چيلي پرەزيدەنتى تابيعاتتى ساقتاۋدىڭ ءتورت جولىن ۇسىندى

نيۋ-يورك. قازاقپارات - چيلي پرەزيدەنتى سەباستيان پينەرا ادامزاتتى قورشاعان ورتانى ايالاۋعا شاقىردى، دەپ حابارلايدى قازاقپارات.

«ادام - ساناوى جاراتىلىس، الايدا ول ءوز پلانەتاسىن جويىپ جىبەرە الادى. وسى قايشىلىقتى بىزدەر رەتتەۋىمىز كەرەك. كليمات وزگەرىپ جاتىر، ول دالەلدەنگەن. اڭگىمە وعان سەنۋ جانە سەنبەۋدە ەمەس. بۇل تەك بيولوگيا عانا ەمەس، عىلىمي نەگىزدەگى ماسەلە. سوندىقتان بىزدەرگە عالىمداردىڭ ايتقانىنا قۇلاق تۇرۋگە تۋرا كەلەدى»، - دەدى سەباستيان پينەرا ب ۇ ۇ باس اسسامبلەياسىنىڭ 74-سەسسياسىندا.

ونىڭ ايتۋىنشا، سوڭعى بەس جىلدا اۋا رايى وتە ىستىق بولعان. مۇنى بارلىق كورسەتكىشتەر انىق كورسەتتى.

«سوندىقتان ءبىزدىڭ جۇمىسىمىزدى وزگەرتۋ كەرەك ەكەندىگىنە ءشۇبا جوق. تابيعاتتىڭ جانايقايىنا قۇلاق ءتۇرىپ ونى قورعاۋىمىز كەرەك. پلانەتامىز جانە تابيعاتىمىز ءبىزسىز دە ءومىر سۇرە الادى، الايدا ءبىز ولارسىز قۇرىپ كەتەمىز. قازىر سوڭعى 800 جىلداعى ەڭ جوعارعى پارنيك گازدارى مەن ەڭ ىستىق تەمپەراتۋرا تىركەلىپ وتىر. بىزدە ەكى جول عانا بار، ارى قاراي نە بولارىن كۇتۋ، نەمەسە وسى باعىتىمىزدى وزگەرتۋ، وسىنى باياعىدا قولعا الۋعا ءتيىس ەدىك»، - دەپ اتاپ ءوتتى چيلي پرەزيدەنتى.

ول ادامزاتتىڭ كەرى ىقپالىنان تابيعاتتى قورعاپ قالۋدىڭ ءتورت جولىن اتادى.

«ءبىزدىڭ الدىمىزدا ەكى جول بار، تابيعاتقا اسەر ەتەتىن سالداردى بارىنشا جەڭىلدەتۋ جانە سوعان كوندىگۋ. ءبىز العا جىلجۋ ءۇشىن، ءبىرىنشى ەنەرگيا وندىرۋدە كومىرسۋتەكتەن تولىعىمەن باس تارتۋعا ءتيىسپىز. ەكىنشى - قوعامدىق كولىكتى رەفورمالاۋ ارقىلى ەلەكتركولىكتەرگە اۋىسۋ. ۇشىنشىدەن بارلىق سەكتوردا ەنەرگيالىق تيىمدىلىكتى ساقتاۋ. توترىنشىدەن ورمانداردى جاپپاي قالپىنا كەلتىرۋ قاجەت»، - دەدى س. پينەرا.

«چيلي ورمانى بار الەمدەگى ەلدىڭ ءبىرى، الايدا ونىڭ كولەمى ازايماعان. سونىمەن قاتار، ءبىز ءبىر رەتتىك قولدانىلاتىن زاتتاردان باس تارتۋىمىز كەرەك، بىزدە قالدىقتى قايتا- قايتا پايدالاناتىن تسيركۋلياتسيا ەكونوميكاسى بولۋى ءتيىس. چيلي وسى جولمەن كەلە جاتىر. بۇل تابيعاتتى قورعاۋدان اينىماستىق قانا ەمەس، ءبىر- بىرىمىزگە دەگەن دۇرىس قارىم- قاتىناستان اينىماستىق»، - دەدى ول.

نيۋ-يورك قالاسىندا ءوتىپ جاتقان ب ۇ ۇ باس اسسامبلەياسىنىڭ 74-سەسسياسىندا كوتەرىلگەن باستى تاقىرىپتاردىڭ ءبىرى ادامزاتتىڭ جاھان كليماتىنا نەگاتيۆتى اسەرىمەن كۇرەس ماسەلەسىن تالقىلاۋ بولدى.

ەسكە سالا كەتەيىك، مەملەكەت باسشىسى قاسىم-جومارت توقايەۆ امەريكا قۇراما شتاتتارىنا جۇمىس ساپارىمەن باردى.

بۇعان دەيىن حابارلانعانداي، مەملەكەت باسشىسى باس اسسامبلەيانىڭ جالپى پىكىرسايىسىندا بايانداما جاسايدى. بيىل اتالعان پىكىرسايىس «كەدەيلىكتى جويۋ، ساپالى ءبىلىم بەرۋدى جانە كليماتتى ساقتاۋ ءىس- قيمىلدارى مەن جان-جاقتى تاسىلدەردى ىلگەرىلەتۋ ءۇشىن كوپجاقتى كۇش- جىگەردى شوعىرلاندىرۋ» تاقىرىبىندا وتەدى

ق ر پرەزيدەنتى نيۋ-يوركتە وتەتىن بىرىككەن ۇلتتار ۇيىمى باس اسسامبلەياسىنىڭ 74-سەسسياسىنا قاتىسادى. ساپار 5 كۇنگە جالعاسادى دەپ جوسپارلانىپ وتىر. ونىڭ اياسىندا كوپتەگەن شەت مەملەكەتتەردىڭ باسشىلارىمەن ەكىجاقتى كەزدەسۋلەر وتەدى.

ودان بولەك قاسىم-جومارت توقايەۆتىڭ ب ۇ ۇ-نىڭ باس حاتشىسى انتونيۋ گۋتەرريشپەن، ءبىرقاتار مەملەكەت جانە ۇكىمەت باسشىلارىمەن، حالىقارالىق ۇيىم جەتەكشىلەرىمەن، امەريكالىق بيزنەس، ترانسۇلتتىق كومپانيا وكىلدەرىمەن، ا ق ش-تىڭ ساياسي ءارى ساراپشى توپ مۇشەلەرىمەن كەزدەسۋى جوسپارلانعان.

ايتا كەتەيىك، پرەزيدەنتتىڭ ا ق ش-قا كەلۋى قارساڭىندا امەريكالىق بەدەلدى باسىلىم «The Hill»  گازەتىندە ونىڭ ماقالاسى جارىق كوردى.

بىرىككەن ۇلتتار ۇيىمى باس اسسامبلەياسىنىڭ 74-سەسسياسى 17 -قىركۇيەكتە باستالدى.

اۆتورى ازامات سىزدىقبايەۆ