بەيجىڭدە قۇرمانعازى اتىنداعى وركەستر كونسەرت بەردى

بەيجىڭ. قازاقپارات - قۇرمانعازى اتىنداعى قازاق مەملەكەتتىك حالىق اسپاپتارى اكادەميالىق وركەسترى قىتاي استاناسىندا ۇلتتىق ورىنداۋ ونەرى ورتالىعىنىڭ (ۇلكەن ۇلتتىق تەاتر) ساحنالارىنىڭ بىرىندە ونەر كورسەتتى، دەپ حابارلايدى «قازاقپارات» ح ا ا مەنشىكتى ءتىلشىسى.

«ۇلى دالا سازى» كونسەرتى «الەمدىك مۋزىكالىق توپتامالار» جوباسى اياسىندا ءوتتى. كونسەرتتىك باعدارلامادا قازاق جانە شەتەلدىك كومپوزيتورلاردىڭ تۋىندىلارى: قۇرمانعازى، تۇركەش، ن. تىلەنديەۆ، داۋلەتكەرەي، اباي، موتسارت، برامسا جانە تاعى باسقالاردىڭ شىعارمالارى كورەرمەنگە پاش ەتىلدى.

ق ح ر- داعى ق ر ەلشىسى عابيت قويشىبايەۆتىڭ اتاپ وتۋىنشە، «ءبىز ەكىجاقتى مادەني بايلانىستى دامىتۋعا ۇلكەن ءمان بەرەمىز. قۇرمانعازى وركەسترىنىڭ شىعارماشىلىق ۇجىمى وسى ماڭىزدى حالىقارالىق مۋزىكالىق شاراعا قاتىسقانىنا وتە قۋانىشتىمىز. قىتايلىق كورەرمەندەر قازاقستاننىڭ باي مادەنيەتىمەن تانىسا الدى».

«قىتاي حالقى ءبىزدى، مۋزىكامىزدى جانە قازاق كومپوزيتورلارىنىڭ تۋىندىلارىن جاقسى جانە جىلى قابىلدادى. اسىرەسە، «دۋدار-اي» حالىق ءانى قاتتى ۇنادى»، - دەپ وي ءبولىستى وركەستر ءسوليسى فارحات كۋبيەۆ.