قازاقستانداعى ۆاكسينا ساپاسى قالاي تەكسەرىلەدى

نۇر-سۇلتان. قازاقپارات - دارىلىك زاتتار مەن مەديتسينالىق بۇيىمداردى ساراپتاۋ ۇلتتىق ورتالىعىنىڭ باس ديرەكتورى ارنۇر نۇرتايەۆ ەلىمىزدەگى ۆاكسينا ساپاسىنا قاتىستى پىكىرلەرگە جاۋاپ بەردى، دەپ حابارلايدى قازاقپارات ءتىلشىسى.

«ءبىزدىڭ مەملەكەتتىك رەەستردە ۆاكسينانىڭ 64 اتاۋى تىركەلگەن. ولار ەڭ الدىمەن بەلگيا، فرانسيا، نيدەرلاندى سىندى ەۋروپا ەلدەرىندە جانە ا ق ش، رەسەي، قىتاي، ءۇندىستان، كورەيا، يزرايلدە وندىرىلگەن. ساپاسىنا كەلسەك، ۆاكسينالاردى تىركەۋگە الاردا ەكى دەڭگەيلى تەكسەرۋدەن وتكىزەمىز. ءبىرىنشى كەزەڭدە - تىركەۋگە كەلىپ تۇسكەن بارلىق قۇجاتتارعا ساراپتاما جۇرگىزىلەدى. ەكىنشى كەزەڭدە - قۇجاتتارى تەكسەرىلگەن ءاربىر ۆاكسيناعا زەرتحانالىق تالداۋ جاسالادى. زەرتحانالىق تالداۋ دەگەنىمىز - ۇلكەن پروتسەسس. وندا ءاربىر ۆاكسينانىڭ ساپاسى مەن قاۋىپسىزدىگى ءجىتى تەكسەرىلەدى.

ورتالىق ازيا اۋماعىندا قازاقستاندىق زەرتحانا العاش رەت ەۋروپا ديرەكتوراتىنىڭ زەرتحانا ساپاسى بويىنشا اككرەديتاتسياسىن الدى.

«ءبىزدىڭ زەرتحانا جىلىنا 3 رەت ساپا بويىنشا ەۋروپالىق ديرەكتوراتتىڭ اككرەديتاتسياسىنان وتەدى. ەۋروپالىق ورگاندار ءبىزدىڭ دەرەكتەرىمىزگە سەنىم ارتادى. تىركەۋدەن وتكەن ۆاكسينانىڭ ءاربىر پارتياسى قازاقستان رەسپۋبليكاسىنىڭ اۋماعىنا كىرەردە مىندەتتى ساپا مەن قاۋىپسىزدىك باعالاۋىنان وتەدى. ەگەر ۆاكسينا حالىقارالىق ۇيىمدار ارقىلى الىنسا، دۇنيەجۇزىلىك دەنساۋلىق ساقتاۋ ۇيىمىنىڭ دەڭگەيىندە تەكسەرۋدەن وتەدى»، - دەدى ارنۇر نۇرتايەۆ.

قازىرگى ۋاقىتتا قازاقستاننىڭ ۇلتتىق كۇنتىزبەسىندە ددسۇ 20 ۆاكسينانى قايتا بەكىتتى.

«20 ۆاكسينا 28 ميلليارد تەڭگەدەن استام سوماعا ساتىپ الىنادى جانە ءبىر جاسقا دەيىنگى 370 مىڭ بالانى قامتيدى. تىركەۋدەن كەيىنگى باقىلاۋدى فارماتسيالىق قاداعالاۋ جۇيەسى جۇرگىزەدى. نارىقتاعى ەكپەدەن قانداي دا ءبىر جاناما اسەر تۋىنداسا، فارماكوباقىلاۋ ساراپتاما جۇرگىزەدى. ءبىز ەكپەدەن پايدا بولۋى مۇمكىن دەگەن ءاربىر جاناما اسەردى باقىلاۋعا الامىز. سوڭعى ءبىر جارىم جىلدا جاناما اسەر تۋرالى 70 شاعىم كەلىپ ءتۇستى. 370 مىڭ بالاعا ەكپە سالىپ، 70 شاعىم الدىق. بۇل 70 شاعىمدى دا تەكسەردىك، كۇردەلى، اۋىر وقيعالار انىقتالمادى»، - دەدى ا. نۇرتايەۆ.

اۆتور: ايجان سەرىكجان قىزى