ەلباسى: جاپونيا - ازياداعى ماڭىزدى سەرىكتەستەرىمىزدىڭ ءبىرى
بۇل تۋرالى بۇگىن قازاقستاندىق «ارحيۆ-2025» باعدارلاماسىن قولداۋ جونىندەگى جاپونيا ۇكىمەتىنىڭ جوباسىمەن تانىسقان ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«وسى جولى توكيوعا ەل ۇكىمەتىنىڭ شاقىرۋىمەن يمپەراتور نارۋحيتونىڭ تاققا وتىرۋ شاراسىنا قاتىسۋ ءۇشىن كەلدىم. وتكەن جىلدار ىشىندە قۇرمەتتى يمپەراتور اكيحيتومەن، جاپون ۇكىمەتىنىڭ باسشىلىعىمەن جىلى ادامي قارىم-قاتىناس ورناعانىن اتاپ وتە الامىن. قۇرمەتتى يمپەراتور اكيحيتو سياقتى مەن دە وسى جىلى مەملەكەت باسشىسى وكىلەتتىگىنەن ءوز ەركىممەن باس تارتتىم. ءبىزدىڭ زااڭناماعا سايكەس، ماعان ەلباسى - ۇلت كوشباسشىسى بولۋ مۇمكىندىگى بەرىلىپ وتىر. ياعني، توكيوعا تۇڭعىش پرەزيدەنت - ەلباسى مارتەبەسىندە العاش رەت كەلىپ وتىرمىن»، - دەدى ەلباسى.
قازاقستاننىڭ تۇڭعىش پرەزيدەنتى «حەنسەي» داۋىرىندە جاپونياعا ساپارلار مەن كەلىسسوز بارىسىندا يمپەراتورمەن جانە ەل ۇكىمەتىمەن ءتۇرلى ەكىجاقتى جانە حالىقارالىق ماسەلەلەردى تالقىلاپ، بارلىق ۋاقىتتا ورتاق تۇسىنىستىككە كەلگەنىن اتاپ ءوتتى.
«يمپەراتور حارۋحيتومەن دە قازاقستان-جاپونيا قارىم-قاتىناسى حالىقتارىمىزدىڭ يگىلىگى ءۇشىن جەمىستى دامي بەرەتىنىنە سەنىمدىمىن. قازاقستان «كەڭەيتىلگەن سەرىكتەستىك» دەڭگەيىنە جەتكەن جاپونيانى ازياداعى ماڭىزدى سەرىكتەستەردىڭ ءبىرى رەتىندە قاراستىرادى. قۇجاتقا پرەمەر-مينيستر ابەمەن بىرگە قول قويعان ەدىك»، - دەدى نۇرسۇلتان نازاربايەۆ.