ترامپ زەلەنسكيمەن اڭگىمەسىن تىڭداعان ادامنىڭ اتى-ءجونىن جاريالاۋدى سۇرادى
وسى شاعىمنان كەيىن ا ق ش كونگرەسى ترامپقا يمپيچمەنت جاريالاۋ ماسەلەسى بويىنشا زەرتتەۋ باستاعان ەدى.
جەكسەنبى كۇنى جۋرناليستەرمەن سويلەسكەن ترامپ شىندىققا ساي كەلمەيتىن اقپارات بەرگەن بۇل ادام - «ورتالىق بارلاۋ باسقارماسىنىڭ بۇرىنعى ديرەكتورى برەنناننىڭ جانە «ترامپتى جەك كورەتىن» بۇرىنعى پرەزيدەنت باراك وبامانىڭ ادامى بولۋى مۇمكىن» دەپ سانايدى.
اقپارات بەرگەن ادامنىڭ اتى-ءجونىن جاريالاۋ قاجەتتىگى جايلى ترامپ تۆيتتەرىندە دە جازعان.
پرەزيدەنت ترامپ ۋكراينا پرەزيدەنتى زەلەنسكيمەن اڭگىمەسى بۇرمالانعانىن، ول ۋكراينا پرەزيدەنتىنە قىسىم جاساماعانىن، ا ق ش جوعارى لاۋازىمدى ادامدارىنىڭ قاتىسى بولۋى مۇمكىن جەمقورلىق ءىستى تەكسەرۋدى عانا سۇراعانىن ايتادى. اق ءۇي جاريالاعان تەلەفون اڭگىمەسىندە «جەمقورلىق تەكسەرىلمەسە، ۋكرايناعا بەرىلەتىن اسكەري كومەك كىدىرتىلەتىنى» جايلى ءسوز بولماعان. الايدا وكىلدەر پالاتاسىندا سۇرالعان ءبىرقاتار شەنەۋنىكتەر «ۋكراينانى ترامپ شارتىن ورىنداۋعا ماجبۇرلەۋ ءۇشىن اسكەري كومەك كىدىرتىلدى» دەگەن بولجامدى راستايدى.
ترامپ پەن زەلەنسكيدىڭ تەلەفون اڭگىمەسى جايلى اقپارات بەرگەن ادامنىڭ ادۆوكاتى جەكسەنبى كۇنى ونىڭ رەسپۋبليكاشىلدار، ترامپ پارتيالاستارى الدىندا - كونگرەستە جاۋاپ بەرۋگە دايىن ەكەنىن مالىمدەدى. الايدا ادۆوكات قاۋىپسىزدىك ماقساتىندا اقپارات بەرۋشى ادامنىڭ اتى-ءجونىن جاريالاۋعا بولمايتىنىن ايتتى.
«ازاتتىق»