قازاق ءتىلى وركەنيەتتىڭ وي- پىكىرىن قالىپتاستىراتىن تىلدەرمەن قاتار تۇرۋى كەرەك - مەملەكەت باسشىسى
بۇل تۋرالى بۇگىن اقوردادا ءبىرقاتار ازاماتقا مەملەكەتتىك ناگرادالاردى تاپسىرۋ بارىسىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«قازاقستان ەلباسى ۇسىنعان «رۋحاني جاڭعىرۋ« جولىمەن العا قادام باسۋدا. ەڭبەكقورلىق - الەم ەلدەرىن تابىسقا جەتەلەيتىن باستى يگىلىك. سوندىقتان ءبىز دۇنيەجۇزىنە ەڭبەكقور ۇلت رەتىندە تانىلۋىمىز كەرەك. مۇقتاج جاندارعا كورسەتىلەتىن كومەك پەن ماسىلدىقتىڭ ارا- جىگىن اجىراتا بىلگەن ءجون. ءبىز كۇندەلىكتى ومىردە ىسىراپشىلدىقپەن وزگەگە ەلىكتەۋشىلىكتەن ارىلۋىمىز كەرەك. اتا- بابامىز دارىپتەگەن قاناعات پەن ۇنەمشىلدىكتى جاڭا بۋىننىڭ رۋحاني تىرەگىنە، اسىل قاسيەتىنە اينالدىرۋ قاجەت» ، - دەدى مەملەكەت باسشىسى.
ق ر پرەزيدەنتى بىلىمگە دەگەن قۇشتارلىق ازاماتتارىمىزدى عىلىم مەن تەحنولوگيا سالاسىنداعى زور جەتىستىكتەرگە جەتەلەۋى ءتيىس ەكەندىگىن باسا ايتتى.
«قازاق ءتىلى وركەنيەتتىڭ وي- پىكىرىن قالىپتاستىراتىن، ونەرتاپقىشتار مەن عالىمدار سويلەيتىن تىلدەرمەن قاتار تۇرۋى كەرەك. سوندا عانا انا ءتىلىمىز ۇلتارالىق قاتىناس تىلىنە اينالادى» ، - دەدى قاسىم- جومارت توقايەۆ.