قارتتاردى ەڭ الدىمەن بالالارى مەن نەمەرەلەرى قۇتتىقتاسا ەكەن - سارا تاسەمەنوۆا

قارتتار كۇنىندە ولاردىڭ ەشقايسى ۇمىت قالمايدى، دەپ حابارلايدى قازاقپارات ءتىلشىسى.

1 -قازان - حالىقارالىق قارتتار كۇنى. ۇلكەندى سىيلاپ، قۇرمەتتەۋ - ەجەلدەن كەلە جاتقان اتا سالتىمىز. بيىل دا وسى مەرەكە قارساڭىندا ەلىمىزدە قارتتاردى قولداۋ ايلىعى ۇيىمداستىرىلدى. سولتۇستىك قازاقستان وبلىسىندا 21 -قىركۇيەك كۇنى قايىرىمدىلىق سەنبىلىگى ءوتتى. وعان 550 دەن استام كاسىپورىن مەن ۇيىم قاتىستى. كوپتەگەن ەڭبەك ۇجىمدارى ءبىر كۇندىك جالاقىلارىن اۋدارىپ جاتىر. ارداگەرلەر كەڭەسى ۇيىمداستىرۋ كوميتەتىنىڭ شەشىمىمەن بۇل قاراجاتتىڭ P كەڭەستىڭ ەسەپشوتىنا اۋدارىلسا، قالعانى مەكەمەنىڭ ارداگەرلەرىنە قالماق.

«كورسەتىلىپ جاتقان كومەككە العىسىمىز شەكسىز. ەسەپشوتقا ءتۇسىپ جاتقان قاراجاتتى ەڭ الدىمەن مۇقتاج زەينەتكەرلەردىڭ قاجەتىنە جۇمسايمىز. وتە اۋىر جاعدايدا تۇرىپ جاتقان قارتتارىمىز بار. ولارعا ءدارى-دارمەك، وتىن-كومىر، ءتىپتى، كيىم-كەشەككە دەيىن كەرەك. سوڭعى جىلدارى اۋىلداردان زەينەتكەرلەرىمىز كوپتەپ كوشىپ كەلىپ جاتىر. ولار ءوز ۇجىمدارىنان ايرىلىپ قالدى، ءبىز ولاردى مەكتەپتەرگە ءبولىپ بەردىك. مەرەكە كۇنى ولارعا وقۋشىلار كونسەرت قويادى. ءبىزدىڭ ازىن-اۋلاق سىيلىعىمىز بار. ارينە، وبلىس ورتالىعىنداعى بارلىق كاسىپورىن-ۇيىمدار ءداستۇر بويىنشا ءوز زەينەتكەرلەرىن قۇتتىقتايتىن بولادى»، - دەيدى پەتروپاۆل قالالىق ارداگەرلەر كەڭەسىنىڭ ءتوراعاسى سارا تاسەمەنوۆا.

قازىر پەتروپاۆل قالاسىندا 44 مىڭ 151 زەينەتكەر تۇرادى. 49 ۇلى وتان سوعىسىنىڭ ارداگەرى، مايدانگەرلەردىڭ 280 جەسىرى، لەنينگراد قۇرساۋىنىڭ 6 تۇرعىنى جانە فاشيستىك كونسلاگەرلەردىڭ كامەلەتكە تولماعان 16 تۇتقىنى تۇرادى. تەك پەتروپاۆلدا عانا ارداگەرلەردىڭ ەكى جۇزدەن استام باستاۋىش ۇيىمى بار.

«قارت ادامدارعا ەڭ باستىسى كوڭىل عوي. ءبىز ارداگەرلەر كەڭەسى قالا تۇرعىندارىنان ەڭ الدىمەن وزدەرىنىڭ قارت اتا-انالارىنا كوڭىل ءبولۋىن سۇرايمىز. مەرەكە كۇنى قاستارىنان تابىلسا، قال- جاعدايلارىن سۇراپ، ۋاقىتتارىن بولسە - بالالارىنىڭ تىلەۋىن تىلەپ وتىرعان اتا-اناعا ودان ارتىقتىڭ كەرەگى دە جوق»، - دەيدى سارا تاسەمەنوۆا.

پەتروپاۆل قالالىق ارداگەرلەر كەڭەسى ءتوراعاسىنىڭ ايتۋىنشا، 1 -قازان كۇنى وبلىس ورتالىعىندا كوپتەگەن ءىس- شارالار وتپەك. جاستار سارايىندا سالتاناتتى مەرەكەلىك شارا وتسە، ن. پوگودين اتىنداعى وبلىستىق ورىس دراما تەاترىندا قايىرىمدىلىق سپەكتاكلى قويىلماق. سونداي-اق مەرەكە كۇندەرى ارداگەرلەردىڭ شاحماتتان سپارتاكياداسى وتەدى.

زەينەتكەرلەردىڭ بۇل ءىس-شارالارعا قوعامدىق كولىكپەن تەگىن قاتىناۋعا مۇمكىندىكتەرى بار. بۇعان دەيىن «س ق و اۆتوكولىك وداعى» قاۋىمداستىعىنىڭ ءداستۇرلى اكسيانى بيىل دا جالعاستىراتىنىن ايتقان ەدىك.

اۆتور: اقەركە داۋرەنبەك قىزى