وقۋشىنى زورلاۋ وقيعاسى: بارلىق مەكتەپتەردە قاۋىپسىزدىك كۇشەيتىلدى
قوعامدا ۇلكەن رەزونانس تۋدىرعان وقيعادان كەيىن وبلىس اكىمى اسقار مىرزاحمەتوۆ جەدەل كەڭەس وتكىزىپ، اتالمىش جايتقا جول بەرگەن بارلىق جاۋاپتى تۇلعالاردى جۇمىستان بوساتۋ كەرەكتىگىن باسا ايتىپ، الداعى ۋاقىتتا قانداي دا قىلمىستىق فاكتى ورىن العان مەكتەپتىڭ ديرەكتورى مەن ءتيىستى ورىنباسارلارى، ءبىلىم بەرۋ ءبولىمىنىڭ باسشىلارىنا دا وسى جازا ءتۇرى قولدانىلماق.
«قاتاڭ سوگىس» دەگەن سەكىلدى جازا ءتۇرىن قولدانىپ، ارى قاراي جۇمىسىن جالعاستىرا بەرۋ ءبىرىنشى كەزەكتە ادامگەرشىلىككە جاتپايدى. سالادا تەمىردەي ءتارتىپ ورناتىپ، سول ءتارتىپتىڭ تالابىنا ساي ەمەس ماماندار قىزمەتتەن كەتۋ كەرەك. جاس وسپىرىمدەر قاۋىپسىزدىگىن كۇشەيتۋ ماقساتىندا جۇرگىزىلەتىن جۇمىستارعا ادامگەرشىلىك تۇرعىدا قاراپ، وعان اسقان جاۋاپكەرشىلىكپەن نازار اۋدارىلۋعا ءتيىس. بۇل تاپسىرمالاردىڭ ورىندالۋ بارىسى ءوزىمنىڭ ءجىتى قاداعالاۋىمدا بولادى»، - دەدى اسقار مىرزاحمەتوۆ.
وبلىس اكىمىنىڭ تاپسىرماسىنا ساي جاۋىق ارادا وبلىستىڭ بارلىق مەكتەپتەرى تولىقتاي قورشالاتىن بولدى. اۋىلدار مەن اۋدان ورتالىقتارىنداعى مەكتەپتەردى قالايدا تەزىرەك قورشاۋدى اۋدان اكىمدەرىنە تاپسىردى. سونداي-اق، بارلىق مەكتەپتەردەگى اجەتحانالاردى وڭتايلاندىرۋ، ولاردى قاۋىپسىز ەتۋ جۇكتەلدى. سونىمەن قاتار، ءبىلىم بەرۋ مەكەمەلەرىن 100 پايىز كامەرامەن قامتاماسىز ەتۋ ءۇشىن ەكونوميكا جانە بيۋجەتتىك جوسپارلاۋ باسقارماسىنا ولاردىڭ شىعىنىن ەسەپكە الىپ، بۇل ماسەلەنى دە تولىقتاي شەشۋدى تاپسىردى.
ايتا كەتەيىك، بۇگىندە وبلىس بويىنشا 442 مەكتەپ جۇمىس ىستەۋدە دەسەك، ولاردىڭ 98,4 پايىزى بەينەباقىلاۋ كامەرالارىمەن قامتىلعان.
ايماق باسشىسى، وبلىستىق پوليتسيا دەپارتامەنتى مەكتەپتەرگە بولىنگەن ينسپەكتورلاردان وزگە پوليتسيا قىزمەتكەرىن دە مەكتەپ وقۋشىلارىنىڭ قاۋىپسىزدىگىن قامتاماسىز ەتۋگە مىندەتتەپ، تاڭعى، تۇسكى جانە كەشكى مەزگىلدە پوليتسيا قىزمەتكەرلەرىنىڭ مىندەتتى تۇردە مەكتەپ اۋماعىن باقىلاۋدى ۇيلەستىرۋ كەرەكتىگىن ايتتى.
