قازاقستاندا ادەبي اگەنت جۇيەسىن قۇرۋ كەرەك - سماعۇل ەلۋباي
دەپ حابارلايدى قازاقپارات ءتىلشىسى.
بەلگىلى جازۋشى سماعۇل ەلۋبايدىڭ ايتۋىنشا، اۋدارماشى اۆتوردىڭ وبالىنا قالماۋى كەرەك. ول ءۇشىن ادەبي اگەنت جۇيەسىن ىسكە قوسۋ قاجەت. قازىرگى زاماندا ونسىز ادەبيەتتىڭ ماڭدايى جارىق بولا قويمايدى. ادەبي شىعارمانىڭ وزگە تىلگە اۋدارىلۋى وتە كۇردەلى پروبلەما.
«مەنىڭ «اقبوز ءۇي» رومانىم يسپان تىلىنە اۋدارىلدى. وعان ءبارىمىز قۋاندىق. كەيىن سول ەلدىڭ شىعارماشىلىق اداممىمەن كەزدەسىپ، كىتاپتى كورسەتتىم. سوندا ول ماعان «وتە ناشار اۋدارما» دەدى. قۋانىشىم سۋ سەپكەندەي باسىلدى. ونىمەن كىم اينالىسقانىن بىلمەدىم. اتى- جونىنەن دە، قانداي شىعارمالار اۋدارعانىنان دا حابارسىزبىن. ءاربىر ەلدە ادەبي اگەنت دەگەن بولادى. ولار ءبارىن قاداعالاپ وتىرادى: كىتاپتى قالاي تاراتۋ كەرەك، قاي باسپادان شىعارۋ كەرەك، قاي اۋدارماشىعا بەرۋ كەرەك. وسىنىڭ ءبارىن ءوز موينىنا الادى»، - دەيدى سماعۇل ەلۋباي.
ونىڭ ايتۋىنشا، دامىعان ەلدەردىڭ بارىندە جازۋشى مەن باسپا اراسىنداعى دانەكەر ءرولىن اگەنتتەر اتقارادى. جازۋشىلار ۇيىندە وتىرىپ جازۋمەن عانا اينالىسادى.
«مۇنى ايتىپ وتىرعان سەبەبىم - اۋدارمانى دا قاداعالايتىن سول ادەبي اگەنتتەر. وزىنە پايدا تۇسەتىن بولعاندىقتان اۆتورمەن بىردەي جانى اشيدى، تابانىنان تاۋسىلعانشا جۇگىرەدى. سول جۇيەنى قولعا المايىنشا اۋدارما ىسىنە كۇمانمەن قاراپ وتىرا بەرەمىز»، - دەدى جازۋشى.
بۇعان دەيىن، مەملەكەت جانە قوعام قايراتكەرى ولجاس سۇلەيمەنوۆ، قازاق جازۋشىلارىنىڭ شىعارمالارىن ۇزدىك ماماندار اۋدارۋ كەرەكتىگىن ايتقان بولاتىن.
ەسكە سالا كەتسەك، الماتىدا حالىقارالىق جازۋشىلار فورۋمى ءوتىپ جاتىر. وعان 18 مەملەكەتتەن 81 دەلەگات قاتىسۋدا.
اۆتور: الما مۇقانوۆا