وكىلدەر پالاتاسىنىڭ 232 دەپۋتاتى بۇل باستامانى قولداسا، 196 سى قارسىلىق تانىتقان. باسىمدىق دەموكراتتاردا. ەندى تەرگەۋ مەن سىرتقى ىستەر سىندى التى كوميتەت كونرگەستىڭ اق ءۇي باسشىسىنا ايىپ تاعۋعا دالەلدەرى جەتكىلىكتى مە، سونى انىقتاۋى كەرەك. اق ءۇي باسشىسى جاڭالىقتى ادەتتەگىدەي ازىلمەن قابىلدادى. بۇل ۇدەرىسكە «مىستانداردى اۋلاۋ» دەپ ات بەرگەن.
وكىلدەر پالاتاسى كونستيتۋتسيالىق قۇقىعىن قولدانىپ، دونالد ترامپتى قىزمەتىنەن كەتىرە الادى ما؟ ءتيىستى كوميتەتتەر وسىنى انىقتايدى. كونگرەستە بەكىتىلگەن قۇجات وسىلاي باستالادى. دەمەك تەرگەۋ ەندى رەسمي ءارى اشىق تۇردە وتەدى دەگەن ءسوز. داۋىس بەرىپ، قابىلدانعان رەزوليۋتسيانىڭ ماقساتى دا وسى ەدى. ناتيجەسىندە، تەرگەۋدى التى كوميتەت بىرىگىپ جۇرگىزەدى. كۋاگەرلەردىڭ جاۋابى اشىق تۇردە جاريالانادى. كوميتەت باسشىلارى مەن ولاردىڭ كومەكشىلەرى يمپيچمەنت ۇدەرىسىنە قاتىستى كۋاگەرلەرگە 90 مينۋت بويى سۇراق قويا الادى.
ادام شيفف، وكىلدەر پالاتاسى تەرگەۋ بويىنشا كوميتەتىنىڭ ءتوراعاسى:
- ۇلتتىق قاۋىپسىزدىكتى قاتەرگە قويعاندار زاڭ جۇزىندە جاۋاپقا تارتىلادى. ءوزىنىڭ ساياسي قىزىعۋشىلىعىن مەملەكەتتەن جوعارى قويعان بيلىك لاۋازىمنان كەتەدى. زاڭ شىعارعان اتا- بابالارىمىز وسىنداي جاعدايدىڭ بولارىن ءبىلىپ، يمپيچمەنت ۇدەرىسىن ويلاپ تاپقان. رەزوليۋتسيانىڭ باستالۋى قۋاناتىنداي جايت ەمەس، ارينە. دەگەنمەن تەرگەۋدى سوڭىنا دەيىن جەتكىزەمىز.
جالپى يمپيچمەنت ۇدەرىسى ۇزاق ۋاقىتقا سوزىلاتىنىن ايتا كەتەيىك. ياعني الدىمەن كوميتەتتەر ايعاق جينايدى. ودان سوڭ، تومەنگى پالاتادا قايتا داۋىس بەرۋ وتەدى. اق ءۇي باسشىسىن بيلىكتەن ءبىر اۋىزدان كەتىرەمىز دەسە، بۇل شەشىم سەناتقا جولدانادى. سوڭعى ءسوز وسى جەردە قابىلدانادى. ال مۇندا ترامپتىڭ جاقتاستارى، رەسپۋبليكالىقتاردىڭ باسىم ەكەنىن ايتا كەتەيىك.
كيەۆين ماككارتي، وكىلدەر پالاتاسىنداعى رەسپۋبليكالىقتاردىڭ كوشباسشىسى:
- دەموكراتتار قانداي جولمەن بولسا دا، پرەزيدەنتكە يمپيچمەنت جاريالاپ، بيلىكتەن كەتىرمەك. سەبەبى الداعى سايلاۋدا بۇل لاۋازىمعا قايتا تاعايىندالا ما دەپ الاڭداۋلى. بۇل مەنىڭ ەمەس، سولاردىڭ سوزدەرى.
اق ءۇي وكىلدەر پالاتاسىنداعى داۋىس بەرۋ قورىتىندىسى بويىنشا سىني مالىمدەمە جاسادى. اكىمشىلىك دەموكراتتاردىڭ بۇل ارەكەتىن زاڭسىز ءارى امەريكا حالقىنا قاۋىپ توندىرەدى دەپ وتىر. ال دونالد ترامپتىڭ ءوزى تۆيتتەرگە شاعىن مالىمدەمە جاساپ قۇتىلدى.
دونالد ترامپ:
- بۇل - امەريكا تاريحىنداعى ەڭ اۋقىمدى «مىستانداردى اۋلاۋ» ۇدەرىسى. امەريكا قۇراما شتاتتارىنداعى جاعداي وسى.
دەموكراتتار دونالد ترامپقا كوڭىلى تولمايتىندىقتارىن ايتىپ جاتىر. ال بۇل ارادا سيريا باسشىسى باشار اساد اق ءۇيدىڭ قازىرگى جەتەكشىسى ا ق ش تاريحىنداعى ەڭ مىقتى پرەزيدەنت دەپ اتادى.
باشار اساد، سيريا پرەزيدەنتى:
- نەلىكتەن دەيسىز بە؟ دونالد ترامپتى ماقتاعاندا، ونىڭ ۇستانعان ساياساتى تۋرالى ايتىپ تۇرعانىم جوق. كەرىسىنشە، اشىقتىعى ۇنايدى. ا ق ش- تىڭ پرەزيدەنتتەرى قىلمىس جاساپ الىپ، ىزىنشە نوبەل سىيلىعىن الادى، ادام قۇقىعىن قورعاپ شىعادى. ترامپ مۇناي كەرەك بولسا، «مۇناي كەرەك» دەپ اشىعىن ايتادى. وتە شىنشىل دۇشپان دەر ەدىم اق ءۇي باسشىسىن.
سيريا پرەزيدەنتى بۇل مالىمدەمەنى ترامپتىڭ ال- باعداديعا قاتىستى سوزىنەن سوڭ جاسادى. باشار اساد «يراك جانە ليەۆانت» لاڭكەستىك ۇيىمىنىڭ باسشىسى ولتىرىلگەنىنە كۇمانمەن قاراپ وتىر. سونداي- اق امەريكالىق اسكەرلەردىڭ سيريا اۋماعىنان ءالى تولىق كەتپەگەنىن جەتكىزدى.
«يراك جانە ليەۆانت» لاڭكەستىك ۇيىمى رەسمي تۇردە ال- باعداديدىڭ ءولىمىن راستاپ، ورنىنا جاڭا كوشباسشى تاعايىنداعاندارىن جەتكىزدى. بۇعان دەيىن ال- باعدادي ءولدى دەگەن حابار 17 مارتە تاراعان ەكەن. لاڭكەستىك ۇيىم ءبىرىنشى رەت وسىلايشا رەسمي تۇردە راستاپ وتىر.
www.24.kz