قوستانايداعى اقىندار ايتىسىنىڭ فينالىنا شىققاندار بەلگىلى بولدى
ايتىستىڭ اشىلۋىندا قوستاناي وبلىسى اكىمىنىڭ ورىنباسارى مارات جۇندىبايەۆ ءسوز سويلەپ، وبلىس اكىمى ارحيمەد مۇحامبەتوۆتىڭ قۇتتىقتاۋىن جەتكىزدى. بۇگىنگى ءسوز دوداسىنىڭ جۇرگىزۋشىسى، ق ر ەڭبەك سىڭىرگەن قايراتكەرى ءجۇرسىن ەرماننىڭ ايتۋىنشا، رەسپۋبليكالىق ايتىس ەكى كۇنگە سوزىلادى. ۇزدىك شىققان التى اقىن ەرتەڭ وتەتىن فينالدىق كەزەڭگە قاتىسادى. قازىلار القاسىنىڭ قۇرامىندا حالىق اقىنى ءاسيا بەركەنوۆا، ق ر جازۋشىلار وداعىنىڭ ءتوراعاسى ۇلىقبەك ەسداۋلەت، ق ر مادەنيەت قايراتكەرى اقىلبەك شاياحمەت، اقىن، پروفەسسور امانجول التايەۆ، ادەبيەتتانۋشى، «دارىن» سىيلىعىنىڭ لاۋرەاتى ەلدوس توقتارباي بار.
«ايتىس - كونسەرت ەمەس. سۋرىپسالما اقىندار ويعا كەلگەن ءسوزدى ىرىكپەي، حالىق كۇتكەن دۇنيەلەردى ورتاعا سالادى. بۇل ايتىستى «Nur Otan» پارتياسى قولداپ، قوستاناي وبلىسى اكىمدىگى ۇيىمداستىرىپ وتىر. ءتول ونەرىمىزدىڭ پارتيا قامقورلىعىنا الىنعانىن ايتا كەتۋ كەرەك. بۇگىنگى ءسوز بايگەسى قازاق ادەبيەتىنىڭ بايتەرەگى بەيىمبەت مايلينگە ارنالىپ وتىر. قازاقتىڭ ءۇش بايتەرەگىنىڭ قايسىسى بولسا دا، ۇلتى ءۇشىن ايانباي ەڭبەك ەتتى، سول ءۇشىن قيانات كوردى. سولاردىڭ ءبىرى - ءبي-اعاڭ قازاق ءومىرىنىڭ سۋرەتىن جاساپ بەردى. ونىڭ «راۋشان كوممۋنيست» ، «شۇعانىڭ بەلگىسى» سىندى ومىرشەڭ شىعارمالارى ءالى كۇنگە دەيىن ماڭىزىن جوعالتپادى. بۇگىن دە قازاقتىڭ رۋحىن ىزدەگەن اقىندار ساحناعا شىققالى وتىر»، - دەدى ءجۇرسىن ەرمان.
سونىمەن، رەسپۋبليكالىق ءسوز سايىسىنا س. قۇسانبايەۆ (وسكەمەن)، ا. قاليەۆ (ارقالىق)، س. وتەلبايەۆا (قوستاناي)، ءا. ەرەجە قىزى (نۇر-سۇلتان)، ج. جۇپارحان (س ق و)، ە. داۋلەت ۇلى (اقمولا وبلىسى)، ش. سەزىمحان (الماتى)، م. سۇلتانحان ( قىزىلوردا)، ا. بيسەنعاليەۆ (ب ق و)، م. ىزتىلەۋ، ت. وتەپبايەۆ، م. وسپانوۆ، ب. ساعىنتايەۆ، م. بايزاقوۆ (بارلىعى قوستاناي وبلىسىنان) سىندى اقىندار قاتىستى.
ايبەك قاليەۆ پەن مەيىربەك سۇلتانحان العاشقى جۇپتى قۇرادى. قازىلار ەكى اقىنعا دا جوعارى ۇپاي كوتەرىپ، فينالعا جولداما بەردى. سونداي-اق، اقتىق سىنعا وتكەندەردىڭ اراسىندا سەرىك قۇسانبايەۆ، شۇعايىپ سەزىمحان، اسەم ەرەجە قىزى، سالتانات وتەلبايەۆا، توبا وتەپبايەۆ، اينابەك بەيسەنعاليەۆتەر بار.
ايتا كەتەيىك، ايتىس جەڭىمپازىنا تەمىر تۇلپار تاپسىرىلادى. فينالدىق كەزەڭ بۇگىن ساعات 11.00 دە باستالادى.