ءبىرقاتار مەملەكەت ەلشىلەرى قازاقستان حالقىن تاۋەلسىزدىك كۇنىمەن قۇتتىقتادى
كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى كيم دەسيكتىڭ ايتۋىنشا، قازاقستان بۇگىنگى كۇنى ماڭىزدى جەتىستىكتەرگە قول جەتكىزگەن جەتەكشى ەلدەردىڭ ءبىرى بولىپ وتىر.
«سىزدەردى قازاقستان رەسپۋبليكاسىنىڭ تاۋەلسىزدىك كۇنىمەن شىن جۇرەكتەن قۇتتىقتايمىن! 1991-جىلى تاۋەلسىزدىك العاننان كەيىن قازاقستان ايتارلىقتاي جەتىستىكتەرگە جەتتى. بۇگىنگى تاڭدا قازاقستان ورتالىق ازياداعى گۇلدەنگەن ءارى دامىعان مەملەكەت رەتىندە عانا ەمەس، بۇكىل الەمدى بەيبىتشىلىك پەن تۇراقتىلىققا جەتەلەيتىن ۇلگىلى ەل رەتىندە جوعارى باعالانادى. مەن ۇكىمەت پەن قازاقستان حالقىنا كەرەمەت تابىستارى ءۇشىن زور قۇرمەتىمدى بىلدىرەمىن!» - دەيدى كيم دەسيك.
ەلشىنىڭ ايتۋىنشا، قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆ ەرىك-جىگەرمەن، تەرەڭ دانالىقپەن قازىرگى قازاقستاندى قۇرعان. العاشقى جىلدارى ەلدىڭ بولاشاعى ءۇشىن جاڭا ۇكىمەتتى جاساقتاعان.
«مەن قازاقستان حالقىنىڭ تاۋەلسىزدىك العاننان كەيىنگى زاماناۋي مەملەكەت قۇرۋ پروتسەسىندەگى سەنىمىن بايقايمىن. پرەزيدەنت قاسىم-جومارت توقايەۆ باسقاراتىن جاڭا ۇكىمەت جاڭا كوزقاراس پەن وركەندەۋ ساياساتى ارقىلى ەلدى ۇلتتىق بىرلىك پەن جارقىن بولاشاققا جەتەلەيتىنىنە كۇمانىم جوق»، - دەدى ەلشى.
ول سونىمەن قاتار 1992-جىلى وڭتۇستىك كورەيا مەن قازاقستان اراسىندا ديپلوماتيالىق قاتىناستار ورناعالى بەرى ەكىجاقتى قاتىناستار ءتۇرلى سالالاردا، سونىڭ ىشىندە ساياسات، ەكونوميكا جانە مادەنيەتتە بەكىپ كەلە جاتقانىن قوستى.
«قازان ايىندا ەكى ەل اراسىنداعى ساۋدا-ساتتىق 3,3 ميلليارد دوللارعا جەتتى. بۇل ديپلوماتيالىق قاتىناستار ورناعان كەزدەگى 10 ميلليون دوللارمەن سالىستىرعاندا 330 ەسە كوپ كورسەتكىش. كورەيا ينۆەستيتسياسى 4 ميلليارد دوللارعا جەتتى. اتاپ ايتقاندا، بيىل ەكى ەل اراسىنداعى ساۋدا ايتارلىقتاي ءوستى. ەكى ەل اراسىنداعى قاتىناستار وتە تىعىز دامىپ كەلەدى. بۇل رەتتە تۇڭعىش پرەزيدەنت نۇرسۇلتان نازاربايەۆتىڭ باسشىلىعى شەشۋشى ءرول اتقاردى»، - دەدى ەلشى.
ەلشى ۇستىمىزدەگى جىلدىڭ ءساۋىر ايىندا قازاقستان پرەزيدەنتى قاسىم-جومارت توقايەۆ پەن كورەيا رەسپۋبليكاسىنىڭ پرەزيدەنتى مۋن چجە ين ەكى ەل اراسىنداعى جاڭا ەكونوميكالىق ىنتىماقتاستىقتىڭ «سالقىن سامال» اتتى جاڭا باعدارلاماسىنا قول قويعانىن ەسكە سالدى.
ال قىتاي حالىق رەسپۋبليكاسىنىڭ توتەنشە جانە وكىلەتتى ەلشىسى چجان سياو ەلىمىزدىڭ تاۋەلسىزدىك جىلدارىنداعى تابىستارىن ءتىزىپ ءوتتى.
