سونىڭ اسەرىنەن ادام اشۋشاڭ بولىپ، سىركەسى سۋ كوتەرمەي، بولماشىعا اشۋلانىپ كەتەدى. سونىڭ كەسىرىنەن جاقىندارىنا اۋىر سوزدەر ايتىپ، جانىن جارالاپ الۋى دا عاجاپ ەمەس. سونداي جاعدايدا اشۋدى قالاي باسۋعا بولادى؟ قالاي تەز سابىرعا كەلۋگە بولادى؟
1-ءتاسىل: تىنىشتاندىراتىن تىنىس الۋ جاتتىعۋلارىن جاساۋ
بيوحيميكتەر تىنىس الۋ جيىلىگى مەن ادام ەموتسياسى اراسىنداعى بايلانىستى انىقتاعان. اشۋ، كۇيزەلىس، قوبالجۋ سەكىلدى ەموتسيالار كەزىندە تىنىس الۋ جيىلىگى ارتادى. ەگەر وسى جيىلىكتى ازايتىپ، تىنىسىمىزدى باسقارساق، جاي جانە تەرەڭ تىنىستاۋ سابىرعا كەلۋىمىزگە بىردەن- ءبىر كومەك.
2-ءتاسىل: تۇستەردىڭ اسەرى
ادام ەموتسياسىنا اينالاسىنداعى تۇستەردىڭ دە اسەرى بار. ادامنىڭ بايسالدىلىعىنا كوك جانە اق تۇستەر سەپتىگىن تيگىزەدى. سوندىقتان ماماندار ءۇيىڭىزدى، بولمەڭىزدى اشىق كوك، اق تۇسكە بوياۋعا كەڭەس بەرەدى. الايدا قاتتى اشۋلى كەزىڭىزدە بىردەن سول تۇستەردى ىزدەۋ قيىن. سوندىقتان ونداي جاعدايدا تەلەفونىڭىزعا قاراۋدى كەڭەس بەرەدى. سەبەبى ودان ساۋلە كوكشىل شىعادى. ونىمەن قوسا تەلەفونعا قاراساڭىز ويىڭىز دا بولىنەدى.
3-ءتاسىل: تىنىشتاندىراتىن دىبىستار
ەگەر سوڭعى ۋاقىتتا ءوزىڭىزدىڭ اشۋشاڭدىعىڭىزدى بايقاساڭىز، تىنىش جەردە تەرەڭ تىنىستاپ، تابيعات دىبىستارىن نە بولماسا ينتەرنەت جەلىسىنەن ارنايى ميدى تىنىقتىراتىن دىبىستار نەمەسە اۋەندەر تىڭداڭىز. ءسىزدىڭ تىنىشتىعىڭىزعا قورشاعان ورتاڭىزدىڭ كەدەرگى كەلتىرمەۋىنە ءمان بەرىڭىز. سەبەبى ول كۇيزەلىستەن ارىلۋعا كومەكتەسۋ ورنىنا، كەرىسىنشە ۇدەتىپ جىبەرۋى ابدەن مۇمكىن.
4-ءتاسىل: اروماتتى مايلار
ادام ەموتسياسىنا تۇستەردەن بولەك ءيىستىڭ دە اسەرى بار. گۇلشەتەن، لاۆاندا، يلانگ- يلانگ ەفير مايلارى قان قىسىمىن تومەندەتىپ، تىنىستى باياۋلاتۋعا، سابىرعا كەلىپ، بولعان جاعدايدى قايتا وي ەلەگىنەن وتكىزۋگە سەپتىگىن تيگىزەدى.
5-ءتاسىل: نازارىن وزگە جۇمىسقا اۋدارۋ.
قىزدار ءۇشىن تاپتىرماس ءتاسىل - مانيكيۋر جاساۋ. ءبىرقالىپتى جانە زەيىندى قاجەت ەتەتىن جۇمىس ءبىزدىڭ بار نازارىمىزدى وزىنە اۋدارىپ، سابىرعا كەلۋىمىزگە كومەكتەسەدى. سوندىقتان نازىك جاندىلارعا اشۋ كەزىندە شكافتى رەتتەۋ نەمەسە ىدىس- اياق جۋۋ سياقتى جۇمىستار، ال مىقتى بىلەك يەلەرىنە كولىك نەمەسە باسقا دا تەحنيكالاردى جوندەۋ سەكىلدى جۇمىستار ۇسىنىلادى.
ال ەڭ باستىسى، اشۋ - دۇشپان، اقىل دوس ەكەنىن ەستە ۇستاڭىز. كەز كەلگەن جاعدايدا سابىر ەتىپ، اللاعا شۇكىر ەتۋدى ۇمىتپاڭىز. سەبەبى اللا سابىرلىلاردى جاقسى كورەدى!