ول CBS تەلەارناسىنىڭ «60 مينۋت» باعدارلاماسىنا بەرگەن سۇقباتىندا «يراندى تەجەۋگە باتىل ارەكەت جاسالماسا، الەم مۇددەسىنە قاۋىپ توندىرەتىن جاعداي ۋشىعا بەرەتىنىن» ايتقان.
بيىل 14- قىركۇيەكتە ساۋد ارابياسىنىڭ مۇناي وڭدەۋ زاۋىتىنا درونمەن شابۋىل جاسالىپ، ساۋد ارابياسى وندىرەتىن مۇناي تەڭ جارىمىنا دەيىن قىسقارعان. ساۋد ارابياسى دۇنيەجۇزىندەگى مۇنايدىڭ 10 پايىزىن وندىرەدى.
ساۋد ارابياسىنىڭ بيلىگى مەن ا ق ش مەملەكەتتىك حاتشىسى مايك پومپەو مۇناي وڭدەۋ زاۋىتىنان جاسالعان شابۋىلدى سوعىسپەن تەڭەستىرىپ، وعان يراندى كىنالاعان. فرانسيا، گەرمانيا جانە بريتانيا دا تەگەراندى ايىپتاعان. يران شابۋىلعا قاتىسى جوعىن مالىمدەپ، ايىپتاۋلاردى تەرىسكە شىعاردى. الايدا، يران قولدايتىن يەمەندىك كوتەرىلىسشى - حۋسيتتەر مۇناي وڭدەۋ زاۋىتىنا جاسالعان شابۋىلعا جاۋاپكەرشىلىكتى مويىندارىنا العان.
ساۋد ارابياسىنىڭ مۇناي زاۋىتىنا جاسالعان شابۋىلدان كەيىن الەمدە مۇناي باعاسى وسكەن.
وسى وقيعادان كەيىن نارىقتا تۋعان مۇناي سۇرانىسىن وزگە مۇناي ءوندىرۋشى ەلدەر دەرەۋ پايدالانا ما دەگەن سۇراق پايدا بولعان. وسىعان ۇقساس ساۋال قازاقستاننىڭ ەنەرگەتيكا ءمينيسترى قانات بوزىمبايەۆقا دا قويىلعان. ول «قازاقستان ساۋد ارابياسىنداعى جاعدايدى پايدالانادى دەۋ» ەتيكاعا قايشى كەلەتىنىن ءارى قازاقستان وپەك الدىنداعى مىندەتتەمەسى بويىنشا 2020 -جىلدىڭ ناۋرىز ايىنا دەيىن قازىرگى مەجەدەن ارتىق مۇناي وندىرە المايتىنىن» ايتقان.