايتا بەرەمىز دەپ ويلايمىن»، - دەدى قالا باسشىسى قازاقستان رەسپۋبليكاسىنىڭ تاۋەلسىزدىك كۇنىنە ارنالعان مەرەكەلىك كونسەرتتە.

ايتا كەتەيىك، قازاقستان تاۋەلسىزدىگىنىڭ 28 جىلدىعى تۇركيانىڭ بىرنەشە قالاسىندا تويلاندى. تاۋەلسىزدىك تويى 11- جەلتوقساندا قازاقستاننىڭ تۇركياداعى ەلشىلىگىنىڭ رەسمي قابىلداۋىمەن باستالدى. رەسمي قابىلداۋعا نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ قازاق وركەسترى مەن «قورقىت اتا» كونە اسپاپتار ساز توبى ارنايى كەلدى.

50 دەن استام قازاقستاندىق ونەرپاز انكارا، نيدە، بۋرسا، نيدە، ساكاريا جانە تۇركيانىڭ ەڭ تانىمال تۋريستىك ايماعى - كاپپادوكيادا ونەر كورسەتتى جانە سوڭعى كونسەرت بۇگىن ىستانبۇل قالاسىندا ءوتتى.

كونسەرتتە قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلى ىستانبۇل مەرىنە قوبىز بەن قامشى سىيلادى.