ايەلىڭىزدى باقىتتى ەتكىڭىز كەلسە

نۇر-سۇلتان. قازاقپارات - وتباسى، نەكە - يسلامداعى ەڭ ۇلكەن قۇندىلىقتاردىڭ ءبىرى.

ونى بەرىك ۇستاپ تۇرۋ تەك ايەلگە عانا ەمەس، ەر ادامعا دا بايلانىستى. سوندىقتان ايەلىڭىزدى باقىتتى ەتەتىن قاراپايىم شاريعات قاعيدالارىمەن ءبولىسۋدى ءجون كورىپ وتىرمىز:

1. اشۋشاڭ بولماڭىز، ايەلىڭىز ءسىزدىڭ جانىڭىزدا ءوزىن قاۋىپسىز سەزىنسىن.

2. ۇيگە كەلگەنىڭىزدە ايەلىڭىزگە «اسساليامۋالەيكۋم» دەپ امانداسىڭىز. ونداي ۇيگە شايتان جولامايدى.

3. پايعامبارىمىز (س. ا. ۋ. ) ايەلدى ايالاپ ۇستاۋدى قاجەت ەتەتىن حرۋستال ىدىسقا تەڭەگەن. ايەل تابيعاتى وتە نازىك. ونىمەن قارىم-قاتىناستا ءوزىڭىزدى بارىنشا قاداعالاڭىز.

4. ايەلىڭىزگە كەڭەستى وڭاشادا ءارى وتە جۇمساق ايتىڭىز. ونىڭ كەمشىلىكتەرىن جۇرت الدىندا اۋىزعا الۋدان اباي بولىڭىز.

5. جومارت بولىڭىز، ايەلىڭىزگە ساراڭدىق تانىتپاڭىز.

6. اشۋعا بوي الدىرماۋعا تىرىسىڭىز. وتباسى بولعاننان كەيىن ءتۇرلى جاعدايلار بولادى. كەيدە كىشكەنتاي ماسەلەدە كەلىسپەي قالۋلارىڭىز مۇمكىن. پايعامبارىمىز (س. ع. س. ) اشۋلانعان جاعدايدا وتىرۋعا، وتىرعان جاعدايدا جاتۋعا بۇيىرعان.

7. ايەلىڭىزدىڭ الدىندا ادەمى كورىنۋگە تىرىسىڭىز، جاعىمدى اتىرلەر سەۋىپ ءجۇرىڭىز. مۇنداي جاعدايلار قارىم- قاتىناستاعى جىلىلىقتى ساقتاۋعا كومەكتەسەدى.

8. ايەلىڭىزبەن قارىم-قاتىناستا قاتتىلىق تانىتپاڭىز. بۇل سىزدەردى ءبىر- بىرىڭىزدەن الىستاتىپ جىبەرەدى. قاتتىلىق جۇرەگىڭىزدى اللادان دا الشاقتاتادى.

9. ايەلىڭىزدى تىڭداپ، ونىڭ پىكىرىن قابىلداي ءبىلىڭىز.

10. اراسىندا جۇبايىڭىزدى ماقتاپ تۇرىڭىز. ويتكەنى ايەل ادام نە ىستەسە دە، ونى ءسىز ءۇشىن جانە بالالارى ءۇشىن ىستەيدى. ونىڭ ەڭبەگىن باعالاپ، ماقتاپ تۇرىڭىز.

11. ونىمەن داۋلاسپاڭىز. داۋلاسۋ - نەكەنىڭ جاۋى. حاديستەردىڭ بىرىندە: «ەگەر اللا تاعالا ادامدارعا جاماندىق قالاسا، ولاردىڭ ورتاسىنا داۋ سالادى» دەلىنگەن.

12. پايعامبارىمىز (س. ع. س. ) مۇسىلمانعا ايەلىن وعان ۇنايتىن ەڭ ادەمى ەسىمدەرمەن اتاۋدى بۇيىرعان.

13. وعان توسىن سىيلار جاساپ تۇرىڭىز. جارىڭىزدى كۇتپەگەن سىيلىقتارمەن قۋانتىپ تۇرۋدى ۇمىتپاڭىز. مىسالى، ايەلىڭىزگە قاربىز ۇنايتىن بولسا، ونى ۇيگە اكەلە سالۋدىڭ ەش قيىندىعى جوق قوي.

14. ءتىلىڭىزدى تىيىڭىز. ونىڭ پىكىرىمەن كەلىسپەسەڭىز دە ەموتسياعا بەرىلمەي، ماسەلەنىڭ اقىرىن كۇتىڭىز. ادامدى توزاققا ءتىلى اپاراتىنىن ەستەن شىعارماڭىز.

15. بارىندە كەمشىلىك بار. ايەلىڭىزدى بار قالپىندا قابىلداڭىز.

16. ونى باعالايتىنىڭىزدى ءبىلدىرىپ تۇرىڭىز. ونىڭ سىزگە جاساعان قىزمەتى ءوزىڭىز ءۇشىن وتە جوعارى باعالاناتىنىن ءبىلسىن.