«تاۋەلسىزدىك كۇنى بارلىق قازاقستاندىق ءۇشىن وتە ماڭىزدى. تاۋەلسىزدىك جىلدارىندا قازاقستان الەۋمەتتىك-ەكونوميكالىق دامۋدا دا، دەموكراتيالىق جانە ساياسي وزگەرىستە دە تاڭعالارلىق جەتىستىكتەرگە جەتتى. بۇل جەتىستىكتەرمەن بارشا قازاقستاندىق ماقتانۋعا تولىق قۇقىلى. ەلباسىنىڭ دانا باسشىلىعىنىڭ، ساياسي كورەگەندىگىنىڭ ارقاسىندا قازاقستان قارقىندى، ۇزاق مەرزىمدى دامۋ جولىنا ءتۇستى. بۇگىنگى تاڭدا قازاقستان - ەۋرازيا كونتينەنتىندەگى ەڭ گۇلدەنگەن، تۇراقتى، قارقىندى دامىپ كەلە جاتقان مەملەكەت. وسى جىلدار ىشىندە قازاقستان بەيبىتشىلىكتى سۇيەتىن، جاۋاپتى مەملەكەت رەتىندە حالىقارالىق ارەنادا ءوزىنىڭ بەدەلىنە يە بولدى. ايماقتىق داعدارىستاردى شەشۋگە ۇلكەن ۇلەس قوستى. مىسالى، استانا پروتسەسى شەڭبەرىندەگى كەلىسسوزدەر الاڭىن ۇسىندى»، - دەدى چجان سياو.
سونداي-اق، ەلشى قازاقستان حالقىن تاۋەلسىزدىك كۇنىمەن قۇتتىقتادى.
«وسى مۇمكىندىكتى پايدالانىپ، مەن بارشا قازاقستان حالقىن مەرەكەمەن قۇتتىقتاي وتىرىپ، بارىنە بەيبىتشىلىك، باقىت، بەرەكە، ال رەسپۋبليكاعا وركەندەۋ مەن تۇراقتىلىق تىلەيمىن»، - دەدى چ. سياو.
ءۇندىستاننىڭ قازاقستان رەسپۋبليكاسىنداعى ەلشىسى پرابحات كۋمار حالقىمىزدى قۇتتىقتاي وتىرىپ، ەكى ەل اراسىنداعى ىنتىماقتاستىقتىڭ نىعايا تۇسكەنىن اتاپ ءوتتى.
«قازاقستان حالقىن تاۋەلسىزدىكتىڭ 28 جىلدىعىمەن قۇتتىقتاعانىما وتە قۋانىشتىمىن. ءۇندىستان مەن قازاقستان اراسىنداعى قاتىناستار عاسىرلار بويعى تاريحي جانە مادەني بايلانىستاردىڭ بەرىك نەگىزىنە قۇرىلعان. ءبىزدىڭ ەلدەر ەكىجاقتى جانە كوپجاقتى ىنتىماقتاستىقتى دامىتتى، بۇل ءوز كەزەگىندە ستراتەگيالىق سەرىكتەستىككە اينالدى. ءبىزدىڭ مەملەكەتتەر اراسىنداعى ىنتىماقتاستىق ودان ءارى نىعايىپ، دامي بەرەتىنىنە سەنىمدىمىن. وسى مۇمكىندىكتى پايدالانا وتىرىپ، مەن وسى ماڭىزدى كۇنى قازاقستان حالقىنا ەڭ جاقسى تىلەكتەرىمدى جەتكىزگىم كەلەدى. قازاقستان ارى قاراي دا وركەندەپ، ەكى ەل اراسىنداعى قارىم-قاتىناس نىعايا تۇسەر دەپ سەنىم بىلدىرگىم كەلەدى»، - دەدى پرابحات كۋمار.
فرانسيانىڭ قازاقستانداعى ەلشىسى فيليپپ مارتين دە قۇتتىقتاۋدان تىس قالعان جوق.
«فرانسيا تاۋەلسىزدىك كۇنىن اتاپ وتپەيدى. ويتكەنى مەملەكەت 1500 جىلدان بەرى تاۋەلسىز. ال قازاقستاننىڭ تاۋەلسىز مەملەكەت بولعانىنا 28 جىل تولدى. بوستاندىق، تاۋەلسىزدىك، دەموكراتيا جانە ەگەمەندىك -تاۋەلسىزدىك ۇعىمىن اركىم وزىنشە تۇسىنەدى. قازاقستاندىق دوستار، مەن سىزدەردىڭ ەلدەرىڭىز ءبىزدىڭ ەل سياقتى ءارقاشان تاۋەلسىز بولعانىن، تاۋەلسىزدىكتىڭ جەمىسىن كورۋلەرىڭىزدى تىلەيمىن»، - دەدى فيليپپ مارتين.
ايتا كەتسەك، بۇگىن قازاقستان رەسپۋبليكاسىنىڭ تاۋەلسىز ەل اتانعانىنا 28 جىل تولىپ وتىر.