داريعا نازاربايەۆا رەسەيمەن ۆيزالىق رەجىمدەگى ماسەلەنى شەشۋدى ۇسىندى

ماسكەۋ. قازاقپارات - قازاقستان رەسپۋبليكاسى پارلامەنتى سەناتىنىڭ ءتوراعاسى داريعا نازاربايەۆا ر ف فەدەرالدىق جينالىسى فەدەراتسيا كەڭەسىنىڭ سپيكەرى ۆالەنتينا ماتۆيەنكومەن كەزدەسۋ بارىسىندا قازاقستان-رەسەي قاتىناستارىنىڭ جاي-كۇيى مەن بولاشاعىن تالقىلادى، دەپ حابارلايدى «قازاقپارات» ح ا ا مەنشىكتى ءتىلشىسى.

«وزدەرىڭىز بىلەتىندەي، ەكى ەلدىڭ قارىم-قاتىناسىندا ازاماتتاردىڭ ارى-بەرى قاتىناۋ رەجىمى وتە ماڭىزدى. بۇل جاعدايدا 2014 -جىلدان باستاپ بىزدە قازاقستان ازاماتتارىنىڭ رەسەيدە بولۋى جانە رەسەي ازاماتتارىنىڭ قازاقستاندا بولۋى تۋراسىندا ناقتى پاريتەت بولعان جوق»، - دەدى سەنات سپيكەرى.

ونىڭ ايتۋىنشا، ۆيزالىق رەجىمگە سايكەس، قازاقستان ازاماتتارى رەسەيدە 90 كۇن بولا الادى.

«سودان كەيىن ولار رەسەيدەن كەتىپ قالىپ، قايتادان 90 كۇننەن كەيىن كىرە الادى. قازاقستانعا كىرگەن رەسەي ازاماتتارى دا 90 كۇن تۇرىپ، ەلدەن شىعىپ كەتكەنىمەن، سول كۇنى قايتا ورالىپ، كەلەسى 90 كۇن ءبىزدىڭ ەلدە بولادى»، - دەدى داريعا نازاربايەۆا.

سەنات ءتوراعاسىنىڭ ايتۋىنشا، بۇل ماسەلە ناقتى شەشىمىن تاپپاي جاتىر.

«بۇل ماسەلەنىڭ 2012 -جىلدىڭ ماۋسىمىنان بەرگى ءوز «تاريحى» بار. قازىرگى ۋاقىتتا بۇل ماسەلە رەسەيلىك تاراپتىڭ قاراۋىندا جاتىر. ونىڭ شەشىمى ازاماتتاردىڭ ءومىرىن جاقسارتار ەدى. ينتەگراتسيالىق پروتسەستەردىڭ ارقاسىندا ءارتۇرلى سەبەپپەن رەسەيگە باراتىن ازاماتتاردىڭ قارقىندى لەگى ارتۋ ۇستىندە»، - دەدى ول.

اۆتور: ايان بەكەن ۇلى