ەلباسى تۇركىستانداعى قوعامدىق قابىلداۋ بولمەسىنىڭ جۇمىسىمەن تانىستى

تۇركىستان. قازاقپارات - ەلباسى نۇرسۇلتان نازاربايەۆ تۇركىستان وبلىستىق اكىمدىگىنىڭ جاڭا عيماراتىنداعى «Nur Otan» پارتياسىنىڭ قوعامدىق قابىلداۋ بولمەسىمەن تانىستى.

مۇندا پارتيانىڭ وبلىستىق فيليالىنىڭ جەتەكشىلىگىمەن قۇقىق قورعاۋ ورگاندارى مەن الەۋمەتتىك سالاعا جاۋاپتى مەكەمەلەردىڭ باسشىلارى قوعامدىق قابىلداۋ وتكىزەدى، دەپ حابارلايدى قازاقپارات ءتىلشىسى.

اتالعان جوبا حالىق پەن بيلىك اراسىن جاقىنداتۋ باعىتىندا قولعا الىنىپ وتىر. ءوڭىر باسشىسى، «Nur Otan» پارتياسىنىڭ تۇركىستان وبلىستىق فيليالىنىڭ ءتوراعاسى ءومىرزاق شوكەيەۆ ەلباسىعا تۇرعىنداردىڭ ءوتىنىشى مەن قۇقىقتارى ءاردايىم باستى نازاردا بولاتىنىن جەتكىزدى. ۇلت كوشباسشىسىن بۇل جوبانىڭ جۇمىسىمەن «Nur Otan» پارتياسىنىڭ تۇركىستان وبلىستىق فيليالى ءتوراعاسىنىڭ ءبىرىنشى ورىنباسارى بەيسەنباي تاجىبايەۆ تانىستىردى.

مۇندا پارتيا حالىقتى اشىق فورماتتا قابىلدايدى. ارنايى قوعامدىق قابىلداۋ بولمەلەرىندە تۇرعىنداردىڭ تالاپ- تىلەگى تىڭدالىپ، ارىز-شاعىم، وتىنىشتەر بويىنشا ءتيىستى جۇمىستار جۇرگىزىلەدى. سونىمەن بىرگە قۇقىق قورعاۋ ورگاندارى مەن تۇرعىندار ءجيى سۇراق قوياتىن الەۋمەتتىك سالانىڭ وكىلدەرى دە تۇرعىندارعا كومەكتەسەدى.

ءاربىر ازاماتتىڭ شاعىمى پوست- تەرمينال ارقىلى قابىلدانادى. بارلىق وتىنىشتەر پارتيا تاراپىنان تۇراقتى قاداعالانۋعا الىنادى. بۇل جاڭا باستاما اشىق اكىمدىك جوباسىن جانداندىرۋ ماقساتىندا قولعا الىنىپ وتىر.

ايتا كەتەيىك، بۇگىندە ەلباسى، «Nur Otan» پارتياسىنىڭ ءتوراعاسى نۇرسۇلتان نازاربايەۆتىڭ «سەنىم. ديالوگ. بولاشاققا نىق قادام» - «Nur Otan» پارتياسىنىڭ 7 سەرپىنى» باعدارلاماسى اياسىنداعى تاپسىرماسىنا سايكەس، تۇركىستان وبلىسىندا جۇيەلى جۇمىس اتقارىلىپ جاتىر. قوعامدىق قابىلداۋ كەڭسەسى «Open space» فورماتىندا اشىلىپ، جاڭا عيماراتقا كوشىرىلدى. لاۋازىمدى تۇلعالار تۇرعىنداردى تۇراقتى تۇردە قابىلداپ، ماسەلەلەر شەشىمىن تابۋدا. بيىل قاڭتار- قازان ايلارى ارالىعىندا پارتيا فيليالىنىڭ بارلىق قوعامدىق قابىلداۋ بولمەلەرىنە 6047 ارىز- شاعىم تۇسكەن: ونىڭ 2358 (ياعني 9) وڭتايلى شەشىلسە، 3611 وتىنىشكە زاڭ اياسىندا كەڭەس بەرىلگەن.

9 ايدا 2006 قابىلداۋ جۇرگىزىلىپ، 9937 تۇرعىننىڭ ءوتىنىشى بەتپە-بەت تىڭدالدى. ءوتىنىش- تىلەكتەردىڭ باسىم بولىگى وڭ شەشىمىن تاۋىپ، قاناعاتتاندىرىلدى. سونداي-اق كاسىپكەرلەرگە زاڭ جۇزىندە كەڭەس بەرىپ، ارىز- شاعىمىن تىڭدايتىن قوعامدىق بيزنەس-قابىلداۋى دا ىسكە قوسىلعان.

وڭىردە «Nur Otan» پارتياسىنىڭ 90 مىڭعا جۋىق مۇشەسى بار. 255 باستاۋىش پارتيا ۇيىمىنا تالداۋ جۇرگىزىلىپ، 2,5 مىڭنان اسا ادام پارتيا قاتارىنان شىعارىلعان. جاڭادان بەس باستاۋىش پارتيا ۇيىمى اشىلىپ، كاسىپورىن مەن شارۋاشىلىق ۇيىمدارىنىڭ وكىلدەرى پارتيا قاتارىنا تارتىلدى. وسى جىلدىڭ سوڭىنا دەيىن ۇيىمداردىڭ سانىن ونعا جەتكىزۋ جوسپارلانىپ وتىر.

اۆتور: اينۇر اقبايەۆا