بۇل تۋرالى ءال- فارابيدىڭ 1150 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا وتىرىسىندا ق ر سىرتقى ىستەر ءمينيسترى مۇحتار تىلەۋبەردى ايتتى، دەپ حابارلايدى قازاقپارات ءتىلشىسى.
«ق ر سىرتقى ىستەر مينيسترلىگى ءابۋ ناسىر ءال- فارابيدىڭ 1150 جىلدىق مەرەيتويىن دايىنداۋ جانە وتكىزۋ جونىندەگى جالپى رەسپۋبليكالىق جوسپار جوبادا كوزدەلگەن ءىس- شارالاردى جۇزەگە اسىرۋعا دايىن. 2020-2021 -جىلدارى UNESCO قاتىسۋمەن اتاپ وتىلەتىن اتاۋلى مەرەيتوي كۇندەرىنىڭ تىزبەسىنە ءال- فارابيدىڭ مەرەيتويىن ەنگىزۋ جونىندە جۇمىس جۇرگىزىلۋدە. بۇل جونىندەگى شەشىم وسى 12-27 - قاراشا ارالىعىندا وتەتىن UNESCO باس كونفەرەنسياسىندا قابىلدانادى دەپ كۇتىلۋدە»، - دەدى مينيستر.
ونىڭ ايتۋىنشا، «ءال- فارابي ىزىمەن» اتتى حالىقارالىق ەكسپەديتسيا 2020 -جىلدىڭ قاڭتارىندا وتىراردان باستالادى.
ق ر س ءى م ءال- فارابي اتىنداعى قازاق ۇلتتىق ۋنيۆەرسيتەتى جانىنداعى ءال- فارابي عىلىمي- زەرتتەۋ ورتالىعىمەن اقىلداسا وتىرىپ، قازاقستاندىق فارابيتانۋشى عالىمداردىڭ قاتىسۋىمەن قاسيەتتى تۇركىستاندا عىلىمي- پراكتيكالىق كونفەرەنسيا وتكىزەدى. ودان كەيىن «ءال- فارابي ىزىمەن» ەكسپەديسياسى وزبەكستاندا - تاشكەنت، سامارقان، بۇحارا شاھارلارىندا بولىپ، تۇرىكمەنستاندا ەجەلگى مەرۆتىڭ ارحەولوگيالىق جانە ساۋلەت ەسكەرتكىشتەرى كەشەنىن ارالاپ، يراندا - نيشاپۋر، رەي، حامادان كونە قالالارعا زيارات جاسايدى. تاشكەنت، اشعاباد جانە تەگەراندا سول ەلدەردىڭ فارابيتانۋشى عالىمدارىمەن بىرگە دوڭگەلەك ۇستەلدەر وتكىزىلەدى. يراكتىڭ استاناسى باعدات قالاسىنداعى ءال- فارابي ۋنيۆەرسيتەتىندە شىعىستىڭ ۇلى ويشىل عالىمىنىڭ ەسكەرتكىشى اشىلاتىن بولادى.
«سودان كەيىن 2020 -جىلعى 21 - قاڭتاردا ق ر مادەنيەت جانە سپورت ءمينيسترى باستاعان دەلەگاتسيا مەن ەكسپەديتسيا مۇشەلەرى داماسكىدە ەلباسىمىزدىڭ تاپسىرماسىمەن سالىنعان ءال- فارابي ورتالىعىن سالتاناتتى تۇردە اشادى. قازىر بۇل ورتالىقتى رەتكە كەلتىرۋ جۇمىستارى جۇرگىزىلۋدە. پرەزيدەنتتىڭ تاپسىرماسى بويىنشا 4-7 - قاراشادا ق ر سىرتقى ىستەر، مادەنيەت جانە سپورت، ءبىلىم جانە عىلىم مينيسترلىكتەرىنىڭ جاۋاپتى قىزمەتكەرلەرى مەن «قاز قايتا جاڭارتۋ» مەكەمەسىنىڭ ماماندارى سيرياعا ءىس- ساپارمەن شىعادى. ساپار بارىسىندا سيريا تاراپىمەن داماسك قالاسىنداعى ءال- فارابي ورتالىعىن سالتاناتتى اشۋ جونىندە ءتيىستى كەلىسسوزدەر جۇرگىزەدى. 2020 -جىلدىڭ ساۋىرىندە «اريستوتەلدەن كەيىن «ەكىنشى ۇستاز» اتالعان ءابۋ ناسىر ءال- فارابيدىڭ الەم وركەنيەتىنە قوسقان ۇلەسى» تاقىرىبىندا عىلىمي- پراكتيكالىق كونفەرەنسيا افينا قالاسىنداعى «پانتەون» ساياسي جانە الەۋمەتتىك عىلىمدار ۋنيۆەرسيتەتىندە بولادى»، - دەدى مۇحتار تىلەۋبەردى.
