ومبىدا ەتنيكالىق قازاقتاردىڭ باسىن قوسقان بيزنەس-فورۋم ءوتتى
اتالعان شارا شەت ەلدە تۇراتىن ەتنيكالىق قازاقتار جانە سول ەلگە قونىس اۋدارعان وتانداستارمەن بايلانىس ورناتۋ جونىندە تۇڭعىش پرەزيدەنت-ەلباسى بەرگەن تاپسىرمانى جۇزەگە اسىرۋ ماقساتىندا قۇرىلعان «وتانداستار قورى» باعدارلاماسىنىڭ ءبىر بولىگى، دەپ حابارلايدى قازاقپارات .
باس قوسۋدا «وتانداستار قورى» ءبىرىنشى ۆيتسە-پرەزيدەنتى تالعات ادۋوۆ فورۋمعا قاتىسۋشىلاردى قور قۇرىلىمى مەن مەحانيزمدەرى تۋرالى ايتىپ بەردى. اسىرەسە الەمدەگى قازاق دياسپوراسىن بىرىكتىرەتىن قۇرامىنا «اتامەكەن» ىسكەرلىك ءۇيى مەن «اباي» مادەني ءۇيى كىرەتىن «Qazaq House» مادەني-ىسكەرلىك ءۇيى جوباسىنا ەرەكشە نازار اۋداردى. ت. ادۋوۆ «Qazaq House» - تىڭ نەگىزگى تۇجىرىمىمەن، ونىڭ قىزمەت باعىتىمەن جان-جاقتى تانىستىردى.
بۇدان بولەك، «اتامەكەن» ىسكەرلىك ءۇيى قىزمەتى ءتۇسىندىرىلىپ، ونىڭ شەت ەلدەگى كاسىپكەر قانداستارعا ۇسىناتىن مۇمكىندىكتەرى تۋرالى اڭگىمە ءوربىدى. فورۋمعا قاتىسۋشىلار «اتامەكەن» ىسكەرلىك ۇيىنە قاتىستى قىزىعۋشىلىق ءبىلدىرىپ، ونىڭ دامۋىنا قاتىستى ءوز ۇسىنىستارى بولاتىنىن اتاپ ءوتتى.
قاتىسۋشىلار تاراپىنان ءسوز العان ومبى قازاقتارى قاۋىمداستىعىنىڭ وكىلى الينا سمىكوۆا ەتنيكالىق بەلگىسى قويىلعان ءونىم شىعاراتىن شەبەرحانا ۇيىمداستىرىپ، ونى رەسەي وڭىرلەرىنە تاراتۋ مۇمكىندىگىن قاراستىرۋ جايلى اڭگىمەلەدى. ال رينات توكەنوۆ مەملەكەت-جەكەشەلىك سەرىكتەستىگى بويىنشا ۇلتتىق نىشاندا بالاباقشا اشۋدى، ونداي مەكەمەنىڭ قازىر وتە قاجەت ەكەنى تۋرالى ايتتى. سەرىك راحىموۆ بولسا رەسەيدەن قازاقستانعا استىق پەن قيىرشىق تاس جەتكىزۋدەگى قيىندىقتار جايلى ايتىپ، قور وكىلدەرىنىڭ وسى ماسەلەنىڭ شەشىلۋىنە كومەكتەسۋىن سۇرادى.
بيزنەس فورۋمعا قاتىسۋشىلار جيىن سوڭىندا ومبى ءوڭىرى قازاقتارىنىڭ وبلىستا «اباي» مادەني ءۇيىنىڭ قۇرىلۋىنا قولداۋ كورسەتۋگە، «وتانداستار» قورى ۇيىمداستىراتىن ءىس-شارالار مەن جوبالارعا قاتىسۋعا جانە بيزنەس ىنتىماقتاستىققا قاتىستى ءوز ۇسىنىستارىن ازىرلەۋگە ىقىلاس ءبىلدىردى.