بۇل تۋرالى ق ر ءى ءى م اكىمشىلىك پوليتسيا كوميتەتى يۋۆەنالدى پوليتسيا باسقارماسىنىڭ باسشىسى اسەت وسپانوۆ ايتىپ بەردى.
«اتا-انا قۇقىعىنان ايىرۋ - ءبىر كۇندىك جۇمىس ەمەس، ۇزاق پروتسەسس. ونىڭ باستى سەبەبى - اتا-انانىڭ ءوز مىندەتىن دۇرىس اتقارماۋى. ياعني، ولار بالا تاربيەسىمەن اينالىسپايدى، بالاعا نەمەسە جاس وسپىرىمگە وتباسىندا قىسىم مەن زورلىق-زومبىلىق كورسەتەدى، بالانىڭ اتا-اناسى ىشىمدىك قولدانادى جانە باسقالار. وسى اتالعان تەرىس ارەكەتتەردىڭ بارلىعى بالانىڭ دۇرىس دامۋىنا كەرى اسەرىن تيگىزەدى. سونىڭ سالدارىنان جىل سايىن قازاقستاندا 1000 عا جۋىق اتا-انا ءوز قۇقىعىنان ايىرىلادى» - دەدى ءا. وسپانوۆ.
باسقارما باسشىسى اتا-انا قۇقىعىنان ايىرۋ پروتسەسىنىڭ قالاي جۇرەتىنىن باياندادى.
«ەڭ الدىمەن ءوز مىندەتىن دۇرىس اتقارماي جۇرگەن اتا-انالاردى ەسەپكە قويامىز. سول وتباسىمەن پروفيلاكتيكالىق جۇمىس ىستەپ، تۇرعىلىقتى ءۇي جايىن تەكسەرەمىز. ءتيىستى جۇمىستاردان سوڭ ولارمەن جەكە اڭگىمەلەسىپ، اتا-انالارعا نۇسقاۋلىق بەرىلەدى. كەلەسى كەزەڭ - اكىمشىلىك قۇقىق بۇزۋ كودەكسىنىڭ 127-بابى بويىنشا (اتا-انالىق مىندەتىن ورىنداماۋ) جازاعا تارتىلادى. وسىنداي جۇمىستاردان ناتيجە شىقپاسا، بۇل وتباسىنىڭ ماسەلەسى ارنايى كوميسسيادا قارالىپ، كوميسسيا شەشىمىمەن اتا-انا ءوز قۇقىعىنان ايىرىلادى»، - دەدى ول.