سونداي- اق ءمينيستردىڭ دەرەگىنشە، يسلام ىنتىماقتاستىق ۇيىمىنا مۇشە ەلدەردىڭ سىرتقى ىستەر مينيسترلەرىنىڭ 47- سەسسياسى اياسىندا ءال- فارابيدىڭ 1150 جىلدىعىنا ارنالعان فوتوكورمە اشىلادى. ال پاكىستاننىڭ كاراچي قالاسىندا ي ى ۇ- نىڭ جانىنداعى كومستەك عىلىمي- تەحنولوگيالىق ىنتىماقتاستىق جونىندەگى تۇراقتى كوميتەتى اياسىندا ءال- فارابي شىعارماشىلىعىنا ارنالعان عىلىمي- پراكتيكالىق كونفەرەنسيا وتەدى. مىسىردىڭ «ءال- ازھار»، كاير ۋنيۆەرسيتەتتەرى جانە قازاق ۇلتتىق ۋنيۆەرسيتەتى عالىمدارى «ءابۋ ناسىر ءال- فارابي مۇراسى ەنتسيكلوپەدياسىن» اراب جانە قازاق تىلىندە جارىققا شىعارۋدى قولعا الدى.
«وزدەرىڭىزگە ءمالىم، 2020 -جىلعى قازان ايىندا دۋبايدا دۇنيەجۇزىلىك ەكسپو كورمەسى ءوز جۇمىسىن باستايدى. قازاقستان پاۆيلونىندا ءال- فارابي ورتالىعىن اشۋدى كوزدەپ وتىرمىز. وسى ورايدا ەكسپو كەزىندە وتەتىن الەمدىك ۇكىمەت سامميتىندە «قايىرىمدى قوعام تۋرالى ءال- فارابي كوزقاراستارىنىڭ ومىرشەڭدىگى» اتتى ارنايى پلەنارلىق سەسسيا وتكىزۋ تۋرالى ۇسىنىس ەنگىزەمىز. قازاقستان «باقىت كواليتسياسىنا» مۇشە بولىپ تابىلاتىندىقتان، بۇل شارانى ق ر اقپارات جانە قوعامدىق دامۋ مينيسترلىگى قولعا الادى دەگەن سەنىمدەمىز. 2020 -جىلعى 18 - قاراشادا، ياعني UNESCO اياسىندا اتاپ وتىلەتىن الەمدىك فيلوسوفيا كۇنى قارساڭىندا پاريجدەگى UNESCO شتاب- پاتەرىندە ق ر ءبىلىم جانە عىلىم، مادەنيەت جانە سپورت مينيسترلىكتەرىمەن بىرلەسىپ، ءابۋ ناسىر ءال- فارابيدىڭ مەرەيتويىنا ارنالعان حالىقارالىق عىلىمي كونفەرەنسيا جانە تاقىرىپتىق كورمە وتكىزىلەدى. وسى ءىس- شارالارعا بەدەلدى عالىمدار، تاريحشىلار جانە باسقا ەلدەردىڭ ماماندارى شاقىرىلاتىن بولادى»، - دەدى ول.
مۇحتار تىلەۋبەردى قازاقستاننىڭ ەلشىلىكتەرى ۇلتتىق اۋدارما بيۋروسىمەن بىرلەسىپ، ءال- فارابي ەڭبەكتەرىن شەت تىلدەرگە اۋدارۋعا اتسالىسۋعا دايىن ەكەندىگىن باسا ايتتى. قازاقستاننىڭ ۆاشينگتونداعى ەلشىلىگى دە ءال- فارابي ەڭبەكتەرىنىڭ اعىلشىن تىلىندەگى اۋدارماسىنىڭ تانىستىرىلىمىن ا ق ش كونگرەسسىنىڭ كىتاپحاناسىندا ۇيىمداستىرىپ، ا ق ش- تىڭ اناليتيكالىق ورتالىقتارىنىڭ بىرىنە رەسمي تابىستاۋدى جوسپارلاپ وتىرعاندىعىن اتاپ ءوتتى.
«سونىمەن قاتار ءانۋار ءالىمجانوۆتىڭ «ۇستازدىڭ ورالۋى» اتتى كوركەم كىتابى دا بىرنەشە تىلدەرگە اۋدارىلاتىن بولاتىن. ىستانبۇل مەن دەلي قالاسىنداعى «ءال- فارابي ۇيلەرىنىڭ» قىزمەتتەرىن جانداندىرۋعا دا كوپ كوڭىل بولۋدەمىز. 40 جۋىق شەت ەلدەردە ءابۋ ناسىر ءال- فارابيدىڭ 1150 جىلدىعىنا ارنالعان فوتوكورمەلەر ۇيىمداستىرىلادى. «قازپوشتانىڭ» اتسالىسۋىمەن ا ق ش، شۆەيساريا، گەرمانيا، نيدەرلاند، تۇركيا، لاتۆيادا ءال- فارابيدىڭ 1150 جىلدىعىنا ارنالعان سول ەلدەردىڭ مەرەكەلىك پوشتا ماركالارى شىعارىلادى»، - دەدى مينيستر.
اۆتور: مارلان جيەمباي