الماتىدا ايەلدەر اراسىندا جۇگىرۋدەن جارىس ءوتتى
جارىسقا 450 ادام قاتىستى، دەپ حابارلايدى قازاقپارات.
جارىسقا 10-14 جاس ارالىعىنداعى جاس سپورتشىلار العاش رەت قاتىستى. 3 شاقىرىمدى 11 مينۋت 24 سەكۋندتا ەڭسەرگەن ريما گرانكينا جەڭىمپاز اتاندى.
نەگىزگى قاشىقتىقتىڭ قاتىسۋشىلارى 7 شاقىرىم جۇگىردى. ولاردىڭ اراسىندا مارە سىزىعىنا ءبىرىنشى بولىپ كەلگەندەر مىنالار:
1-ورىن - تاتيانا نەروزناك (0:26:31)،
2-ورىن - دانا گۋساروۆا (0:27:58)،
3-ورىن - ەكاتەرينا شاتنايا (0:30:24).
جاس ساناتى بويىنشا دا سپورتشىلاردى ماراپاتتاۋ ءراسىمى ءوتتى. اتاپ ايتقاندا، پولينا رەپينا - 15-29 جاستاعى قاتىسۋشىلار اراسىندا، سۆەتلانا الەحينا - 30-39 جاس، الميرا قۇسايىنوۆا - 40-49 جاس، زانفيرا چەرنۋحينا - 50 جاستان اسقاندار اراسىندا ءبىرىنشى ورىن يەلەندى.
ءوز قاشىقتىعىن تۇگەل جۇگىرىپ وتكەن قىزداردىڭ بارلىعى مارە سىزىعىنا جەتكەن سوڭ مەدالدارمەن ماراپاتتالدى.
«مەن 2017 -جىلدان بەرى جۇگىرەمىن. قازىر الماتى جارتىلاي مارافونىنا دايىندالىپ جاتىرمىن. العاش رەت 21 شاقىرىم قاشىقتىققا جۇگىرەم. ايەلدەر جارىسىنا ەكىنشى رەت قاتىسىپ وتىرمىن. مەنىڭ ماقساتىم - جەڭىمپاز اتانۋ نەمەسە جەكە رەكورد ورناتۋ ەمەس. ماعان ايەلدەر اراسىنداعى جۇگىرۋ جارىسى اتموسفەراسىمەن ۇنايدى. ءىس-شارانىڭ ءوزى جاڭا جەتىستىكتەردى باعىندىرۋعا ىنتالاندىرادى» ، - دەدى بۇگىنگى جارىستىڭ قاتىسۋشىسى كاميللا سەيسەبايەۆا.
ايەلدەر جارىسىندا ەڭ ادەمى كيىنگەن ارۋلار دا اتاپ ءوتىلدى.
بالالار اراسىنداعى جارىستا نەگىزگى ءتۇس سارى بولسا، 7 شاقىرىمدىق قاشىقتىققا جۇگىرگەندەر اق كيىم كيىپ شىقتى. قىزعىلت كيىم كيگەن قىزدار سكانديناۆيالىق ءجۇرىس بويىنشا دا سىنعا ءتۇستى. بۇل سپورت تۇرىمەن اينالىساتىندار سانى جىلدان جىلعا ارتىپ كەلەدى.
«سكانديناۆيالىق جۇرىسپەن شۇعىلدانىپ جۇرگەنىمە ءبىر جىلدان استى، - دەيدى «الماتى مارافونىنىڭ» قاتىسۋشىسى وكسانا كيم. - بۇل سپورتقا كوڭىل اۋدارۋىما كۇيەۋىم ىقپال ەتتى. ول ەكى جىلدان بەرى مارافوندارعا قاتىسىپ ءجۇر. وعان جانكۇيەر رەتىندە كەلىپ، جارىستىڭ اتموسفەراسىن كورگەننەن كەيىن ءوزىمنىڭ قاتىسقىم كەلدى. بىردەن جارىس جولىنا شىعۋ قيىن بولدى. سوندىقتان سكانديناۆيالىق ءجۇرىس - مەن ءۇشىن وڭتايلى جول. قىزىمىز «الماتى مارافونىنىڭ» بالالار اراسىنداعى سىنىنا قاتىسىپ جاتىر. بۇل ءبىزدىڭ وتباسىلىق حوببيگە اينالدى».
ەندىگى ۇلكەن شارا - الماتى جارتىلاي مارافونى 13 -قازاندا وتەدى. جارىسقا 5000 عا جۋىق ادام قاتىسادى دەپ جوسپارلانعان.