17. ونىڭ اتا-اناسى، تۋعان-تۋىستارىمەن قارىم-قاتىناسىنا ۇنەمى قولداۋ كورسەتىڭىز.

18. ونىمەن قىزىعۋشىلىقتارى تۋرالى اڭگىمەلەسىڭىز.

19. تۋعان- تۋىستاردىڭ الدىندا ماقتاپ، دارەجەسىن كوتەرىپ قويىڭىز.

20. يمانىنا كۇزەتشى بولىڭىز. ۇيىقتاپ قالىپ جاتسا، نامازعا وياتىڭىز. ەرلى- زايىپتىلار ءبىر- بىرىنە ءجانناتقا جەتەلەۋشى بولۋى كەرەك.

21. ونىڭ سورپانىڭ تۇزىن كوپ سالىپ جىبەرگەنى سەكىلدى كەمشىلىكتەرىنە كوز جۇما قاراڭىز. ايەلىڭىز تۋرالى تەك جاقسى ويدا بولىڭىز. تىم بولماعاندا وعان كەك ساقتاماڭىز.

22. ايەلىڭىزبەن اسىرەسە جۇكتى، حايىز كەزدەرىندە سابىرلى بولىڭىز.

23. جۇبايىڭىزدى قىزعانىڭىز. پايعامبارىمىز مۇحاممەد (س. ع. س.): «ايەلىن قىزعانباعان جان ءجانناتقا كىرمەيدى»، - دەگەن.

24. ءوز پىكىرىڭىزدى ونىكىنەن جوعارى قويىپ، ونىمەن اقىلداسپاي شەشىم قابىلداماڭىز.

25. دوستارىڭىزدى ايەلىڭىزدەن جوعارى قويماڭىز.

26. ايەلىڭىزگە ءۇي شارۋاسىندا كومەكتەسىپ تۇرىڭىز. ءۇيدىڭ بارلىق جاۋاپكەرشىلىگى ايەلدىڭ نازىك يىعىندا جاتىر. ونىڭ شارشاۋى مۇمكىن، سونداي كەزدەرى تۇسىنەتىنىڭىزدى ۇقتىرىپ، كەي ىستەرىن جەڭىلدەتىڭىز.

27. سوزدە دە، ىستە دە سىزگە ەڭ جاقسى ايەل بۇيىرعانىن ايتا ءجۇرىڭىز. سوندا جۇبايىڭىز ودان دا ۇلكەن ماحابباتپەن جاۋاپ بەرەتىن بولادى.

28. ايەلىڭىز ءۇشىن دۇعا جاساڭىز. تەك اللا تاعالا عانا سىزدەردىڭ نەكەلەرىڭىزگە ماحاببات پەن بەرەكە ءناسىپ ەتە الادى.

29. ونىڭ ەسىنە وتكەن قاتەلىكتەرىن سالا بەرمەڭىز.

30. وتباسىڭىزدى قارجىمەن قامتاماسىز ەتكەنىڭىز سەبەپتى كوكىرەگىڭىزدى كەرىپ، ءوزىڭىزدى وتباسىنداعى باستى ادام ساناماڭىز. ونىڭ دا وتباسىندا ءوز مىندەتتەرىن اتقارىپ جۇرگەن تەڭ قۇقىلى ادام ەكەنىن كورسەتىڭىز.

31. ونى تاماقتاندىرىڭىز. پايعامبارىمىز (س. ع. س. ) ۇمبەتىنە بۇل نارسەنى ۇيرەتتى. مۇنداي قارىم- قاتىناس ەرلى- زايىپتىلاردىڭ ءبىر- بىرىنە دەگەن ماحابباتى مەن مەيىرىمىن ارتتىرادى.

32. ايەلىڭىزگە جىلى جۇزبەن، جىميىپ قاراڭىز. بۇل - سۇننەت ءارى مەيىرىم.

33. بالالارىڭىزدى تاربيەلەۋگە كومەكتەسىڭىز. كوپتەگەن ەر ادامدار بالا قاراۋ ايەلدىڭ عانا ءىسى دەپ ويلايدى. بۇل - قاتەلىك. كەرىسىنشە كومەكتەسۋ كەرەك.

34. ايەلىڭىزگە ونىڭ ادەمى ەكەنىن ايتىپ تۇرىڭىز. ناتيجەسىندە جۇبايىڭىزدىڭ بۇرىنعىدان دا سۇلۋلانا باستاعانىن بايقايسىز.

35. ودان قۇپياڭىز بولماسىن. اراداعى سىر تۇسىنىسپەۋشىلىككە الىپ كەلۋى مۇمكىن. اللا تاعالا سىزدەردىڭ ۇيلەرىڭىز بەن جۇرەكتەرىڭىزدى تىنىشتىققا، ماحابباتقا، مەيىرىمدىلىككە تولتىرسىن! ءارى پايعامبارىمىز (س. ع. س. ) سەكىلدى ەڭ ابزال كۇيەۋلەردەن ەتسىن!

دەرەككوز: islam.kz سايتىنان