دزيۋدودان الەم چەمپيوناتى: قازاقستان قورجىنىنا تاعى ەكى مەدال ءتۇستى
جارىستىڭ ەكىنشى كۇنى قازاقستان قۇراماسىنان نۇرسۇلتان زايزاعاليەۆ، ءادىل مارلەن جانە تىلەگەن تىنارباي قولا جۇلدە ءۇشىن كۇرەسۋگە مۇمكىندىك الدى.
60 كەلىگە دەيىنگى سالماقتا ن. زايزاعاليەۆ پەن ءا. مارلەن ءوزارا قولا مەدالدى ساراپقا سالدى. بەلدەسۋ بارىسىندا ۆازاري ادىسىمەن نۇرسۇلتان الدا كەلە جاتقان- دى. الايدا تورەشى تاراپىنان وعان ءۇش ەسكەرتۋ بەرىلىپ، جەڭىس ءادىلدىڭ ەنشىسىندە كەتتى.
باتىس قازاقستاندىق ن. زايزاعاليەۆ جارتىلاي فينالدا جاپونيالىق دزيۋدوشىعا (كەيىن ول الەم چەمپيونى اتاندى) ەسە جىبەرگەن ەدى. ال ءا. مارلەن جارتىلاي فينالدا وسى بىرىنشىلىكتىڭ كۇمىس جۇلدەگەرى، ازەربايجاندىق كامران سۇلەيمانوۆتان ۆازاري ادىسىمەن ۇتىلىپ قالدى.
تاعى ءبىر قازاقستاندىق تىلەگەن تىنارباي 66 كەلىگە دەيىنگى سالماقتا تاتاميگە شىقتى. ول قولا جۇلدە ءۇشىن باسەكەدە گرەكيالىق سپورتشىمەن بەلدەستى. قارسىلاسىنا ءۇش مارتە ەسكەرتۋ بەرىلگەننەن كەيىن تىلەگەن قولا جۇلدەگە يە بولدى.
ەسكە سالا كەتەيىك، بۇدان بۇرىن قازاقستاندىق دزيۋدوشىنىڭ الەم چەمپيونى اتانعانىن جازعان بولاتىنبىز.
جارىستىڭ العاشقى كۇنى نۇرقانات سەرىكبايەۆ جەڭىمپاز اتانسا، ءاليما جۇماعاليەۆا قولا جۇلدەگە يە بولعان ەدى.