بۇل اقپاراتتى گونكونگتىڭ قاۋىپسىزدىك ءمينيسترى دجون لي تاراتتى.
اتالعان زاڭ جوباسى جازدىڭ باسىنان باستاپ گونكونگ حالقىن دۇرلىكتىرىپ، قارسىلىق اكسيالارعا شىعۋعا تۇرتكى بولدى. زاڭ جوباسىنا قارسىلار وسى قۇجاتتاردى ديسسسيدەنتتەر مەن ادىلەتسىز سوتتالعانداردى قىتاي سوتىنىڭ قولىنا بەرۋ ءۇشىن پايدالانۋى مۇمكىن دەپ سانايدى.
قارسىلىق اكسيالارىنىڭ سوڭى جاپپاي قوزعالىسقا اينالىپ، دەموكراتيالىق وزگەرىس جاساۋدى تالاپ ەتە باستادى. گونكونگ اكىمشىلىگى زاڭ جوباسىنان باس تارتقانىن بىرنەشە رەت مالىمدەسە دە نارازىلىق تىيىلمادى. قارسىلىق بىلدىرۋشىلەر زاڭ جوباسىن رەسمي تۇردە قايتارىپ الۋ جانە قىتايدان گونكونگتىڭ ەگەمەندىگىن قورعاۋ جونىندە ۇران كوتەرىپ، نارازىلىق اكسياسىن ۇدەتە ءتۇستى.
بىرنەشە ايعا سوزىلعان قارسىلىق اكسيالارى كەزىندە پوليتسيامەن قاقتىعىس تا بولدى. بەلسەندىلەردى تاراتۋ ماقساتىندا پوليتسيا كۇش قولداندى، ءبىر رەت اتىس قارۋىن پايدالاندى. مىڭداعان ادام جاراقاتتانىپ، ەكى جارىم مىڭنان استام ادام قاماۋعا الىندى. قارسىلىق بىلدىرۋشىلەر ەندى قاماۋدا وتىرعانداردى بوساتۋدى تالاپ ەتە باستادى.
قازىرگى جاعدايدا كۇدىكتى سانالعان ادامدى قىتايعا ەكستراديتسيالاۋ - گونكونگتىڭ 1997-جىلى قىتايدىڭ زاڭ اياسىنا كوشكەنگە دەيىن جاساعان كەلىسىمى نەگىزىندە جۇزەگە اسىرىلادى.