جانازانى قانشا ۋاقىتتا شىعارۋ كەرەك؟
ال ەندى ولگەن كىسىنى - ءمايىت نەمەسە مارقۇم دەيمىز. بۇل ماسەلەگە قاتىستى ابدۋللا يبن ومار (ر. ا. ) اللا ەلشىسىنىڭ (س. ع. س. ) بىلاي دەپ ايتقان حاديسىن جەتكىزەدى:
«ەگەر سەندەردەن بىرەۋ قايتىس بولسا، ونى كەشىكتىرمەڭدەر جانە قابىرىنە قويۋعا اسىعىڭدار»، - دەگەن (تاباراني).
مارقۇمنىڭ قايتىس بولعانىن الىس-جاقىن اعايىن-تۋىسقا، كورشى-قولاڭعا حابار جىبەرىپ، جانازا نامازى ۋاقىتىن بەلگىلەپ، جەرلەۋ راسىمىنە اسىعۋ - مۇستاحاب. ول ارالىقتا الىس-جاقىن اعايىندارى، بالالارى مەن كەلىندەرى، كورشىلەس اۋىلداعى جولداستارى مەن دوستارى كەلىپ ۇلگىرەدى، جانازا نامازىنا قاتىسادى. سەبەبى، قاراجول مەن اۋە جولدارى دامىعان مىنا زاماندا الىستاعى بالا-شاعا جانە جاقىن اعايىن جىلدام جەتۋ مۇمكىندىگىنە يە.
ءمايىتتى سەبەپسىز ۇزاق ۇستاۋ، جەرلەۋدى كەشىكتىرۋ مارقۇمعا ابىروي بەرمەيدى، ونىڭ ساۋابى دا جوق، كەرىسىنشە، مارقۇمعا قۇرمەتسىزدىك، ءارى سۇننەتكە نەمقۇرايلىق. مارقۇمدى ءۇزىرسىز ۇزاق ۇستاعانمەن پايدا جوق، دەنەنى تەزىرەك جەرگە تاپسىرعان ءجون. اللانىڭ ەلشىسى (س. ع. س. ) كەلەسى حاديسىندە:
«مايىتتەرىڭدى جەرلەۋگە اسىعىڭدار. ءمايىت جاقسى كىسى بولسا جاقسىلىعىنا تەزىرەك جەتكىزىڭدەر، ال جامان كىسى بولسا، توزاق يەلەرى بىزدەن الىس بولسىن» دەگەن (يمام الاۋ اد- دين كاساني ءال- حانافي. «ءبادايۋس- ساناي»).