اتىراۋدا «التىن تۇلپار» الامان بايگەسى وتەدى
ق ر ۇلتتىق سپورت قاۋىمداستىعى حابارلاعانداي، الامان بايگە قازاقستان رەسپۋبليكاسىنىڭ تۇڭعىش پرەزيدەنتى، ەلباسى ن. نازاربايەۆتىڭ «رۋحاني جاڭعىرۋ» باعدارلاماسى اياسىندا «نۇر-وتان» پارتياسىنىڭ قولداۋىمەن، ق ر ۇلتتىق سپورت قاۋىمداستىعى مەن اتىراۋ وبلىستىق اكىمدىگىنىڭ بىرلەسە ۇيىمداستىرۋىمەن وتپەك.
ايتا كەتەيىك، «التىن تۇلپار» بايگەسى 2014-جىلدان بەرى قاراي، ءتورت مارتە نۇر-سۇلتان قالاسى ماڭىندا ءوتتى. قازاقى قولتۋما جۇيرىك جىلقىلار تۇقىمىنىڭ قالىپتاسۋىنا ىقپال جاساۋ جانە ۇزاققا شاباتىن بايگە اتتارىن باپتايتىن اتبەگىلەردى ىنتالاندىرۋ ماقساتىندا قولعا الىنعان بۇل ات جارىسى قازىرگى كەزدە قازاقستاننىڭ ەڭ ۇزدىك سايگۇلىكتەرى قاتىساتىن، ايتۋلى اتبەگىلەردىڭ اسىعا كۇتەتىن مەرەكەسىنە اينالدى.
«التىن تۇلپار» رەسپۋبليكالىق تۋرنيرىنىڭ باس بايگەسىن 2014-جىلى قاراعاندى وبلىسىنىڭ جۇيرىگى «باقتورى»، 2015-جىلى جامبىل وبلىسىنىڭ تۇلپارى «سامال»، 2016-جىلى جەتىسۋ ولكەسىنىڭ جۇيرىگى «جاننۇر»، 2017-جىلى جامبىل وبلىسىنىڭ تۇلپارى «سامال» ەكىنشى مارتە ۇتتى.
وتكەن جىلى ۇيىمداستىرۋشىلار القاسى «التىن تۇلپار» بايگەسىن ەلوردا توڭىرەگىندە عانا ەمەس، ەلىمىزدىڭ باسقا وڭىرلەرىندە دە وتكىزگەن ءجون دەپ شەشكەن بولاتىن. سونداي-اق، اتالعان جارىستى جىل سايىن ەمەس، ەكى جىلدا ءبىر رەت وتكىزۋ تۋرالى كەلىسىمگە كەلگەن.
بيىلعى الامان بايگەنىڭ رەسمي اتاۋى - «التىن تۇلپار - جايىق جاعاسىندا» V رەسپۋبليكالىق تۋرنيرى. قاشىقتىعى - 51 شاقىرىم. باس بايگەسى - 10 ميلليون تەڭگە. جالپى جۇلدە قورى - 22 ميلليون تەڭگە.
ناقتىلاپ ايتار بولساق، الدىڭعى كەلگەن توعىز جۇيرىككە بايگە بار. الامان جارىسقا جۇيرىك جىلقى تۇقىمدارىنىڭ بارلىعى جىبەرىلىپ، ەلىمىزدىڭ 14 وبلىسى جانە نۇر-سۇلتان، الماتى، شىمكەنت قالالارىنىڭ ءارقايسىسىنان 5 سايگۇلىكتەن قاتىسا الادى. وتىنىمدەر 11-قازانعا دەيىن قابىلدانادى.
سونداي-اق، 11-12- قازاندا اتىراۋ قالاسى كۇنىنە وراي، اتىراۋ وبلىسى اكىمدىگىنىڭ باستاماسىمەن، اتىراۋ وبلىسى دەنە شىنىقتىرۋ جانە سپورت باسقارماسىنىڭ، وبلىستىق «ۇلتتىق سپورت تۇرلەرى» فەدەراتسياسىنىڭ ۇيىمداستىرۋىمەن، ماحامبەت اۋدانى المالى اۋىلىندا «دارابوز-2019» حالىقارالىق تۋرنيرى وتەدى. وندا، كوكپار، اۋدارىسپاق، قازاق كۇرەسى، تەڭگە ءىلۋ، جامبى اتۋ، الامان، توپ جانە قۇنان بايگە، جورعا جارىسى، قۇماي تازى جارىستارى سىندى ۇلتتىق سپورت تۇرلەرىنەن جارىستار وتەدى. بۇل تۋرنيرگە قازاقستان جانە شەتەل كوماندالارى قاتىسادى. جارىستىڭ جۇلدە قورى - 32180000 تەڭگە.
اۆتور: كۇنسۇلتان وتارباي