بۇگىندە وبلىس اكىمىنىڭ تاپسىرماسىنا وراي، شۇعىل شارالار قولعا الىنىپ، وڭىردەگى مەكتەپتەردە وقۋشىلاردىڭ قاۋىپسىزدىگىن قامتاماسىز ەتۋدەگى كەمشىلىكتەردى انىقتاۋ، ونىڭ ىشىندە مەكتەپ ينسپەكتورلارى مەن بەينەكامەرالاردىڭ جەتىسپەۋشىلىگى، وقۋ ورىندارىنىڭ اۋماعىندا قورشاۋدىڭ، سانيتارلىق جابدىقتاردىڭ بولماۋى جانە باسقا دا ماسەلەلەر بويىنشا پوليتسيا دەپارتامەنتىمەن ارنايى جۇمىس توبى قۇرىلىپ ۇلگەرىلدى. بۇل تۋرالى دەپارتامەنت باستىعى ارمان ورازاليەۆ ءوزىنىڭ Facebook الەۋمەتتىك جەلىسىندەگى پاراقشاسىندا جازدى.
«مەكتەپ جانىنداعى اۋماقتاردا كامەلەتكە تولماعانداردىڭ جىنىستىق قول سۇعىلماۋشىلىعىنا قارسى قىلمىستاردى بولدىرماۋ بويىنشا جۇمىستى كۇشەيتۋ ماقساتىندا، كۇندىزگى جانە كەشكى ۋاقىتتا پوليتسيا قىزمەتكەرلەرى مەكتەپ اكىمشىلىگىنىڭ وكىلدەرىمەن بىرلەسىپ پاترۋلدەۋ ۇيىمداستىرىلادى. مەكتەپ ينسپەكتورلارىنىڭ ءىس-ارەكەت الگوريتمى قايتا قارالدى. مەكتەپتەگى بەينەباقىلاۋ كامەرالارىنان بەينەلەردى تەك ديرەكتوردىڭ كابينەتىنە عانا ەمەس، سونىمەن قاتار ديرەكتوردىڭ تاربيە ءىسى جونىندەگى ورىنباسارى مەن مەكتەپ ينسپەكتورىنىڭ كابينەتتەرىنە شىعارۋ ماسەلەسى قارالۋدا»، - دەدى ارمان ورازاليەۆ.
سونداي-اق، وبلىستىڭ باس پوليتسەيىنىڭ ايتۋىنشا، تاراز قالاسىنىڭ 6№ ورتا مەكتەبىندە ورىن العان قىلمىسقا بايلانىستى تاراز قالاسى پوليتسيا باسقارماسىنىڭ جەرگىلىكتى پوليتسيا قىزمەتىنىڭ باستىعىنا، تاراز قالالىق پ ب 2-پوليتسيا ءبولىمىنىڭ جانە 2-پ ب جەرگىلىكتى پوليتسيا قىزمەتى بولىمشەسىنىڭ باستىقتارىنا، 2-پ ب يۋۆەنالدىق پوليتسيا جۇمىسىن ۇيىمداستىرۋ جونىندەگى اعا ينسپەكتورىنا قاتاڭ سوگىس جاريالاندى، ال مەكتەپ ينسپەكتورى ىشكى ىستەر ورگاندارىنان شىعارىلعان.
كامەلەتكە تولماعاندار جاساعان جانە كامەلەتكە تولماعاندارعا قاتىستى قىلمىستاردىڭ الدىن الۋ مەن جولىن كەسۋ ماسەلەلەرى دەپارتامەنت باسشىسىنىڭ كۇندەلىكتى باقىلاۋىندا بولماق.
ەسكە سالا كەتەيىك، بۇعان دەيىن حابارلاعانىمىزداي تاراز قالاسىنداعى 6№ مەكتەپتە بولعان سۇمدىق وقيعا وتكەن اپتانىڭ جۇما كۇنى ورىن الدى. اتالعان مەكتەپ اجەتحاناسىندا 12 جاسار وقۋشى قىزعا ازعىندىق ارەكەت جاساعان 38 جاسار كۇدىكتى كوپ ۇزاماي قولعا ءتۇسىپ، قامالعان. بۇعان جول بەرگەن جاۋاپتى باسشىلار جاپپاي جازالانىپ، جۇمىستارىنان بوساتىلۋدا. بۇگىندە جابىرلەنۋشى اۋرۋحاناعا جاتقىزىلىپ، دارىگەرلەردىڭ باقىلاۋىنا الىندى.