وسىعان قاراي ق ر پارلامەنتى ءماجىلىسىنىڭ ءتوراعاسى نۇرلان نىعماتۋلين باسپا ءسوز ءماسليحاتىن ۇيىمداستىرىپ، ەلىمىزدە العاش رەت وتكەن حالىقارالىق شارانى قورىتىندىلادى، دەپ حابارلايدى قازاقپارات ءتىلشىسى.
«بۇگىن ءبىز كوپتەگەن ءتۇرلى پىكىرلەردى، ءتىپتى وسى سەسسيا بارىسىندا وتكىر ءسوز سويلەۋلەردى دە ەستىدىك. ءبىزدىڭ بارلىعىمىز دا ۇيىمداستىرۋشىلارمەن بىرگە قاتىسۋشىلار اراسىندا ديالوگ ورناتۋ ءۇشىن بارىنشا قولايلى جاعداي جاساۋعا ۇمتىلدىق. سونىڭ ارقاسىنا سەنىم مەن سەرىكتەستىكتى جولعا قويۋعا بولادى. ءبىر كەڭەسپەن مەملەكەتتەر، وڭىرلەر اراسىنداعى بارلىق تەكەتىرەستى الىپ تاستاۋ مۇمكىن ەمەستىگى تۇسىنىكتى دە. الايدا، قالاي دەسەك تە ءبىز بىرلەسكەن كۇش-جىگەرىمىزبەن بارلىق سەرىكتەستەرىمىزگە كومەكتەسۋگە تىرىستىق»، - دەدى ءماجىلىس سپيكەرى.
ونىڭ اتاپ وتۋىنشە، بۇگىنگى كەڭەسكە قاتىسقان بارلىق وكىلدەر پارلامەنتتىك ديپلوماتيا ديالوگىنىڭ ماڭىزدىلىعىن جەتە تۇسىنگەن.
«ءبىز قابىلداعان قورىتىندى مالىمدەمەدە «ەۋرازيادا ديالوگ، سەنىم جانە سەرىكتەستىك بولۋى ءتيىس» دەگەن ورتاق پايىمىمىزدى بىلدىرەمىز. مۇنى ءبىزدىڭ حالىقتارىمىز كۇتىپ وتىر. ءبىز تولىققاندى سەسسيا وتكىزدىك»، - دەدى ءماجىلىس ءتوراعاسى.
نۇرلان ءىعماتۋلينننىڭ اتاپ وتۋىنشە، كەڭەس بارىسىندا جيىنعا قاتىسۋشىلار ءتۇرلى سالالارداعى كوپجاقتى جوبالاردى جۇزەگە اسىرۋ بارىسىن تالقىلاپ. ولاردى زاڭنامالىق قامتاماسىز ەتۋ بويىنشا تاجىريبە الماستى.
«مەنىڭشە، بۇگىن پارلامەنت سپيكەرلەرى جاريا ەتكەن باستامالار مەن ۇسىنىستار ەۋرازيا مەملەكەتتەرىن سەرىكتەستىكتىڭ جاڭا دەڭگەيىنە شىعارۋعا مۇمكىندىك بەرەدى جانە بۇكىل ەۋرازيالىق كەڭىستىكتەگى قاۋىپسىزدىك پەن بىرلىكتى قالىپتاستىرۋعا سەپتىگىن تيگىزەدى»، - دەدى ول.