ادىلبەك جاقسىبەكوۆ ۋ ە ف ا-نىڭ حاتىنا وراي شۇعىل وتىرىس وتكىزدى
فەدەراتسيانىڭ باسپا ءسوز قىزمەتىنەن ءمالىم ەتكەندەي، جيىنعا ق ف ف باس حاتشىسى ازامات ايتقوجين، قازاقستاننىڭ كاسىپقوي فۋتبول ليگاسىنىڭ باسشىسى ولجاس ابرايەۆ، تورەشىلەردىڭ ساراپتامالىق كوميسسياسىنىڭ ءتوراعاسى سەرگەي كەنەتايەۆ، سونىمەن قاتار ق ف ف زاڭ دەپارتامەنتىنىڭ ديرەكتورى ءارى Integrity officer الىبەك نۇرسەيىتوۆ قاتىستى.
«ەڭ الدىمەن، ۋ ە ف ا-دان تۇسكەن اقپارات تۋرالى ايتىلدى. سپورت سالاسىندا اقپارات جيناپ، تالداۋ جاسايتىن Sportradar كورپوراتسياسى ەۋروپالىق فۋتبول قاۋىمداستىعىنا قازاقستاندىق كاسىپقوي فۋتبول كلۋبتارىنىڭ ويىندارىندا سپورتتىق تارتىستىڭ قاعيدالارى ساقتالمايتىنىن حابارلاعان. Sportradar كورپوراتسياسى - ءباس تىگۋدە كۇماندى مالىمەتتەردى تالدايتىن ساراپتامالىق ۇيىم. ءبىرىنشى ليگا كوماندالارى اراسىندا قازاقستان بىرىنشىلىگىنىڭ ويىندارى سول مالىمەتتەرگە ىلىككەن. «اقتوبە» فۋتبول كلۋبىنىڭ جانىنان قۇرىلعان «اقتوبە- جاس» جاستار كومانداسىنىڭ وسى ىسكە قاتىسى بار ەكەنى انىقتالعان»، - دەلىنگەن تاراتىلعان حابارلامادا.
جيىنعا «اقتوبە» كومانداسىنىڭ باس ديرەكتورى سامات سماقوۆ تا شاقىرىلعان.
«سونىمەن قاتار، تالدىقورعاندىق «جەتىسۋ ب» كومانداسىنىڭ ويىنشىسىنىڭ دە وسى ىسكە قاتىسى بار ەكەنى انىقتالدى. ادىلەتتى ويىندى ساقتاۋ كوميتەتىنىڭ وتىرىسى جاقىن ارادا وتەدى»، - دەدى ق ر فۋتبول فەدەراتسياسىنان.
ەسكە سالساق، وسىدان بىرنەشە كۇن بۇرىن ءا. جاقسىبەكوۆ كلۋبتار مەن تورەشىلەرگە ۇندەۋ جولداپ، ءادىل ويىن پرينسيپتەرىن قاتاڭ ساقتاۋعا شاقىرعان بولاتىن.
ءوز كەزەگىندە «اقتوبە» ف ك باس ديرەكتورى سامات سماقوۆ كلۋب وكىلدەرىنىڭ كەلىسىلگەن ماتچتارعا قاتىسقاندىعىن راستادى. ونىڭ مالىمدەمەسى كلۋبتىڭ رەسمي سايتىندا ورنالاستىرىلعان.
«وكىنىشكە وراي، مەن بىرنەشە ويىنشىنىڭ كەلىسىلگەن ماتچتارعا قاتىسقاندىعى تۋرالى اقپاراتتى راستاۋعا ءماجبۇرمىن. اڭگىمە ءبىرىنشى جانە ەكىنشى ليگا ماتچتارى جايلى. وسىعان وراي، بارلىق «اقتوبە» جانكۇيەرلەرىنە قاراتا ايتقىم كەلەدى. «اقتوبە» ەمبلەماسىن توسىنە تاعىپ جۇرگەن فۋتبولشىلار كەلىسىلگەن ماچتارعا قاتىسادى دەگەن ءۇش ۇيىقتاسام تۇسىمە كىرمەپتى. بۇل مەن ءۇشىن ۇلكەن شوك بولدى.
