«مەنى ەلەس، كەمپىر دەپ مازاقتادى»: اقتاۋلىق اق قىزداردىڭ اناسى جۇرتتىڭ تۇسىنىسپەۋشىلىگى تۋرالى ايتتى
وزگەلەردەن ەرەكشە بولمىسى ءۇشىن قينالعان قىزدار بۇگىندە فوتومودەل بولىپ قىزمەت ەتىپ ءجۇر. قىزدارىن العاش رەت ەفيرگە الىپ شىققان اناسى بالالارى مۇنداي ەرەكشە بولىپ تۋىلادى دەپ ويلاماعانىنىن ايتادى.
بۇل تۋرالى «ءبىر سۇراق» باعدارلاماسى حابارلايدى.
ايمان سارقىتوۆا ۇلكەن قىزى البينوس بولىپ تۋىلعاندا تۋىس-تۋعانداردىڭ بارلىعى تاڭقالعانىن جاسىرمايدى. ال قىزدارىنىڭ باسقا بالالاردان سىرتقى كەلبەتىنەن بولەك قانداي دا ءبىر ايىرماشىلىعى بار ما دەپ جۇرگىزۋشى عالىم كالمەن سۇراعاندا:
«باسقا بالالاردان ەشقانداي ايىرماشىلىعى جوق. تەك دالاعا شىققاندا كۇنگە قاراي الماي قينالادى. كۇننىڭ ساۋلەسىنە شىدامايدى. تەرىلەرى وتە سەزىمتال بولعاندىقتان كۇنگە كۇيۋگە بولمايدى. سوسىن كورۋ قابىلەتى تومەن»، - دەدى اناسى.
«باسىندا كوشەدەن كورگەندە ادامدار «ءسىزدىڭ قىزىڭىز با، اكەسى قازاق پا، ورىس پا دەپ سۇراپ جاتاتىن. سول كەزدە كەيىپ، رەنجيتىنمىن. ءتۇرى قازاق قوي، نەگە ولاي سۇرايدى ەكەن دەپ»، - العاشىندا ادامدار تاراپىنان تۇسىنىسپەۋشىلىك بولعانىن ايتقان اناسى ۇلكەن قىزىنىڭ سىرت سوزدەن كوپ قينالعانىن تىلگە تيەك ەتتى...
«اسىرەسە ۇلكەن قىزىمىز قاتتى قينالدى. كىشكەنتاي كەزىندە ەسىك الدىندا ويناۋعا شىققاندا ۇيگە جىلاپ قايتىپ كەلەتىن. «مەنى ەلەس، كەمپىر دەپ مازاقتادى» دەپ رەنجيتىن. كىشتەنتاي بالا بولعان سوڭ تۇسىنبەيدى عوي. سول سوزدەرگە كوڭىل كۇيى بولماي جۇرەتىن»، - دەگەن اناسى قىزىنىڭ مەكتەپكە بارعانشا وسىلاي قينالعانىن، كەيىن مەكتەپتە جاقسى قابىلداعانىن ايتادى.