«ءالىپبي - تەك گرافيكا ەمەس، ءبىزدىڭ ۇلتتىڭ بولاشاعى. ول - مادەني كودتىڭ ءبىر بولشەگى، كوممۋنيكاتسيا قۇرالى. سوندىقتان، بۇل ماسەلەگە كەلگەندە اسىقپاي، اڭداپ باسۋ كەرەك. لاتىن قارپىنە كوشۋدە ۇزدىك ۇلگى رەتىندە تۇركيا مەملەكەتى ءجيى ايتىلادى. الايدا كوپشىلىك جاڭا ءالىپبيدى ەنگىزۋ ءۇشىن تۇركيا وتىز جىل بويى تىنىمسىز جۇمىس جۇرگىزگەنىن ەسكەرە بەرمەيدى. اتاتۇرىك كەزىندە سىرتقى دا، ىشكى كۇشتەردەن وراسان زور قارسىلىققا تاپ بولعان. بىلۋىمشە، ول ءتىپتى ەل ارالاپ، بۇل شەشىمنىڭ قانشالىقتى ماڭىزدى ەكەنىن تۇسىندىرۋمەن بولعان. بىزگە ولاي ەتۋدىڭ قاجەتى جوق. سەبەبى، قازاق تىلىندە سويلەيتىن ازاماتتاردىڭ اسا باسىم بولىگى لاتىن قارپىندەگى قازاق الىپبيىنە كوشۋ باستاماسىن قوس قولىن كوتەرە قولداپ وتىر» ، - دەدى داۋرەن ابايەۆ «اشىق ديالوگ» باعدارلاماسىندا.
ءمينيستردىڭ ايتۋىنشا، جاڭا الىپبيگە قاتىستى پىكىرتالاستار بارشىلىق. دەسە دە، ولار تەحنيكالىق سيپاتتاعى ماسەلەلەر عانا ەكەنىن ەسكەرۋ كەرەك.
«پىكىرتالاستاردىڭ بولعانى دا دۇرىس. بۇل دەگەنىڭىز كوپشىلىكتىڭ ءتىل تاعدىرىنا بەي- جاي قارامايتىنىن بىلدىرەدى. قازاق ءتىلىنىڭ جاڭا ءالىپبيى بويىنشا لينگۆيستەر دە، ءتىل تانۋشىلار دا، ءتىپتى IT- ماماندار دا جۇمىس جۇرگىزىپ جاتىر. سوندىقتان، كەي سۇراقتار بويىنشا قايشىلىقتىڭ بولعانىنا اسا تاڭعالۋدىڭ رەتى جوق. بۇل نيۋانستاردىڭ بارلىعىن ەلباسى دا، پرەزيدەنتىمىز قاسىم- جومارت توقايەۆ تا ءبىلىپ وتىر. مىنە، وسى سەبەپتى اتالعان باعىتتاعى جۇمىستى جالعاستىرۋعا پارمەن بەرىلدى. مەنىڭ ويىمشا، جاقىن ارادا بارلىعىنىڭ - وقۋشىلاردان باستاپ پروفەسسورلارعا دەيىن كوڭىلىنەن شىعاتىن جاڭا نۇسقا تانىستىرىلادى» ، - دەدى داۋرەن ابايەۆ.
ەسكە سالا كەتسەك، وسىدان بىرنەشە كۇن بۇرىن مەملەكەت باسشىسى قاسىم- جومارت توقايەۆ مادەنيەت جانە سپورت ءمينيسترى ا. رايىمقۇلوۆاعا جاڭا ءالىپبيدى جەتىلدىرۋ جونىندە تاپسىرما بەردى. بۇل تۋرالى ق ر پرەزيدەنتى ءوزىنىڭ Twitter- دەگى پاراقشسىندا جازدى.