ەلوردادا سالىق تولەمەگەندەردىڭ ءتىزىمى جاريالاندى

نۇر-سۇلتان. قازاقپارات - نۇر-سۇلتان قالاسىنىڭ مەملەكەتتىك كىرىستەر دەپارتامەنتى جەر، مۇلىك جانە كولىك قۇرالدارىنا سالىقتى ۋاقىتىلى تولەۋ قاجەتتىگىن ەسكە سالدى.

كەرى جاعدايدا قارىزبەن بىرگە ءوسىمىن دە تولەۋگە تۋرا كەلەدى، دەپ حابارلايدى قازاقپارات قالالىق اكىمدىكتىڭ رەسمي سايتىنا سىلتەمە جاساپ.

سالىق قارىزىن وتەمەگەندەردىڭ ءتىزىمى ينتەرنەتتە اشىق جاريالاناتىن بولادى.

ەسكە سالايىق، بەرەشەك پايدا بولعاننان كەيىن سالىق ورگاندارى 20 جۇمىس كۇنى ىشىندە جەكە تۇلعانىڭ مەكەنجايىنا حابارلاما جىبەرەدى. ەگەر حابارلامانى الا وتىرىپ، قارىزدى 30 كۇننىڭ ىشىندە وتەمەسە، سالىق ورگانى ونى ءوندىرىپ الۋ تۋرالى بۇيرىق شىعارادى جانە 5 جۇمىس كۇنىنەن كەشىكتىرمەي ونى جەكە تۇلعاعا جىبەرەدى. سالىق بۇيرىعىن العاننان كەيىنگى 5 كۇندە دە سالىق بەرەشەگىن جاپپاسا، وندا ۋاكىلەتتى ورگان ماجبۇرلەپ ورىنداتۋ ءۇشىن سوت ورىنداۋشىلارىنا جۇگىنەدى.

«سوت سالىق بۇيرىعىن العان كەزدە بورىشتى ءوندىرىپ الۋدى ماجبۇرلەپ ورىنداتۋ ءراسىمىن باستايدى. ونىڭ بارىسىندا بانك شوتتارىنداعى مۇلىك پەن اقشاعا، ەلدەن تىس جەرلەرگە شىعۋعا تىيىم سالۋ قاراستىرىلعان. سالىق بەرەشەگىن وتەۋدەن باسقا، جەكە تۇلعا قارىز سوماسىنىڭ كەمىندە مولشەرىندە سوت ورىنداۋشىسىنىڭ قىزمەتىن دە تولەۋى قاجەت بولادى»، - دەلىنگەن اكىمدىك اقپاراتىندا.

سالىق قارىزى بار ەلوردالىقتاردىڭ تىزىمىنە 226 ادامنىڭ اتى-ءجونى ەنگەن. وندا تۇرعىنداردىڭ بورىش سوماسى 1 ميلليوننان 19 ميلليون تەڭگەگە دەيىنگى ارالىقتا.