پرەزيدەنت قازاقستاننىڭ ءارقاشان پريەۆەنتيۆتى ديپلوماتيانى جاقتايتىنىن ايتتى

سوچي. قازاقپارات - قازاقستان ايماقتىق داۋ-جانجالداردى رەتتەۋدە ادال بىتىمگەرلىكتى دۇرىس كورەدى جانە پريەۆەنتيۆتى ديپلوماتيا مەن قارۋسىزداندىرۋدىڭ جۇيەلى جاقتاۋشىسى بولىپ قالا بەرەدى.

بۇل تۋرالى سوچيدە ءوتىپ جاتقان «ۆالداي» حالىقارالىق پىكىرتالاس كلۋبىنىڭ جىل سايىنعى XVI وتىرىسىندا قازاقستان پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات.

«قازاقستان ايماقتىق داۋ-جانجالداردى رەتتەۋدە ادال بىتىمگەرلىكتى دۇرىس كورەدى جانە پريەۆەنتيۆتى ديپلوماتيا مەن قارۋسىزداندىرۋدىڭ جۇيەلى جاقتاۋشىسى بولىپ قالا بەرەدى. مىسالى، استانا پروتسەسى اياسىندا سيرياارالىق كەلىسسوزدىڭ 13- راۋندى ءوتتى. وندا رەسەي تاراپىنىڭ جاعىمدى ءرولى ايقىن كورىنىپ تۇر»، - دەپ اتاپ ءوتتى مەملەكەت باسشىسى.

«سيريالىق سيۋجەت - تاياۋ شىعىستا قالىپتاسقان اسا اۋىر جاعدايدىڭ ءبىر ەلەمەنتى. سوندىقتان قازاقستاننىڭ حالىقارالىق رەسۋرستارىن ەسكەرە وتىرىپ، بۇۇ باس اسسامبلەياسىنىڭ مىنبەرىنەن اتالعان ايماق ءۇشىن ومىرشەڭ شەشىمدەردى تابۋعا باعىتتالعان كۇش-جىگەردى قولداۋعا دايىن ەكەنىمدى جەتكىزدىم»، - دەيدى پرەزيدەنت.

«ءبىز اۋعانستانعا ءجىتى كوڭىل ءبولىپ، ءتيىستى كومەكتى كورسەتىپ وتىرمىز. سوڭعى ايلاردا ونداعى جاعداي، وكىنىشكە قاراي، ايتارلىقتاي قيىنداپ كەتتى. بارلىق مۇددەلى تاراپتاردىڭ كومەگىمەن اۋعانارالىق پروتسەسس بۇل ەلگە كوپتەن كۇتكەن بەيبىت ءومىردى الا كەلەدى دەگەن ۇمىتتەمىز»، - دەپ اتاپ ءوتتى ق. توقايەۆ.

ايتا كەتەيىك، قازاقستان پرەزيدەنتى قاسىم-جومارت توقايەۆ سوچيدە ءوتىپ جاتقان «ۆالداي» حالىقارالىق پىكىرتالاس كلۋبىنىڭ جىل سايىنعى XVI وتىرىسىنا قاتىستى. «الەمدىك قۇرىلىم: شىعىستان كوزقاراس» تاقىرىبىمەن ءوتىپ جاتقان «ۆالداي» حالىقارالىق پىكىرتالاس كلۋبىنىڭ جىلسايىنعى XVI وتىرىسىنا قازاقستان پرەزيدەنتىمەن بىرگە يوردانيا كورولى ابداللا II، ازەربايجان پرەزيدەنتى يلحام اليەۆ جانە فيليپپين پرەزيدەنتى رودريگو دۋتەرتە قاتىسىپ جاتىر.