بۇگىن قازاقستان فۋتبول فەدەراتسياسىندا بولدىم. ول جاقتا بارلىق جاعدايدان حاباردار، ءجىتى باقىلاۋدا ۇستاپ وتىر. قىسقاسى - ءبارى «جەتىسۋ-ب» كومانداسىنىڭ كاپيتانىنان باستالدى. ول «اقتوبە- جاس» جانە «اقتوبە- ج» ويىنشىلارىمەن بايلانىسقا شىققان، ءتىپتى وسىندا كەلگەن. ءوزارا بىرنەشە كەزدەسۋ بولعان. بۇنىڭ ءبارىن ۋكراينا ەلىنىڭ ادامدارىنىڭ باقىلاۋىندا بولعان. كۇمان جاز بەل ورتاسىنا كەلگەن كەزدە تۋىنداي باستاعان ەدى. ءبىراق ءبىز ناقتى ءبىر دالەل بولماعاندىقتان ەشقانداي كىنا ارتا المادىق. قازىرگى ۋاقىتتا دالەلدەر بار - ويىنشىلاردىڭ ءوز كىنالارىن مويىنداپ جازعان تۇسىنىكتەمەلەرى الىندى. ەڭ قىنجىلتاتىنى - وسىنىڭ ءبارىن ءبىز ۇلكەن سەنىم ارتىپ كەلگەن ءوزىمىزدىڭ جەرگىلىكتى ويىنشىلارىمىز جاسادى. ونىڭ ۇستىنە كلۋبتىڭ ءدال وسىنداي قيىن كەزەڭىندە ولاردىڭ وسىنداي لاس قادامعا بارىپ وتىرعاندارى كوڭىلگە ۇلكەن قاياۋ تۇسىرەدى»، - دەدى س. سماقوۆ.
ءبىراق كلۋب باسشىسى تالاپتاردى بۇزعان ويىنشىلاردىڭ ەسىمدەرىن اتامادى.
«ادامي فاكتورلارعا بايلانىستى ولاردىڭ اتى-جوندەرىن ايتپاۋدى ءجون كوردىم. بىرىنشىدەن، ولار ءوز-وزدەرىن جازالادى. ەكىنشىدەن، ماعان ولاردىڭ اتا-انالارى كەلىپ، ۇلدارى ءۇشىن كەشىرىم سۇرادى. ولار وسى قالانىڭ تۇرعىندارى، ءالى دە تۇرا بەرەدى.
ءبىزدىڭ كەيبىر جانكۇيەرلەرىمىز بۇل جاعدايدى ءارتۇرلى قابىلداپ جاتىر. وسىعان ەرەكشە توقتالا كەتسەم. «اقتوبە» جانكۇيەرلەرىنىڭ ەڭ جانقيار، ەڭ ۇزدىك ەكەندىگىنە ەشكىم دە كۇمان كەلتىرە المايدى. ءبىراق تاياقتىڭ ەكى ۇشى بار. كەيبىر ادامدار جاعدايدى تولىق بىلمەي تۇرا سان-ساققا جۇگىرتىپ اكەتتى. بولماعان نارسەنى بولعانداي ەتىپ، اينالاداعىنىڭ بارىنە كىنا ارتىپ جاتىر، ماعان قاراتا دا نەشە ءتۇرلى ايىپتاردى قيىپ سالدى. اسىرەسە، كلۋب ىشىنەن رەزونانس تۋدىرىپ، كلۋبتى «قۇرتقىسى» كەلىپ جۇرگەن جاندار «تىرىسىپ-اق» باعۋدا»، - دەدى ول.
سونداي-اق سماقوۆ قوردالانعان ماسەلەلەر بار ەكەنىن، ءبىراق ولاردى ءاپ-ساتتە شەشۋ مۇمكىن ەمەس ەكەنىن اتاپ ءوتتى. ونىڭ ايتۋىنشا، ەڭ باستىسى، كوماندا الدىنداعى جالاقى بەرەشەگى جابىلدى. قارىز سوماسى كلۋبتىڭ ءبىر جىلدىق بيۋدجەتىنە تاياپ قالعان بولاتىن.
ول بارشا شىنايى جانكۇيەرلەردى كلۋبتى قانداي جاعداي بولسا دا قولداي بەرۋگە شاقىردى.