دزيۋدودان الەم چەمپيوناتى: قازاقستان قۇراماسى تۇڭعىش رەت ءتورتىنشى ورىنعا كوتەرىلدى

الماتى. قازاقپارات - الماتىدا دزيۋدودان جاس وسپىرىمدەر اراسىندا مارەگە جەتكەن الەم چەمپيوناتىندا قازاقستان قۇراماسى جالپىكوماندالىق ەسەپتە ءتورتىنشى ورىنعا يە بولدى، دەپ حابارلايدى قازاقپارات ءتىلشىسى.

قازاقستاندىقتار 1 التىن، 1 كۇمىس، 4 قولا، بارلىعى التى مەدالمەن 61 ەلدىڭ ىشىنەن ۇزدىك تورتتىككە ىلىكتى.

اتاپ ايتقاندا، نۇرقانات سەرىكبايەۆ التىن، ءمادينا پاراگۋلگوۆا كۇمىس، ءاليما جۇماعاليەۆا، ءادىل مارلەن، تىلەگەن تىنارباي جانە ايدار اراپوۆ قولا جۇلدەنى ەنشىلەدى.

قازاقستان جاس وسپىرىمدەر قۇراماسىنىڭ اعا باپكەرى عاينوللا ەسەنعاليەۆتىڭ Olympic.kz سايتىنا ءمالىم ەتكەنىندەي، العاش رەت وسىنشاما مەدال ەل قورجىنىنا ءتۇستى.

ونىڭ سوزىنە قاراعاندا، كەيبىر جاس وسپىرىمدەر قاتەلىكتەر جىبەردى. دەگەنمەن ولار جاس، كادەتتەر قاتارىندا ءالى دە ونەر كورسەتەتىن بولادى.

نۇرقانات سەرىكبايەۆ تاماشا كۇرەسسە، ءمادينا پاراگۋلگوۆا ءۇمىتتى اقتادى. باسقالارى دا فينالعا ءبىر قادام جەتپەي توقتادى.

«ءبىز چەمپيونات قوجايىندارى رەتىندە قوس قۇرامانى جارىسقا قوسا الدىق. وليمپيادالىق دايارلاۋ ورتالىقتارىندا جاقسى جۇمىس اتقارىلدى. قازاقستان دزيۋدو فەدەراتسياسى تاراپىنان جان-جاقتى قولداۋدى سەزىندىك. 2017-جىلعى الەم چەمپيوناتىندا قازاقستان تەك ءبىر قولا مەدال العان- دى. 2018-جىلعى جاس وسپىرىمدەر وليمپياداسىندا دا جۇلدەسىز قالعان جوقپىز. بۇل جولى، مىنە، قازاقستان جاس وسپىرىمدەر قۇراماسى تاريحي ناتيجە كورسەتىپ وتىر. ەندى 2003-2004-جىلعى جاس وسپىرىمدەردى دايارلايتىن بولامىز. ولاردى ىرىكتەپ، ازيا چەمپيوناتى مەن «ازيا بالالارى» جارىسىنا دايىندالامىز»، دەدى الەم چەمپيوناتىن قورىتىندىلاعان عاينوللا ەسەنعاليەۆ.

جارىستىڭ سوڭعى كۇنى قازاقستان قۇراماسى ارالاس كوماندالىق جارىستا ءبىرىنشى كەزدەسۋىندە-اق موڭعوليا دزيۋدوشىلارىنان ۇتىلىپ، جۇلدەلى ورىندار ءۇشىن تالاسا المادى.

ەسكە سالا كەتەيىك، بۇدان بۇرىن قازاقستاندىق دزيۋدوشىنىڭ الەم چەمپيوناتىنىڭ كۇمىس جۇلدەگەرى اتانعانىن جازعان بولاتىنبىز.

اۆتور: ەلجان ەرالى